ಶರಣರ ಬೆಟ್ಟದ ಗೀರು ಚಿತ್ರಗಳಿಗೆ ಬೇಕಿದೆ ರಕ್ಷಣೆ

ಕೂಡ್ಲಿಗಿ: ಗುಡೇಕೋಟೆ ಹೋಬಳಿಯ ಪೂರ್ವಕ್ಕೆ 35 ಕಿಮೀ ದೂರ, ದೇವರಹಟ್ಟಿ ಮತ್ತು ಹಾಲಸಾಗರ ಗ್ರಾಮಗಳ ಸಮೀಪದಲ್ಲಿರುವ ಶರಣರ ಬೆಟ್ಟ ಪ್ರಾಗೈತಿಹಾಸಿಕ ನೆಲೆ ಬೀಡಾಗಿದೆ. ಆದರೆ, ಸೂಕ್ತ ಸಂರಕ್ಷಣೆ, ಪ್ರಚಾರವಿಲ್ಲದ ಕಾರಣ ಬೆಳಕಿಗೆ ಬಾರದೇ ಉಳಿದಿದೆ.

ಇದು ಏಕಶಿಲಾ ಬೆಟ್ಟದಂತೆ ಗೋಚರಿಸುತ್ತಿದ್ದು, ಇಲ್ಲಿ ನೈಸರ್ಗಿಕವಾಗಿ ಕಲ್ಲಾಸರೆಗಳು, ಗವಿ, ಬಯಲು ಬಂಡೆ, ನೀರಿನ ದೋಣಿಗಳಿಂದ ಸದಾ ಕಂಗೊಳಿಸುತ್ತಿದೆ. ಇಲ್ಲಿ ಹಿಂದೆ ಶರಣರು ವಾಸಿಸುತ್ತಿದ್ದರಿಂದ ಶರಣರ ಬೆಟ್ಟ ಎಂದು ಕರೆಯಲಾಗುತ್ತಿದೆ ಎಂಬ ಪ್ರತೀತಿ ಇದೆ. ಬೆಟ್ಟದ ಮಧ್ಯದ ಬಯಲು ಬಂಡೆ ಮೇಲೆ ಗೀರು ಚಿತ್ರಗಳಿರುವುದರಿಂದ ನೂತನ ಮತ್ತು ಬೃಹತ್ ಶಿಲಾಯುಗದ ಜನರು ಕ್ರಿ.ಪೂ.1200 ರಲ್ಲಿ ವಾಸಿಸುತ್ತಿದ್ದರು ಎಂಬುದನ್ನು ಸೂಚಿಸುತ್ತದೆ.

ಇದನ್ನೂ ಓದಿ: ಕಾಡು ಪ್ರಾಣಿಗಳಿಂದಾಗುವ ಅನಾಹುತ ತಡೆಗೆ ಕ್ರಮ

ಕಲ್ಮನೆ ಸಮಾಧಿಗಳು, ಸಾಕಿದ ಹಾಗೂ ಕಾಡು ಪ್ರಾಣಿಗಳನ್ನು ಬಯಲು ಬಂಡೆಗಳ ಮೇಲೆ ಚಿತ್ರಗಳನ್ನು ಗೀಚಿದ್ದಾರೆ. ಈ ಗೀರು ಚಿತ್ರಗಳನ್ನು ಪ್ರಾಗೈತಿಹಾಸಿಕ ತಜ್ಞರಾದ ಎಂ.ಎಸ್. ನಾಗರಾಜ್ ರಾವ್, ರು.ಮ. ಷಡಕ್ಷರಯ್ಯ ಅವರು ಸ್ಥಳೀಯರ ಸಹಕಾರದೊಂದಿಗೆ ಸಂಶೋಧಿಸಿ ಬೆಳಕಿಗೆ ತಂದಿದ್ದು, ಗೀರು ಬಂಡೆ ಚಿತ್ರ ಎಂದು ಕರೆದಿದ್ದಾರೆ. ಗೂಳಿಗಳು, ಜಿಂಕೆಗಳು, ಶಂಖುಹುಳ, ಏಣಿ, ಪಾದಗಳ ಗೀರು ಚಿತ್ರಗಳು ಇಲ್ಲಿ ಕಾಣಬಹುದು. ಈ ತರಹ ಗೀರು ಚಿತ್ರಗಳು ಬೃಹತ್ ಶಿಲಾಯುಗ, ಆದಿ ಮಧ್ಯಭಾಗದವು ಎನ್ನುತ್ತದೆ ಚರಿತ್ರೆ.

ಜನರಿಂದ ಗುಹೆಯ ದರ್ಶನ

ಗೀರುಚಿತ್ರಗಳನ್ನು ಸ್ಥಳೀಯರು ಹಾಗೂ ಸುತ್ತ್ತಲಿನ ಗ್ರಾಮಸ್ಥರು ಶ್ರಾವಣದಲ್ಲಿ ಪ್ರತಿ ಸೋಮವಾರ ಶರಣರ ಬೆಟ್ಟಕ್ಕೆ ಬಂದು ಗುಹೆಯ ದರ್ಶನ ಮಾಡುವುದು ಸಾಮಾನ್ಯವಾಗಿದೆ. ಅಲ್ಲದೆ ಮ್ಯಾಸ ಬುಡಕಟ್ಟು ಸಮುದಾಯದವರು ಶರಣರ ಬೆಟ್ಟವನ್ನು ಹಾಗೂ ಅಲ್ಲಿರುವ ಗೀರುಬಂಡೆ ಚಿತ್ರ, ಗವಿ, ನೀರಿನ ಹೊಂಡಗಳನ್ನು ಅತ್ಯಂತ ಪವಿತ್ರವೆಂದ ಭಾವಿಸಿ ಪೂಜಿಸುತ್ತಾರೆ.