ವಿಐಪಿಗಳಿಗೆ ಟೈಟ್ ಸೆಕ್ಯುರಿಟಿ!; ಸಿದ್ದು ಕಾರಿಗೆ ಮೊಟ್ಟೆ ಎಸೆದ ಪ್ರಕರಣ, ಎಚ್ಚೆತ್ತ ಪೊಲೀಸ್ ಇಲಾಖೆ..

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಕೊಡಗು ಪ್ರವಾಸ ಸಂದರ್ಭದಲ್ಲಿ ಪ್ರತಿಪಕ್ಷ ನಾಯಕ ಸಿದ್ದರಾಮಯ್ಯ ಕಾರಿನ ಮೇಲೆ ಮೊಟ್ಟೆ ಎಸೆದ ಪ್ರಕರಣದ ರಾಜಕೀಯ ಕೋಲಾಹಲದ ಬೆನ್ನಲ್ಲೇ ಎಚ್ಚೆತ್ತುಕೊಂಡಿರುವ ರಾಜ್ಯ ಪೊಲೀಸ್ ಇಲಾಖೆ, ಗಣ್ಯ ವ್ಯಕ್ತಿಗಳ ಪ್ರವಾಸದ ವೇಳೆ ಕೈಗೊಳ್ಳಬೇಕಾದ ಭದ್ರತಾ ಕ್ರಮಗಳ ಕುರಿತು ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಯಾವುದೇ ರೀತಿಯ ಅಚಾತುರ್ಯ ಕೃತ್ಯಗಳಿಗೆ ಆಸ್ಪದವಿಲ್ಲದಂತೆ ಬಿಗಿ ಪೊಲೀಸ್ ಬಂದೋಬಸ್ತ್​ಗೆ ಆದೇಶಿಸಿದ್ದು, ಆಯಾ ವಿಭಾಗದ ಪೊಲೀಸ್ ಆಯುಕ್ತರು ಹಾಗೂ ಜಿಲ್ಲಾ ಎಸ್ಪಿಗಳಿಗೆ ಜವಾಬ್ದಾರಿ ವಹಿಸಲಾಗಿದೆ.

ಮೊಟ್ಟೆ ಎಸೆತ ಪ್ರಕರಣದಿಂದ ಕೊಡಗು ಭಾಗದಲ್ಲಿ ಅಶಾಂತಿ ವಾತಾವರಣ ನಿರ್ವಣವಾಗಿತ್ತು. ಜತೆಗೆ ಸಿದ್ದರಾಮಯ್ಯ ಬೆಂಬಲಿಗರು ಆ.26ಕ್ಕೆ ‘ಮಡಿಕೇರಿ ಚಲೋ’ ಬೃಹತ್ ಪಾದಯಾತ್ರೆಗೆ ಮುಂದಾಗಿದ್ದರು. ಮೊಟ್ಟೆ ಎಸೆತ ಪ್ರಕರಣದಲ್ಲಿ ಪೊಲೀಸ್ ವೈಫಲ್ಯದ ಬಗ್ಗೆಯೂ ಆರೋಪ ಕೇಳಿಬಂದಿರುವ ಹಿನ್ನೆಲೆಯಲ್ಲಿ ಹಾಗೂ ಚುನಾವಣಾ ವರ್ಷವಾಗಿರುವ ಕಾರಣಕ್ಕೆ ಯಾವುದೇ ಅನಾಹುತ ನಡೆಯದಂತೆ ಕಟ್ಟುನಿಟ್ಟಿನ ನಿಯಮಗಳ ಪಾಲನೆಗೆ ಪೊಲೀಸ್ ಇಲಾಖೆ ಆದೇಶಿಸಿದೆ.

ಗಣ್ಯವ್ಯಕ್ತಿಗಳ ಪ್ರವಾಸ ಸಂದರ್ಭದಲ್ಲಿ ಯಾವುದೇ ಪ್ರತಿಭಟನೆ ಮಾಡುವುದು, ಆಕ್ಷೇಪಾರ್ಹ ವಸ್ತುಗಳನ್ನು ಎಸೆಯುವುದು ಸೇರಿ ಇನ್ನಿತರ ಕಾನೂನು ಉಲ್ಲಂಘಿಸುವ ವ್ಯಕ್ತಿಗಳನ್ನು ಸ್ಥಳದಲ್ಲೇ ದಸ್ತಗಿರಿ ಮಾಡಿ, ನಿಯಮಾನುಸಾರ ಕಾನೂನು ಕ್ರಮ ತೆಗೆದುಕೊಳ್ಳುವ ಅಧಿಕಾರವನ್ನು ಸ್ಥಳೀಯ ಪೊಲೀಸರಿಗೆ ನೀಡಲಾಗಿದೆ. ಒಟ್ಟಾರೆ ಪಾಲಿಸಬೇಕಾದ ಐದಂಶಗಳ ಮಾರ್ಗಸೂಚಿಯನ್ನು ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ಎಡಿಜಿಪಿ ಅಲೋಕ್ ಕುಮಾರ್ ಸೋಮವಾರ (ಆ.22) ಹೊರಡಿಸಿದ್ದಾರೆ.

ಸೆಕ್ಯುರಿಟಿ ಹೇಗಿರುತ್ತೆ?: ರಾಜ್ಯದಲ್ಲಿ ಸಿಎಂ ಹಾಗೂ ರಾಜ್ಯಪಾಲರಿಗೆ ಮಾತ್ರ ಜ್ಹೆಡ್ ಶ್ರೇಣಿ ಭದ್ರತೆ ಒದಗಿಸಲು ಅವಕಾಶವಿದೆ. ಸಚಿವರು, ಶಾಸಕರು, ಸ್ಪೀಕರ್ ಅಥವಾ ಇನ್ನಾವುದೇ ಪ್ರಭಾವಿ ವ್ಯಕ್ತಿಗಳಿಗೆ ಜೀವ ಬೆದರಿಕೆ ಇರುವ ಮಾಹಿತಿ ಖಚಿತವಾದರೆ ಅಂಥವರಿಗೆ ಜ್ಹೆಡ್ ಶ್ರೇಣಿ ಸೆಕ್ಯುರಿಟಿ ಒದಗಿಸುವ ನಿರ್ಧಾರ ತೆಗೆದುಕೊಳ್ಳುವ ಅಧಿಕಾರ ರಾಜ್ಯ ಸರ್ಕಾರ ಹಾಗೂ ಪೊಲೀಸ್ ಇಲಾಖೆಗೆ ಇದೆ.

ಡಿಜಿಪಿ ಜತೆ ರ್ಚಚಿಸಿದ್ದ ಸಿಎಂ: ಸಿದ್ದರಾಮಯ್ಯ ಕೊಡಗು ಭೇಟಿ ಸಂದರ್ಭದಲ್ಲಿ ಕಾರಿನ ಮೇಲೆ ಮೊಟ್ಟೆ ಎಸೆದಿದ್ದಲ್ಲದೆ, ಕಾರಿನೊಳಗೆ ಕರಪತ್ರ ಹಾಕಲಾಗಿತ್ತು. ಅಲ್ಲದೆ, ಗೋಬ್ಯಾಕ್ ಸಿದ್ದರಾಮಯ್ಯ ಎಂದು ಘೋಷಣೆ ಕೂಗಿದ್ದರು. ಸ್ಥಳದಲ್ಲಿ ಪೊಲೀಸರಿದ್ದರು ತಡೆಯಲಿಲ್ಲ ಎಂಬ ಆರೋಪವನ್ನು ಸಿದ್ದರಾಮಯ್ಯ ಅವರೇ ಮಾಡಿದ್ದರು. ಈ ಸಂಬಂಧ ಡಿಜಿಪಿ ಪ್ರವೀಣ್ ಸೂದ್ ಅವರನ್ನು ಕರೆಸಿಕೊಂಡಿದ್ದ ಸಿಎಂ ಬಸವರಾಜ ಬೊಮ್ಮಾಯಿ ಘಟನೆ ಬಗ್ಗೆ ಮಾಹಿತಿ ಪಡೆದು ರ್ಚಚಿಸಿದ್ದರು. ಗಣ್ಯರ ಪ್ರವಾಸದ ವೇಳೆ ಬಿಗಿ ಪೊಲೀಸ್ ಭದ್ರತೆ ಒದಗಿಸು ವಂತೆಯೂ ಸೂಚಿಸಿದ್ದರು ಎಂದು ಗೊತ್ತಾಗಿದೆ.

ಸೂಚನೆಗಳೇನು?

• ಕಪ್ಪು ಬಾವುಟ ಪ್ರದರ್ಶನ, ಆಕ್ಷೇಪಾರ್ಹ ವಸ್ತುಗಳನ್ನು ಎಸೆಯುವುದು, ಬೆಂಕಿ ಹಚ್ಚುವುದು, ಭಿತ್ತಿ ಪತ್ರಗಳನ್ನು ಸುಡುವುದು ಅಥವಾ ಹರಿಯುವುದಕ್ಕೆ ಆಸ್ಪದ ಕೊಡಬಾರದು
• ಪ್ರವಾಸ ಕೈಗೊಳ್ಳುವ ನಿರ್ದಿಷ್ಟ ಸ್ಥಳದಿಂದ ಅಂತಿಮ ಸ್ಥಳಕ್ಕೆ ತಲುಪುವವರೆಗೂ ರಸ್ತೆ ಹಾದಿಯನ್ನು ಸಂಬಂಧಪಟ್ಟ ಪೊಲೀಸ್ ಆಯುಕ್ತರು ಹಾಗೂ ಪೊಲೀಸ್ ಅಧೀಕ್ಷಕರು ಖುದ್ದಾಗಿ ಪರಿಶೀಲನೆ ನಡೆಸಿ ಬಂದೋಬಸ್ತ್ ಒದಗಿಸಬೇಕು.
• ಪ್ರವಾಸಗೊಳ್ಳುವ ಸಂದರ್ಭ ವಾಸ್ತವ್ಯ ಹೂಡುವ ಸ್ಥಳಗಳಲ್ಲಿ ಹಾಗೂ ಕಾರ್ಯಕ್ರಮ ನಡೆಸುವ ಸ್ಥಳಗಳಲ್ಲಿ ಕಟ್ಟುನಿಟ್ಟಿನ ಭದ್ರತೆ ಅಗತ್ಯ ಸಿಬ್ಬಂದಿ ನಿಯೋಜಿಸಬೇಕು.
• ಪ್ರವಾಸದ ವೇಳೆಯಲ್ಲಿ ಯಾವುದೇ ರೀತಿಯ ಕಾನೂನು ಉಲ್ಲಂಘನೆ ಮಾಡಿದ ವ್ಯಕ್ತಿಗಳನ್ನು ದಸ್ತಗಿರಿ ಮಾಡುವುದು, ನಿಯಮಾನುಸಾರ ಕಾನೂನು ಕ್ರಮ ಜರುಗಿಸುವುದು.

4 ರೀತಿಯ ಭದತಾ ವ್ಯವಸ್ಥೆ

• ಜ್ಹೆಡ್ ಪ್ಲಸ್ ಸೆಕ್ಯುರಿಟಿ: ಪ್ರಧಾನಿ, ಮಾಜಿ ಪ್ರಧಾನಿ, ರಾಷ್ಟ್ರಪತಿ, ಕೇಂದ್ರ ಗೃಹ ಸಚಿವರು, ಸುಪ್ರೀಂಕೋರ್ಟ್ ನ್ಯಾಯಮೂರ್ತಿಗಳಿಗೆ ಈ ಭದ್ರತೆ ಇದೆ. 36 ಎನ್​ಎಸ್​ಜಿ ಬೆಂಗಾವಲು ಸಿಬ್ಬಂದಿ, ಬುಲೆಟ್ ಪ್ರೂಫ್ ಕಾರು ಮತ್ತು ಎಸ್ಕಾರ್ಟ್ ಕಾರು ನೀಡಲಾಗುತ್ತದೆ.
• ಜ್ಹೆಡ್ ಸೆಕ್ಯುರಿಟಿ: ಆಯಾ ರಾಜ್ಯಗಳಲ್ಲಿ ಸಿಎಂ ಹಾಗೂ ರಾಜ್ಯಪಾಲರಿಗೆ ಈ ಭದ್ರತೆ ಒದಗಿಸಲಾಗುತ್ತೆ. ಸ್ಥಳೀಯ 22 ಪೊಲೀಸ್ ಸಿಬ್ಬಂದಿ, ಬುಲೆಟ್ ಪ್ರೂಫ್ ಕಾರು ಹಾಗೂ ಪೈಲೆಟ್ ಕಾರು ನೀಡಲಾಗುತ್ತಿದೆ.
• ವೈ ಸೆಕ್ಯುರಿಟಿ: ಗಣ್ಯ ವ್ಯಕ್ತಿಗಳು ಎಂದು ಗುರುತಿಸಿಕೊಂಡವರಿಗೆ ಈ ಭದ್ರತೆ ನೀಡಲಾಗುತ್ತೆ. 11 ಭದ್ರತಾ ಸಿಬ್ಬಂದಿ ನಿಯೋಜಿಸಲಾಗುತ್ತದೆ.
• ಎಕ್ಸ್ ಸೆಕ್ಯುರಿಟಿ: ಉದ್ಯಮಿಗಳು, ಸಾಹಿತಿಗಳು, ರಾಜಕೀಯ ಪಕ್ಷಗಳ ಮುಖಂಡರಿಗೆ ಈ ಭದ್ರತೆ ಒದಗಿಸಬಹುದು. ಇಬ್ಬರು ಸಿಬ್ಬಂದಿಯನ್ನು ಭದ್ರತೆಗೆ ನೀಡಲಾಗುತ್ತದೆ.

https://www.vijayavani.net/a-16-year-old-was-finally-reunited-with-her-mother-after-nine-years/

https://www.vijayavani.net/no-entry-in-electoral-roll-shall-be-deleted-on-the-ground-of-non-submission-of-aadhar/