ನಿರ್ದೇಶಕ ಸುರಾಗ್ ಮೊದಲ ಪ್ರಯತ್ನದಲ್ಲಿಯೇ ಗಹನ ಕಥೆಯನ್ನು ಸರಳವಾಗಿ ಹೇಳುವ ಮೂಲಕ ತಮ್ಮ ಸಾಮರ್ಥ್ಯವನ್ನು ತೋರಿಸಿಕೊಟ್ಟಿದ್ದಾರೆ. ನಿದ್ದೆಯನ್ನೇ ಆಧರಿಸಿರುವ ಕಥೆಯಲ್ಲಿ ಬಡಿದೆಬ್ಬಿಸುವ, ಸೀಟಂಚಿನಲ್ಲಿ ಕೂರಿಸುವ ಕೌತುಕ ಇದೆ. ಎಲ್ಲಿಯೂ ಬೋರ್ ಅನ್ನಿಸದೆ, ನೇರವಾಗಿ ಕಥೆ ಹೇಳಿರುವ ಕಾರಣ ಸಿನಿಮಾ ಇಷ್ಟವಾಗುತ್ತದೆ. ನಾಯಕ ಪ್ರವೀರ್ ಶೆಟ್ಟಿ ಅಭಿನಯ, ಡಾನ್ಸ್ ಮೂಲಕ ಗಮನ ಸೆಳೆಯುತ್ತಾರೆ. ನಿದ್ರಾಹೀನನೊಬ್ಬ ಹೇಗೆ ಖಿನ್ನನಾಗಿ, ಕೋಪಿಷ್ಠನಾಗಿ ಹಾಗೂ ಅಸಹಾಯಕನಾಗಿರುತ್ತಾನೆ ಎಂಬುದನ್ನು ಮುಖಭಾವದಲ್ಲಿ ತೋರಿಸಿಕೊಟ್ಟಿದ್ದಾರೆ. ಇಂಟರೆಸ್ಟಿಂಗ್ ಪಾತ್ರದಲ್ಲಿ ಶೈನ್ ಶೆಟ್ಟಿ ಮಿಂಚಿದ್ದಾರೆ. ರಿಷಿಕಾ ಕ್ಯೂಟ್ ನಟನೆ ಇಷ್ಟವಾಗುತ್ತದೆ. ಶ್ರುತಿ ಹರಿಹರನ್, ಸುಧಾರಾಣಿ, ಸಿದ್ಲಿಂಗು ಶ್ರೀಧರ್ ಕೊಟ್ಟ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ನಕುಲ್ ಅಭ್ಯಯಂಕರ್ ಸಂಗೀತ, ಹಿನ್ನೆಲೆ ಸಂಗೀತ ಖುಷಿ ಕೊಡುತ್ತದೆ. ಅಜಯ್ ಕುಲಕರ್ಣಿ ಛಾಯಾಗ್ರಹಣ ಸಿನಿಮಾಕ್ಕೆ ಪೂರಕವಾಗಿದೆ. ಸೈಕಲಾಜಿಕಲ್ ಥ್ರಿಲ್ಲಿಂಗ್ ಅನುಭವಕ್ಕೆ ’ನಿದ್ರಾದೇವಿ ನೆಕ್ಸ್ಟ್ ಡೋರ್’ ಉತ್ತಮ ಆಯ್ಕೆ.
