ಬೆಂಗಳೂರಿನಲ್ಲಿ 19 ವರ್ಷಗಳ ನಂತರ ಸೋತ ಭಾರತ: ಅಂತಿಮ ದಿನ ನಡೆಯದ ಪವಾಡ

blank

ಗುರುರಾಜ್ ಬಿ.ಎಸ್. ಬೆಂಗಳೂರು
ಮೊದಲ ದಿನ ಸುರಿದ ಮಳೆಯ ಬಳಿಕ ಪಿಚ್‌ನ ಪರಿಸ್ಥಿತಿ ಅರಿಯುವಲ್ಲಿ ಎಸಗಿದ ಬಹುದೊಡ್ಡ ಪ್ರಮಾದದಿಂದಾಗಿ ಭಾರತ ತಂಡ, ಪ್ರವಾಸಿ ನ್ಯೂಜಿಲೆಂಡ್ ಎದುರು ಮೊದಲ ಟೆಸ್ಟ್ ಪಂದ್ಯದಲ್ಲಿ 8 ವಿಕೆಟ್‌ಗಳಿಂದ ಪರಾಭವಗೊಂಡಿದೆ. ಇದರೊಂದಿಗೆ 36 ವರ್ಷಗಳ ಬಳಿಕ ಟೆಸ್ಟ್ ಕ್ರಿಕೆಟ್‌ನಲ್ಲಿ ನ್ಯೂಜಿಲೆಂಡ್ ಎದುರು ತವರಿನಲ್ಲಿ ಸೋಲಿನ ಕಹಿ ಅನುಭವಿಸಿದೆ. ಉದ್ಯಾನನಗರಿಯಲ್ಲಿ ಟೀಮ್ ಇಂಡಿಯಾ 19 ವರ್ಷಗಳ ಬಳಿಕ ಟೆಸ್ಟ್ ಸೋಲು ಕಂಡಿತು. ಐದನೇ ಹಾಗೂ ಅಂತಿಮ ದಿನವೂ ಮೇಲುಗೈ ಸಾಧಿಸಿದ ನ್ಯೂಜಿಲೆಂಡ್ ಸ್ಮರಣೀಯ ಗೆಲುವು ತನ್ನದಾಗಿಸಿಕೊಂಡು, ಮೂರು ಪಂದ್ಯಗಳ ಸರಣಿಯಲ್ಲಿ 0-1ರಿಂದ ಮುನ್ನಡೆ ಸಾಧಿಸಿದೆ.

ಚಿನ್ನಸ್ವಾಮಿ ಕ್ರೀಡಾಂಗಣದ ಆತಿಥ್ಯದಲ್ಲಿ ಭಾನುವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ ರೋಹಿತ್ ಶರ್ಮ ಪಡೆ ನೀಡಿದ 107 ರನ್‌ಗಳ ಅಲ್ಪ ಗುರಿಯನ್ನು ಅಂತಿಮ ದಿನ ಬೆನ್ನಟ್ಟಿದ ನ್ಯೂಜಿಲೆಂಡ್ ತಂಡ, ಮಳೆ ಅಡಚಣೆಯ ನಡುವೆಯೂ ವಿಲ್ ಯಂಗ್ (48* ರನ್, 76 ಎಸೆತ, 7 ಬೌಂಡರಿ, 1 ಸಿಕ್ಸರ್) ಹಾಗೂ ಬೆಂಗಳೂರು ಮೂಲದ ಆಲ್ರೌಂಡರ್ ರಚಿನ್ ರವೀಂದ್ರ (39* ರನ್, 46 ಎಸೆತ, 6 ಬೌಂಡರಿ) ಅಜೇಯ ಜತೆಯಾಟದ ಬಲದಿಂದ ಭೋಜನ ವಿರಾಮಕ್ಕೂ ಮುನ್ನವೇ 27.4 ಓವರ್‌ಗಳಲ್ಲಿ 2 ವಿಕೆಟ್‌ಗೆ 110 ರನ್‌ಗಳಿಸಿ ಗೆಲುವಿನ ಸಂಭ್ರಮ ಕಂಡಿತು. ಮೊದಲ ಇನಿಂಗ್ಸ್‌ನಲ್ಲಿ ಶತಕ ಹಾಗೂ ಎರಡನೇ ಇನಿಂಗ್ಸ್‌ನಲ್ಲಿ ಸಮಯೋಚಿತ ಆಟವಾಡಿದ 24 ವರ್ಷದ ರಚಿನ್ ರವೀಂದ್ರ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು. ಇದು ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ 25ನೇ ಟೆಸ್ಟ್ ಪಂದ್ಯವಾಗಿತ್ತು.

ಮತ್ತೆ ಕಾಡಿದ ರಚಿನ್: ಶನಿವಾರ ರಾತ್ರಿ ಹಾಗೂ ಭಾನುವಾರ ಬೆಳಗ್ಗೆ ಸುರಿದ ಭಾರಿ ಮಳೆಯಿಂದಾಗಿ ದಿನದಾಟ ತಡವಾಗಿ ಆರಂಭಗೊಂಡಿತು. 10.15ಕ್ಕೆ ಆಟ ಆರಂಭಗೊಂಡಾಗ ವೇಗಿ ಜಸ್‌ಪ್ರೀತ್ ಬುಮ್ರಾ ಭಾರತಕ್ಕೆ ಕನಸಿನ ಆರಂಭವನ್ನೇ ಒದಗಿಸಿದರು. 4 ಎಸೆತ ಎದುರಿಸಿ ಬ್ಯಾಟಿಂಗ್ ಕಾಯ್ದುಕೊಂಡಿದ್ದ ನಾಯಕ ಟಾಮ್ ಲಾಥಮ್ (0) ಅವರನ್ನು ದಿನದ 2ನೇ ಎಸೆತದಲ್ಲಿ ಎಲ್‌ಬಿ ಬಲೆಗೆ ಬೀಳಿಸಿದರು. ಡಿಆರ್‌ಎಸ್ ಮೊರೆ ಹೋದರೂ ಬಚಾವಾಗಲಿಲ್ಲ. ಹೊಸ ಚೆಂಡಿನಲ್ಲಿ ಮೊನಚಿನ ದಾಳಿ ನಡೆಸಿದ ಬುಮ್ರಾ ಹಾಗೂ ಸಿರಾಜ್ ಸುಲಭವಾಗಿ ರನ್ ಬಿಟ್ಟುಕೊಡಲಿಲ್ಲ.

ಅನೀರಿಕ್ಷಿತ ಬೌನ್ಸ್ ಜತೆಗೆ ಲೋ ಬೌನ್ಸ್‌ನಿಂದ ಪುಟಿಯುತ್ತಿದ್ದ ಎಸೆತಗಳನ್ನು ಎದುರಿಸಲು ಡೆವೋನ್ ಕಾನ್‌ವೇ (17) ಮತ್ತು ವಿಲ್ ಯಂಗ್ ಪರದಾಡಿದರು. ಇದರಿಂದ ರೋಹಿತ್ ಪಡೆಯಲ್ಲಿ ನಿರೀಕ್ಷೆ ಗರಿಗೆದರಿದತು. ಆದರೆ ಎರಡನೇ ವಿಕೆಟ್‌ಗೆ ಇವರಿಬ್ಬರು 69 ಎಸೆತಗಳಲ್ಲಿ 35 ರನ್ ಕಸಿದು ವೇಗಿಗಳನ್ನು ಕಾಡಿದರು. ಚೆಂಡು ಹಳೆತದಾಗುತ್ತಿದ್ದಂತೆ ವೇಗಿಗಳು ಮೊನಚು ಕಳೆದುಕೊಂಡರು. 13ನೇ ಓವರ್‌ನಲ್ಲಿ ಕಾನ್‌ವೇ ಆಟಕ್ಕೆ ತೆರೆ ಎಳೆದ ಬುಮ್ರಾ, ಡಿಆರ್‌ಎಸ್‌ನಲ್ಲಿ ವಿಕೆಟ್ ಪಡೆದುಕೊಂಡರು. ಆಗ ವಿಲ್ ಯಂಗ್ ಜತೆಯಾದ ರಚಿನ್ ರವೀಂದ್ರ ಸ್ಪಿನ್ನರ್‌ಗಳ ಆಕ್ರಮಣಕಾರಿ ಆಟವಾಡಿ ಭಾರತದ ಹೋರಾಟವನ್ನು ಹಿಮ್ಮೆಟ್ಟಿಸಿದರು. ಇವರಿಬ್ಬರು ಮುರಿಯದ ಮೂರನೇ ವಿಕೆಟ್‌ಗೆ 92 ಎಸೆತಗಳಲ್ಲಿ 75 ರನ್ ಬಾರಿಸಿ ದಡ ಸೇರಿಸಿದರು.

ಎರಡನೇ ಟೆಸ್ಟ್
ಯಾವಾಗ: ಅ.24-28
ಎಲ್ಲಿ: ಪುಣೆ

Share This Article

ಟೊಮೆಟೊ ಸೇವನೆ ಕ್ಯಾನ್ಸರ್​ ಅಪಾಯವನ್ನು ಕಡಿಮೆ ಮಾಡುತ್ತದೆಯೇ; ಈ ಬಗ್ಗೆ ತಜ್ಞರು ಹೇಳೋದೇನು? | Health Tips

ಕ್ಯಾನ್ಸರ್ ಚಿಕಿತ್ಸೆಯು ಇನ್ನೂ ಅತ್ಯಂತ ದುಬಾರಿ ಮತ್ತು ಅಸಾಧ್ಯವಾಗಿದೆ. ಇತ್ತೀಚೆಗೆ ಯುವಕರನ್ನೂ ಕಾಡುತ್ತಿರುವ ರೋಗ ಕ್ಯಾನ್ಸರ್​​.…

ಚಳಿಗಾಲದಲ್ಲಿ ಅಲೋವೆರಾ ಜೆಲ್ ಅನ್ನು ತಲೆಗೆ ಹಚ್ಚಿಕೊಳ್ಳಬಹುದೇ? aloe vera gel benefits

aloe vera gel benefits : ಚಳಿಗಾಲದಲ್ಲಿ ತಲೆಹೊಟ್ಟು ಸಾಮಾನ್ಯ. ಚಳಿಗಾಲದಲ್ಲಿ ಶುಷ್ಕ ಗಾಳಿಯು ನಮ್ಮ…

ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಒಂದು ಚಮಚ ತೆಂಗಿನೆಣ್ಣೆ ಕುಡಿದರೆ ಏನಾಗುತ್ತೆ ಗೊತ್ತಾ? Coconut Oil Benefits

Coconut Oil Benefits:  ಪ್ರತಿದಿನ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ತಿನ್ನುವ ಆಹಾರವೇ ನಮ್ಮ ಆರೋಗ್ಯವನ್ನು ನಿರ್ಧರಿಸುತ್ತದೆ.…