ಐಪಿಎಲ್​ನಲ್ಲಿ ಆಡುತ್ತೀರಾ? ವರದಿಗಾರನ ಪ್ರಶ್ನೆಗೆ ಬಾಬರ್​ ಅಜಮ್​ ಕೊಟ್ಟ ಪ್ರತಿಕ್ರಿಯೆ ವೈರಲ್​

ಸಿಡ್ನಿ: ಆಸ್ಟ್ರೇಲಿಯಾದ ಮೆಲ್ಬೋರ್ನ್​ ಕ್ರೀಡಾಂಗಣದಲ್ಲಿ ಇಂದು (ನ.13) ನಡೆಯಲಿರುವ ಟಿ20 ವಿಶ್ವಕಪ್ (T20 World Cup 2022)​ ಟೂರ್ನಿಯ ಫೈನಲ್​ ಪಂದ್ಯದಲ್ಲಿ ಬಾಬರ್​ ಅಜಾಮ್ (Babar Azam)​ ನೇತೃತ್ವದ ಪಾಕಿಸ್ತಾನ ತಂಡ ಕ್ರಿಕೆಟ್​ ಜನಕ ಇಂಗ್ಲೆಂಡ್ (England)​ ತಂಡವನ್ನು ಎದುರಿಸಲಿದೆ. ಪಂದ್ಯಕ್ಕೂ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಐಪಿಎಲ್​ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಲು ಬಾಬರ್​ ಅಜಮ್​ ತಬ್ಬಿಬ್ಬಾದ ಪ್ರಸಂಗ ಜರುಗಿತು.

ಐಪಿಎಲ್ (IPL) ಆಡುವುದರಿಂದ ಆಗುವ ಪ್ರಯೋಜನಗಳ ಬಗ್ಗೆ ನೀವು ಮಾತನಾಡಿ, ನಿಮಗೆ ಮತ್ತು ನಿಮ್ಮ ತಂಡಕ್ಕೆ ಇದರಿಂದ ಏನಾದರೂ ಸಹಾಯ ಆಗಬಹುದೆಂದು ನೀವು ಭಾವಿಸುತ್ತೀರಾ ಮತ್ತು ಭವಿಷ್ಯದಲ್ಲಿ ನೀವು ಐಪಿಎಲ್​ ಆಡುವ ಭರವಸೆ ಇದೆಯೇ? ಎಂದು ವರದಿಗಾರ ಕೇಳಿದ ಪ್ರಶ್ನೆಗೆ ಬಾಬರ್ ಸಂಪೂರ್ಣವಾಗಿ ದಿಗ್ಭ್ರಮೆಗೊಂಡಂತೆ ನೋಡಿದರು.

ವರದಿಗಾರನ ಪ್ರಶ್ನೆಗೆ ಉತ್ತರಿಸಲಾಗದೇ ತಮ್ಮ ಬಲ ಭಾಗದಲ್ಲಿ ಕುಳಿತಿದ್ದ ತಂಡದ ಮೀಡಿಯಾ ಮ್ಯಾನೇಜರ್​ ಕಡೆ ಬಾಬರ್​ ನೋಡಿದರು. ಈ ವೇಳೆ ಮಧ್ಯ ಪ್ರವೇಶಿಸಿದ ಪಾಕ್​ ಮೀಡಿಯಾ ಮ್ಯಾನೇಜರ್​, ಈ ಕ್ಷಣದಲ್ಲಿ ನಾವು ವಿಶ್ವಕಪ್​ ಫೈನಲ್​ ಕುರಿತಾದ ಪ್ರಶ್ನೆಗಳನ್ನು ಮಾತ್ರ ಸ್ವೀಕರಿಸುತ್ತೇವೆ.​ ಫೈನಲ್​ಗೆ ಸಂಬಂಧಿಸಿದ ಪ್ರಶ್ನೆಗಳನ್ನು ಮಾತ್ರ ಕೇಳಿ ಎಂದರು. ಆದರೆ, ಬಾಬರ್​ ಈ ಪ್ರಶ್ನೆಯಿಂದ ಕೊಂಚ ವಿಚಲಿತರಾಗಿರುವಂತೆ ಕಂಡರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಇಂದು (ನ.13) ಮಧ್ಯಾಹ್ನ 1.30ಕ್ಕೆ ಆಸ್ಟ್ರೇಲಿಯಾದ ಮೆಲ್ಬೋರ್ನ್​ ಕ್ರೀಡಾಂಗಣದಲ್ಲಿ ಫೈನಲ್​ ಪಂದ್ಯ ನಡೆಯಲಿದ್ದು, ಟ್ರೋಫಿಗಾಗಿ ಪಾಕ್​ ಮತ್ತು ಇಂಗ್ಲೆಂಡ್​ ಕಾದಾಡಲಿವೆ. (ಏಜೆನ್ಸೀಸ್​)

https://www.vijayavani.net/radiologist-arrested-for-capturing-visuals-of-woman-while-changing-clothes-for-scanning/

https://www.vijayavani.net/if-pakistan-do-win-world-cup-babar-azam-will-become-pakistan-prime-minister-in-2048-sunil-gavaskar/

https://www.vijayavani.net/kantara-movie-another-controversy/