ವಿಜಯನಗರ 4ನೇ ಹಂತದಂತಹ ಕೆಲ ಪ್ರಮುಖ ಬಡಾವಣೆಗಳಿಗೆ ನದಿಮೂಲದ ನೀರಿಲ್ಲದಂತಾಗಿದೆ

ನಗರ ವ್ಯಾಪ್ತಿಯಲ್ಲಿ ಬಳಕೆ ಮಾಡಿದ ಬಳಿಕ ಉಳಿಯುವ ಅಲ್ಪ ಪ್ರಮಾಣದ ನೀರು ಚಾಮುಂಡೇಶ್ವರಿ ಕ್ಷೇತ್ರಕ್ಕೆ ಸೇರುವ ಪಾಲಿಕೆ, ನಗರಸಭೆ, ಪುರಸಭೆ ವ್ಯಾಪ್ತಿಯ ಬಡಾವಣೆಗಳಿಗೆ ಸರಬರಾಜಾಗುತ್ತಿದೆ. ಇವೆಲ್ಲವೂ ನಗರ ಹೊರವಲಯದಲ್ಲಿರುವ ಕಾರಣ ಕೃಷ್ಣರಾಜ, ಚಾಮರಾಜ ಕ್ಷೇತ್ರಕ್ಕೆ ಪೂರೈಕೆಯಾಗುವ ನೀರಿಗಿಂತ ಶೇ.50ರಷ್ಟು ಕಡಿಮೆ (ನಿತ್ಯ 1-2 ಗಂಟೆ) ದೊರೆಯುತ್ತಿದೆ. ವಿಜಯನಗರ 4ನೇ ಹಂತದಂತಹ ಕೆಲ ಪ್ರಮುಖ ಬಡಾವಣೆಗಳಿಗೆ ನದಿಮೂಲದ ನೀರಿಲ್ಲದಂತಾಗಿದೆ.

ರಾಮಕೃಷ್ಣನಗರ, ದಟ್ಟಗಳ್ಳಿ, ಜನತಾನಗರ, ಬೋಗಾದಿ, ವಿಜಯನಗರ 3ನೇ, 4ನೇ ಹಂತ, ಆಲನಹಳ್ಳಿ, ರಮ್ಮನಹಳ್ಳಿ, ಹೂಟಗಳ್ಳಿ, ಆರ್‌ಎಂಪಿ, ರಾಜರಾಜೇಶ್ವರಿ ನಗರ, ರೂಪಾನಗರ, ಆರ್.ಟಿ.ನಗರ, ಯೂನಿವರ್ಸಿಟಿ ಲೇಔಟ್ ಹಾಗೂ ಇನ್ನಿತರ ಕೆಲ ಬಡಾವಣೆಗಳಿಗೆ ನಗರಕ್ಕೆ ನೀರು ಸರಬರಾಜು ಮಾಡುವ ಪಂಪಿಂಗ್ ಸ್ಟೆಷನ್‌ಗಳಿಂದಲೇ ನೀರು ಸರಬರಾಜು ಮಾಡಲಾಗುತ್ತಿದೆ. ಇವುಗಳಲ್ಲಿ ಬಹುತೇಕ ಬಡಾವಣೆಗಳು ನಗರದಿಂದ ಹೊರವಲಯದಲ್ಲಿವೆ. ಈ ದೂರದ ಪ್ರದೇಶಕ್ಕೆ ಸಿಟಿ ಒಳಭಾಗದ ಚಾಮರಾಜ, ಕೃಷ್ಣರಾಜ ಕ್ಷೇತ್ರಕ್ಕೆ ಬಳಕೆಗೆ ತಕ್ಕಷ್ಟು ನೀರು ಪೂರೈಸಿದ ನಂತರ ಉಳಿಯುವ ನೀರನ್ನು ಚಾಮುಂಡೇಶ್ವರಿ ಕ್ಷೇತ್ರದ ಬಡಾವಣೆಗಳಿಗೆ ನೀಡಲಾಗುತ್ತಿದೆ.

ವಿಜಯನಗರಕ್ಕೆ ಟ್ಯಾಂಕರ್ ನೀರು:

ವಿಜಯನಗರ 4ನೇ ಹಂತದ ನೀರು ನಿರ್ವಹಣೆಯನ್ನು ಮುಡಾದಿಂದ ಮಾಡಲಾಗುತ್ತಿದೆ. ಪಾಲಿಕೆ ವಾಣಿವಿಲಾಸದಿಂದ ಕೇವಲ ಸಗಟು ನೀರನ್ನು ನೀಡಲಾಗುತ್ತದೆ. ವಿತರಣೆ ಜವಾಬ್ದಾರಿಯನ್ನು ಮುಡಾ ವಹಿಸಿಕೊಂಡಿದೆ. ನಗರ ವ್ಯಾಪ್ತಿಯ ಪಾಲಿಕೆಗೆ ಸೇರುವ ಬಡಾವಣೆಗಳಿಗೆ ನೀರಿನ ಕೊರತೆಯಾದಾಗ ಪಾಲಿಕೆಯು ವಿಜಯನಗರ 4ನೇ ಹಂತಕ್ಕೆ ನೀರು ನೀಡುವುದಿಲ್ಲ. ಆಗ ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರ ವತಿಯಿಂದ ಟ್ಯಾಂಕರ್ ಮೂಲಕ ಸರಬರಾಜು ಮಾಡಲಾಗುತ್ತಿದೆ.

ಬೋರ್‌ವೆಲ್ ನೀರೇ ಗತಿ

ನಗರಕ್ಕೆ ನದಿ ಮೂಲಗಳಿಂದ ಕಬಿನಿ, ಮೇಳಾಪುರ, ಬೆಳಗೊಳ, ಹೊಂಗಹಳ್ಳಿ ಪಂಪಿಂಗ್ ಸ್ಟೆಷನ್‌ಗಳಿಂದ ಒಟ್ಟು 306 ಎಂಎಲ್‌ಡಿ ನೀರು ಸರಬರಾಜಾದರೂ ನಗರಕ್ಕೆ ಹೊಂದಿಕೊಂಡಂತಿರುವ ಚಾಮುಂಡೇಶ್ವರಿ ಕ್ಷೆತ್ರದ ಬಹುತೇಕ ಬಡಾವಣೆಗಳಿಗೆ ನದಿ ಮೂಲದ ನೀರು ದೊರೆಯುತ್ತಿಲ್ಲ. ಬದಲಾಗಿ ಬೋರ್‌ವೆಲ್ ನೀರಿನ ವ್ಯವಸ್ಥೆ ಮಾಡಲಾಗುತ್ತಿದೆ. ಬೇಸಿಗೆ ಕಾರಣಕ್ಕೆ ಕೆಲವೆಡೆ ಕೊಳವೆ ಬಾವಿಗಳಲ್ಲಿಯೂ ನೀರು ಸಿಗುತ್ತಿಲ್ಲ. ಇಂತಹ ಕಡೆಗೆ ಟ್ಯಾಂಕರ್‌ನಲ್ಲಿ ನೀರು ಸರಬರಾಜು ಮಾಡಬೇಕಿದೆ.

ನೀರಿನ ಕರ ಬಾಕಿ:

ಮುಡಾ ವಿಜಯನಗರ 4ನೇ ಹಂತಕ್ಕೆ ನೀರು ಸರಬರಾಜು ಮಾಡಿದ್ದಕ್ಕೆ ಪಾಲಿಕೆಗೆ ನೀಡಬೇಕಾದ 60 ಲಕ್ಷ ರೂ. ನೀರಿನ ಬಿಲ್ ಬಾಕಿ ಉಳಿಸಿಕೊಂಡಿದೆ. ಅಸಮರ್ಪಕ ನೀರು ಪೂರೈಕೆಗೆ ಇದೂ ಒಂದು ಕಾರಣವಾಗಿದೆ.

ಕಬಿನಿ, ಉಂಡವಾಡಿಯೇ ಪರಿಹಾರ

‘ತಿಂಗಳೊಳಗೆ ಕಬಿನಿ(2ನೇಹಂತದ) ಉನ್ನತೀಕರಣ ಕಾಮಗಾರಿ ಪೂರ್ಣಗೊಳ್ಳಲಿದ್ದು, 30 ಎಂಎಲ್‌ಡಿ ನೀರು ಹೆಚ್ಚುವರಿಯಾಗಿ ದೊರೆಯುತ್ತದೆ. ವರ್ಷದೊಳಗೆ ಪೂರ್ಣಗೊಳ್ಳುವ ಉಂಡವಾಡಿ ಯೋಜನೆಯಿಂದಲೂ 150 ಎಂಎಲ್‌ಡಿ ನೀರು ದೊರೆಯುವುದರಿಂದ ನೀರಿನ ಸಮಸ್ಯೆ ಬಗೆಹರಿಯುತ್ತದೆ’ ಎಂದು ಶಾಸಕ ಜಿ.ಟಿ. ದೇವೇಗೌಡ ತಿಳಿಸಿದ್ದಾರೆ.

‘ನಗರ ಕೇಂದ್ರಕ್ಕೆ ನೀಡಿ ಉಳಿದ ನೀರನ್ನು ಚಾಮುಂಡೇಶ್ವರಿ ಕ್ಷೇತ್ರದ ಕೆಲ ಪ್ರದೇಶಕ್ಕೆ ನೀಡಲಾಗುತ್ತಿದೆ. ಈ ಪ್ರಮಾಣ ಕಡಿಮೆಯಾಗಿದ್ದು, ವಿಸ್ತೃತ ಯೋಜನೆ ಅನುಷ್ಠಾನದಿಂದ ಸಮಸ್ಯೆ ಬಗೆಹರಿಯುತ್ತದೆ’ ಎಂದಯ ನಗರ ಪಾಲಿಕೆ ಕಾರ್ಯಪಾಲಕ ಇಂಜಿನಿಯರ್ ಮುಸ್ತಾಫಾ ತಿಳಿಸಿದ್ದಾರೆ.