ಜಿಲ್ಲಾ ಕೇಂದ್ರ ರಾಮನಗರಕ್ಕೆ ನಿರಂತರ ನೀರು ಪೂರೈಕೆ ಮಾಡುವ ಯೋಜನೆ ಅಧಿಕೃತ ಉದ್ಘಾಟನೆಗೆ ಇನ್ನೂ ಭಾಗ್ಯ ಕೂಡು ಬಂದಿಲ್ಲ. ಇದರ ಹೊರತಾಗಿಯೂ ಸಂಪೂರ್ಣ ಯೋಜನೆ ಜಾರಿಗೆ ಇನ್ನೂ ಎರಡು ತಿಂಗಳು ಕಾಯಬೇಕಾದ ಅನಿವಾರ್ಯತೆ ಇದೆ. ಆದರೆ, ಈ ಯೋಜನೆ ನಗರವಾಸಿಗಳಿಗೆ ಧೂಳಿನ ಮಜ್ಜನಕ್ಕೆ ಕಾರಣವಾಗಿದೆ.
ನಿರಂತರ ನೀರು ತರುವ ಯೋಜನೆ ಜನತೆಯ ನೀರಿನ ಬವಣೆ ನೀಗಿಸಲಿದೆಯಾದರೂ, ಧೂಳಿನ ಸಮಸ್ಯೆ ಹೆಚ್ಚಿಸಿದೆ. ನಗರದ ತುಂಬೆಲ್ಲ ರಸ್ತೆಗಳು ಗುಂಡಿ ಬಿದ್ದಿವೆ. ಇಲ್ಲಿ ಪಾದಚಾರಿಗಳು, ವಾಹನ ಸವಾರರು ಓಡಾಡುವುದೇ ಕಷ್ಟವಾಗಿದೆ. ಮಳೆಗಾಲ ಬಂದರೆ ನೀರು ನಿಂತ ಗುಂಡಿಗಳಲ್ಲಿ ಬೀಳುವ ಹೆದರಿಕೆ ಒಂದೆಡೆಯಾದರೆ, ಬೇಸಿಗೆಯಲ್ಲಿ ಧೂಳಿನ ಭಯ ಆರಂಭಗೊಂಡಿದೆ. ಬೇಸಿಗೆ ವೇಳೆಗೆ ನಗರದ ತುಂಬೆಲ್ಲ ಧೂಳು ಆವರಿಸಿ ಉಸಿರಾಟದ ತೊಂದರೆಗೆ ಒಳಗಾಗುವರ ಸಂಖ್ಯೆಯೂ ಹೆಚ್ಚುತ್ತದೆ. ಆದರೂ ಸದ್ಯಕ್ಕೆ ಈ ಸಮಸ್ಯೆಗೆ ಮುಕ್ತಿ ಸಿಗುವುದು ಅನುಮಾನ.
