ಜಡ್ಡು ಗ್ರಾಮದ ಬೊಡ್ಡು ರಸ್ತೆ...!

ಗ್ರಾಮೀಣ ಜನರಿಗೆ ನಿತ್ಯ ಪರದಾಟ

ದಿನವೂ ನಾಲ್ಕಾರು ಊರು ಸುತ್ತಾಟ

ಪ್ರಶಾಂತ ಭಾಗ್ವತ ಉಡುಪಿ

ಗ್ರಾಮೀಣ ಭಾಗ ಅಭಿವೃದ್ಧಿಯಾದರೆ ದೇಶ ಅಭಿವೃದ್ಧಿಯಾದಂತೆ ಎಂದು ಜನನಾಯಕರು ಆಗಾಗ ವೇದಿಕೆಯಲ್ಲಿ ಹಲುಬುತ್ತಾರೆ. ಆದರೆ, ತಂತ್ರಜ್ಞಾನದ ಈ ಯುಗದಲ್ಲೂ ಹಲವು ಗ್ರಾಮಗಳಿಗೆ ಮೂಲ ಸೌಕರ್ಯ ಮರೀಚಿಕೆಯಾಗಿದೆ.

ಹಳ್ಳಿಗಳ ಸಂಪರ್ಕಕ್ಕೆ ರಸ್ತೆ ಪ್ರಮುಖ ಸೌಲಭ್ಯವಾಗಿದೆ. ಊರು-ಗ್ರಾಮಗಳನ್ನು ದಾಟಿ ನಗರ ಭಾಗ ಸೇರಲು ಜನ ಜೀವನಕ್ಕೆ ಅದು ಮೂಲ ಆಸರೆಯಾಗುತ್ತದೆ. ಆದರೆ, ಬುದ್ಧಿವಂತರ ಜಿಲ್ಲೆ ಉಡುಪಿ ತಾಲೂಕಿನ ಜಡ್ಡು ಗ್ರಾಮಕ್ಕೆ ರಸ್ತೆಯದೇ ಕೊರಗಾಗಿದೆ.

ಮಣ್ಣಿನ ರಸ್ತೆ

ಮಳೆಗಾಲದಲ್ಲಿ ಪರದಾಟ

ಮಳೆಗಾಲ ಆರಂಭವಾಯಿತೆಂದರೆ ಜಡ್ಡು ಗ್ರಾಮದ ಜನರ ಗೋಳು ಹೇಳತೀರದು. ಕೆಂಪು ಮಣ್ಣಿನ ರಸ್ತೆಯಾಗಿದ್ದರಿಂದ ಕೆಸರು ಗದ್ದೆಯಂತಾಗುತ್ತದೆ. ಯಾವುದೇ ವಾಹನಗಳೂ ಮೂರು ತಿಂಗಳ ಕಾಲ ಈ ಗ್ರಾಮದತ್ತ ಸುಳಿಯುವುದೂ ಇಲ್ಲ. ನಡೆಯಲೂ ಆಗದ ರೀತಿಯಲ್ಲಿ ಮಣ್ಣಿನ ರಸ್ತೆ ಹದಗೆಡುತ್ತದೆ.

ಶಾಲೆಗೆ ಹೋಗಲು ತೊಡಕು

ಈ ಭಾಗದಲ್ಲಿ ನಾಲ್ಕು ಶಾಲೆಗಳಿದ್ದು, ಮಕ್ಕಳನ್ನು ಕೊಂಡೊಯ್ಯಲೂ ಈಗ ಶಾಲಾ ವಾಹನವೂ ಗ್ರಾಮದತ್ತ ಬರುತ್ತಿಲ್ಲ. ಹೀಗಾಗಿ ಜಡ್ಡು ಗ್ರಾಮದ ಮಕ್ಕಳನ್ನು ಶಾಲೆಗೆ ಕಳುಹಿಸಲು ಗುಂಡುಪಾದೆ, ಪೆರ್ಣಂಕಿಲ, ಕೋಡಿಬೆಟ್ಟು, ಹಿರಿಯಡ್ಕದತ್ತ ಸಾಗಿ ಸುಮಾರು 10 ಕಿಮೀ ಸುತ್ತುಬಳಸಿ ತೆರಳಬೇಕಿದೆ. ಊರಿನಲ್ಲಿರುವ ಉದ್ಯೋಗಿಗಳೂ ಸಹ ಪಟ್ಲದವರೆಗೆ 2 ಕಿಮೀ ನಡೆದು ಹೋಗಿ ಬಸ್​ ಹತ್ತುವ ಸಂದಿಗ್ಧ ಸ್ಥಿತಿಯಿದೆ.

ಗ್ರಾಮಸ್ಥರಿಂದಲೇ ರಿಪೇರಿ ಕಾರ್ಯ