ಹಾಳಾಗುತ್ತಿದೆ ಬೆಳೆ... ಕುಸಿಯುತ್ತಿದೆ ಬೆಲೆ..

ರಾಜೇಂದ್ರ ಶಿಂಗನಮನೆ ಶಿರಸಿ

ಕೊಯ್ಲು ಮಾಡಿದ ಮೆಕ್ಕೆಜೋಳವನ್ನು ಅಕಾಲಿಕ ಮಳೆಯಿಂದಾಗಿ ಒಣಗಿಸಲಾಗುತ್ತಿಲ್ಲ. ಕಾಳು ಮೊಳಕೆಯೊಡೆಯುವ ಜೊತೆಗೆ ಫಂಗಸ್​ಗೆ ತುತ್ತಾಗುತ್ತಿದೆ. ಇದರಿಂದಾಗಿ ರೈತರ ಕೈಗೆ ಬಂದ ಫಸಲು ಬಾಯಿಗೆ ಬಾರದಂತಾಗಿದೆ.

ತಾಲೂಕಿನ ದಾಸನಕೊಪ್ಪ, ಬೆಳ್ಳನಕೇರಿ, ರಾಮಾಪುರ, ಹೆಬ್ಬತ್ತಿ, ಕಲಕರಡಿ, ಮಾಳಂಜಿ, ಮಧುರವಳ್ಳಿ, ಗುಡ್ನಾಪುರ, ಹಾಡಲಗಿ, ಬದನಗೋಡ ಭಾಗದಲ್ಲಿ ನೂರಾರು ಹೆಕ್ಟೇರ್ ಪ್ರದೇಶದಲ್ಲಿ ಪ್ರತಿ ವರ್ಷದಂತೆ ಜೋಳ ಬೆಳೆಯಲಾಗಿದೆ. ವಿವಿಧೆಡೆ ಮೆಕ್ಕೆಜೋಳ ಮುರಿದು ಕಾಳು ಬೇರ್ಪಡಿಸಲಾಗಿದೆ. ಆದರೆ, ಮಳೆ ಕಾಟದಿಂದ ಸರಿಯಾಗಿ ಒಣಗಿಸಲಾಗದೆ, ಇಟ್ಟಲ್ಲೇ ಫಂಗಸ್ ಬಂದು ಮೊಳಕೆಯೊಡೆಯುತ್ತಿದೆ. ಉಳುಮೆ, ಗೊಬ್ಬರ, ಬೀಜ, ಕಾರ್ವಿುಕರು ಸೇರಿ ಒಂದು ಎಕರೆ ಪ್ರದೇಶದಲ್ಲಿ ಮೆಕ್ಕೆಜೋಳ ಬೆಳೆಯಲು 15ರಿಂದ 20 ಸಾವಿರ ರೂ. ವೆಚ್ಚವಾಗುತ್ತದೆ. ಆದರೆ, ವರುಣನ ವಕ್ರದಷ್ಟಿಯಿಂದಾಗಿ ಖರ್ಚು ಮಾಡಿದ ಹಣವೂ ವಾಪಸಾಗದಂತಹ ಪರಿಸ್ಥಿತಿ ತಲೆದೋರಿದೆ.

ಖರೀದಿ ಕೇಂದ್ರಗಳಿಲ್ಲ: ಸರ್ಕಾರವು ಮೆಕ್ಕೆಜೋಳವನ್ನು ಬೆಂಬಲ ಬೆಲೆಯಲ್ಲಿ ಖರೀದಿಸುವುದಾಗಿ ಹೇಳುತ್ತಿದೆ. ಆದರೆ, ಈ ಭಾಗದಲ್ಲಿ ಖರೀದಿ ಕೇಂದ್ರಗಳ ಕುರಿತಂತೆ ರೈತರಿಗೆ ಯಾವುದೇ ಮಾಹಿತಿಯಿಲ್ಲ. ಹಾಲಿ ದರ ಕ್ವಿಂಟಾಲ್ ಮೆಕ್ಕೆಜೋಳಕ್ಕೆ 1000-1200 ರೂ. ಚಾಲ್ತಿಯಲ್ಲಿ ಇದೆಯಾದರೂ ಖರೀದಿಸಲು ಯಾರೂ ಬರುತ್ತಿಲ್ಲ. ಇದರಿಂದ ಬೆಳೆಯನ್ನು ಏನು ಮಾಡುವುದು ಎಂದು ಬೆಳೆಗಾರರು ಚಿಂತಾಕ್ರಾಂತರಾಗಿದ್ದಾರೆ. ಸಂಬಂಧಪಟ್ಟ ಇಲಾಖೆಯು ಖರೀದಿ ಕೇಂದ್ರ ತೆರೆದು ಯೋಗ್ಯ ಬೆಲೆಗೆ ಮೆಕ್ಕೆಜೋಳ ಖರೀದಿಸಿ ನಮ್ಮ ಕೈ ಹಿಡಿಯಬೇಕು ಎಂದು ರೈತರು ಒತ್ತಾಯಿಸುತ್ತಿದ್ದಾರೆ.