ಹವಾಮಾನ ಬದಲಾವಣೆ ವಿರುದ್ಧ ಹೋರಾಡಬೇಕಾದ, ಪರಿಸರಸ್ನೇಹಿ ಕ್ರಮಗಳನ್ನು ಅನುಷ್ಠಾನಗೊಳಿಸಬೇಕಾದ ಅಗತ್ಯವನ್ನು ಹಲವು ರಾಷ್ಟ್ರಗಳು ಒತ್ತಿ ಹೇಳಿವೆ. ಆದರೆ, ಇಂಥ ಹೇಳಿಕೆಗಳು ದೊಡ್ಡ ದೊಡ್ಡ ವೇದಿಕೆಗಳಿಂದ ಆಗಾಗ ಹೊಮ್ಮಿ, ಅಷ್ಟೇ ಬೇಗ ಮರೆಯಾಗಿ ಬಿಡುತ್ತವೆ ಎಂಬುದು ಸತ್ಯ. ಇಂಗಾಲದ ಹೊರಸೂಸುವಿಕೆ ಶೂನ್ಯಮಟ್ಟಕ್ಕೆ ಇಳಿಸುವ ಕುರಿತಾದ ಚರ್ಚೆ ಭಾರತದಲ್ಲಿ ಹಲವು ವರ್ಷಗಳ ಹಿಂದೆಯೇ ಆರಂಭವಾಗಿದೆ. ಆದರೆ, ಈ ದಿಕ್ಕಿನಲ್ಲಿ ಪ್ರಾಯೋಗಿಕ ಕ್ರಮಗಳನ್ನು ಕೈಗೊಳ್ಳದ ಪರಿಣಾಮ ಪರಿಸ್ಥಿತಿಯಲ್ಲಿ ಏನೂ ಬದಲಾವಣೆ ಆಗಲಿಲ್ಲ. ಅತಿ ಮಾಲಿನ್ಯ ಹೊಂದಿರುವ ವಿಶ್ವದ ನಗರಗಳಲ್ಲಿ ಭಾರತದ ಹಲವು ನಗರಗಳಿವೆ ಎಂಬುದು ವಿಪರ್ಯಾಸ. ಮಹಾನಗರಗಳಂತೂ ತಮ್ಮ ಧಾರಣಾ ಸಾಮರ್ಥ್ಯವನ್ನು ಮೀರಿ ಬೆಳೆಯುತ್ತಿದ್ದು, ಶುದ್ಧ ಗಾಳಿ, ನೀರು ಮರೀಚಿಕೆಯಾಗುತ್ತಿದೆ. ಮುಂಬೈ ನಗರವನ್ನು ಕಾರ್ಬನ್ವುುಕ್ತಗೊಳಿಸುವ ಯೋಜನೆ ಮಹತ್ವಪೂರ್ಣವಾದದ್ದು. ದೇಶದ ಇತರ ಮಹಾನಗರಗಳು ಕೂಡ ಈ ನಿಟ್ಟಿನಲ್ಲಿ ಆಲೋಚಿಸುವ ಮತ್ತು ಕಾರ್ಯಪ್ರವೃತವಾಗುವ ಸಮಯ ಬಂದಿದೆ. ಇಲ್ಲದಿದ್ದಲ್ಲಿ ಹವಾಮಾನ ಬದಲಾವಣೆಯ ವೈಪರೀತ್ಯಗಳು ಗಂಭೀರ ಸಮಸ್ಯೆ ತಂದೊಡ್ಡಬಲ್ಲವು. ಆಗ ಯಾರನ್ನೂ ದೂಷಿಸಿ ಪ್ರಯೋಜನವಿಲ್ಲ.
