ತ್ಯಾಜ್ಯ ಎಸೆಯುವಿಕೆಗಿಲ್ಲ ಕಡಿವಾಣ

ವಿಜಯವಾಣಿ ಸುದ್ದಿಜಾಲ ಕುಂದಾಪುರ

ಕುಂದಾಪುರ ತಾಲೂಕಿನ ಚತುಷ್ಪಥ ಹೆದ್ದಾರಿ ಸೇತುವೆ, ನದಿಗಳು, ಹೆದ್ದಾರಿ ಮತ್ತು ಗ್ರಾಮಾಂತರ ರಸ್ತೆ, ಅರಣ್ಯದಂಚು, ಚರಂಡಿ ಕೊಳಚೆ ಗಟಾರಾಗಿ ಮಾರ್ಪಟ್ಟಿದೆ. ಕಳೆದೊಂದು ತಿಂಗಳಿಂದ ಕೊಳಚೆ ರಾಶಿ ಬೀಳುತ್ತಿರುವ ಬಗ್ಗೆ ಪರಿಸರ ಪ್ರಿಯರು ಕಳವಳ ವ್ಯಕ್ತಪಡಿಸಿದ್ದಾರೆ.

ತ್ಯಾಜ್ಯ ಕೇಂದ್ರ

ಕುಂದಾಪುರ ತಾಲೂಕಿನ ಏಳಕ್ಕೂ ಮಿಕ್ಕಿ ರಾಷ್ಟ್ರೀಯ ಹೆದ್ದಾರಿ ಸೇತುವೆಗಳ ಸಂಧಿಗಳು ತ್ಯಾಜ್ಯ ಗುಂಡಿಗಳಾಗಿ ಮಾರ್ಪಾಡಾಗುತ್ತಿದೆ. ಶಿರೂರು ಸಂಕದಗುಂಡಿ ಸೇತುವೆ ಮೊದಲ್ಗೊಂಡು ಕುಂದಾಪುರ ಸಂಗಮ್ ಸೇತುವೆವರೆಗಿನ ಇಕ್ಕೆಲ ತ್ಯಾಜ್ಯ ಎಸೆಯುವಿಕೆ ಕೇಂದ್ರವಾಗಿದೆ. ತಲ್ಲೂರು ಗ್ರಾಮದ ರಾಜಾಡಿ ಸೇತುವೆ ಇಕ್ಕೆಲ ದುರ್ನಾತ ಬೀರುತ್ತಿದೆ. ಸೇತುವೆಯಲ್ಲಿ ನಿಂತು ತ್ಯಾಜ್ಯ ಎಸೆಯುವ ನೋಟ ಮಾಮೂಲಾಗಿ ಬಿಟ್ಟಿದೆ.

ಮೂಟೆಗಳಲ್ಲಿ ಕಸ

ಗ್ರಾಮಾಂತರ ಸೇತುವೆಗಳಲ್ಲೂ ಇದೇ ಅವಸ್ಥೆ. ಆನಗಳ್ಳಿ, ಕಂಡ್ಲೂರು, ಅಂಪಾರು, ವಂಡ್ಸೆ, ನೇರಳಕಟ್ಟೆ ಸಮೀಪದ ಸೇತುವೆ ಬುಡದಲ್ಲಿ ಲೋಡುಗಟ್ಟಲೆ ತ್ಯಾಜ್ಯ ತುಂಬಿದೆ. ಅರಣ್ಯದಂಚಿನಲ್ಲಿ ಸಾಗುವ ಹೆದ್ದಾರಿ ಬದಿ, ರಸ್ತೆಬದಿ ತ್ಯಾಜ್ಯದ ಮೂಟೆಗಳು ಕಣ್ಣಿಗೆ ರಾಚುತ್ತಿದೆ. ಕುಂದಾಪುರದಿಂದ ಶಿರೂರುವರೆಗಿನ ರಾಷ್ಟ್ರೀಯ ಹೆದ್ದಾರಿ-66 ಮತ್ತು ನಾಯಕವಾಡಿ-ಮುಳ್ಳಿಕಟ್ಟೆ, ತ್ರಾಸಿ-ಗಂಗೊಳ್ಳಿ, ಹೆಮ್ಮಾಡಿ-ಕೊಲ್ಲೂರು, ಆಲೂರು-ವಂಡ್ಸೆ ಮೊದಲಾದ ಪ್ರಮುಖ ರಾಜ್ಯ ಹೆದ್ದಾರಿಗಳ ಇಕ್ಕೆಲಗಳಲ್ಲಿ ಪ್ರತಿನಿತ್ಯ ಎಂಬಂತೆ ತ್ಯಾಜ್ಯಗಳ ಮೂಟೆಗಳು ಬಂದು ಬೀಳುತ್ತಿದೆ.

ಪರಿಣಾಮಕಾರಿ ಕ್ರಮ ಅಗತ್ಯ

ಎಲ್ಲೆಂದರಲ್ಲಿ ತ್ಯಾಜ್ಯ ಸಹನೆಯ ಮಟ್ಟ ಮೀರಿ ಸಂಗ್ರಹವಾಗುತ್ತಿದೆ. ಸಾರ್ವಜನಿಕ ಸ್ಥಳಗಳಲ್ಲಿ, ರಸ್ತೆಗಳ ಇಕ್ಕೆಲಗಳಲ್ಲಿ, ಸೇತುವೆ, ಕಾಡಂಚಿನ ಸ್ಥಳಗಳಲ್ಲಿ ತ್ಯಾಜ್ಯ ಎಸೆಯುವಿಕೆಗೆ ನಿಯಂತ್ರಣ ಇಲ್ಲ ಎಂಬಂತಾಗಿದೆ. ಕಸ ಎಸೆಯದಂತೆ ಅಳವಡಿಸುವ ನಾಮಫಲಕಗಳಿಗೆ ಯಾವುದೇ ಕಿಮ್ಮತ್ತಿಲ್ಲದಂತಾಗಿದೆ. ನಾಮಫಲಕದ ಬುಡದಲ್ಲೇ ಕಸ ಎಸೆದುಹೋಗುತ್ತಿದ್ದು, ಸ್ವಚ್ಛ ಭಾರತ್ ಪರಿಕಲ್ಪನೆಯಡಿ ಪ್ರತಿ ಗ್ರಾಮದಲ್ಲಿ ತ್ಯಾಜ್ಯ ನಿರ್ವಹಣೆ ಘಟಕ ಕಾರ್ಯಾಚರಿಸುತ್ತಿದ್ದರೂ ಬೀದಿ ಬೀದಿಯಲ್ಲಿನ ತ್ಯಾಜ್ಯ ಎಸೆಯುವಿಕೆಗೆ ಇನ್ನೂ ಕಡಿವಾಣ ಬಿದ್ದಿಲ್ಲ. ಜಿಲ್ಲಾಡಳಿತ ಹೆದ್ದಾರಿ ಬದಿ ಕಸ ಎಸೆಯುವುದನ್ನು ನಿಯಂತ್ರಿಸಲು ಪರಿಣಾಮಕಾರಿ ಕ್ರಮ ತೆಗೆದುಕೊಳ್ಳಬೇಕು ಎಂದು ಪರಿಸರ ಪ್ರೇಮಿಗಳು ಆಗ್ರಹಿಸಿದ್ದಾರೆ.