ರಾಯಚೂರಿನಲ್ಲಿ ತ್ರಿಕೋನ ಕಾದಾಟ

ಕಾಂಗ್ರೆಸ್ ಭದ್ರಕೋಟೆಯಾಗಿದ್ದ ರಾಯಚೂರು ಜಿಲ್ಲೆಯಲ್ಲಿ ಒಂದೂವರೆ ದಶಕದಿಂದೀಚೆಗೆ ಬಿಜೆಪಿ ಅರಳುವ ಮೂಲಕ ತೀವ್ರ ಸ್ಪರ್ಧೆ ನೀಡಿದೆ. ಜೆಡಿಎಸ್​ಗೆ ಮತದಾರರಿಂದ ಸ್ಪಂದನೆಯಿದ್ದರೂ ಅಸ್ತಿತ್ವಕ್ಕಾಗಿ ಹೆಣಗಾಡಬೇಕಿದೆ. ಜಿಲ್ಲೆಯ ಏಳು ಕ್ಷೇತ್ರಗಳಲ್ಲಿ ನಾಲ್ಕು ಪರಿಶಿಷ್ಟ ಪಂಗಡ, ಒಂದು ಪರಿಶಿಷ್ಟ ಜಾತಿಗೆ ಮೀಸಲಾಗಿವೆ. ಸಾಮಾನ್ಯಕ್ಕೆ ಮೀಸಲಿರುವ ಎರಡು ಕ್ಷೇತ್ರಗಳಲ್ಲಿ ಹೆಚ್ಚಿನ ಪೈಪೋಟಿಯಿದೆ. ಪ್ರಸ್ತುತ ತಲಾ ಎರಡು ಕ್ಷೇತ್ರಗಳಲ್ಲಿ ಬಿಜೆಪಿ-ಜೆಡಿಎಸ್, ಮೂರು ಕಡೆ ಕಾಂಗ್ರೆಸ್​ನ ಶಾಸಕರಿದ್ದಾರೆ. ಜಿಲ್ಲೆಯಲ್ಲಿ ಅಸ್ತಿತ್ವ ಉಳಿಸಿಕೊಳ್ಳಲು ಜೆಡಿಎಸ್ ಪ್ರಯತ್ನ ನಡೆಸುತ್ತಿದೆ. ಗೆಲ್ಲುವ ಅಭ್ಯರ್ಥಿಗಳತ್ತ ಬಿಜೆಪಿ-ಕಾಂಗ್ರೆಸ್ ಗಮನ ಹರಿಸಿವೆ.

|ಶಿವಮೂರ್ತಿ ಹಿರೇಮಠರಾಯಚೂರು

ಜಿಲ್ಲೆಯ ಹೈಲೈಟ್ಸ್

1.   ಕಳೆದ ಬಾರಿ ಇನ್ನೂ ಎರಡು ಕ್ಷೇತ್ರಗಳಲ್ಲಿ ಗೆಲ್ಲುವ ಸಾಧ್ಯತೆಗಳಿದ್ದರೂ ಕಾಂಗ್ರೆಸ್ ಮುಖಂಡರಲ್ಲಿನ ಭಿನ್ನಾಭಿಪ್ರಾಯಗಳು ಸೋಲಿಗೆ ಕಾರಣವಾದವು. ರಾಯಚೂರು ನಗರ ಮತ್ತು ಸಿಂಧನೂರಿನಲ್ಲಿ ಕಾಂಗ್ರೆಸ್​ನಲ್ಲಿರುವ ಗುಂಪುಗಾರಿಕೆ ಈ ಸಲದ ಚುನಾವಣೆ ಮೇಲೆ ಪರಿಣಾಮಗಳಾಗುವ ಸಾಧ್ಯತೆ ಗಳಿವೆ. ಮಾನ್ವಿ-ದೇವದುರ್ಗದಲ್ಲಿ ಸಮರ್ಥ ಅಭ್ಯರ್ಥಿ ಗಾಗಿ ಕಾಂಗ್ರೆಸ್ ಹುಡುಕಾಟ ನಡೆಸುವ ಪರಿಸ್ಥಿತಿಯಿದೆ.
2.  ಜಿಲ್ಲೆಯ ಎರಡು ಕಡೆ ಜೆಡಿಎಸ್ ಶಾಸಕರಿದ್ದು, ಈ ಕ್ಷೇತ್ರಗಳನ್ನು ಉಳಿಸಿಕೊಳ್ಳಲು ಹೆಚ್ಚಿನ ಪ್ರಯತ್ನ ನಡೆಸುತ್ತಿದೆ. ಇತರ ಕ್ಷೇತ್ರಗಳಲ್ಲೂ ಪಕ್ಷಕ್ಕಾಗಿ ಶ್ರಮಿಸಿದವರನ್ನು ಕೈಬಿಟ್ಟು, ಅಂತಿಮ ಕ್ಷಣದಲ್ಲಿ ಇತರರಿಗೆ ಟಿಕೆಟ್ ಕೊಡುತ್ತಾ ಬರಲಾಗಿದೆ. ಹೀಗಾಗಿ ಟಿಕೆಟ್ ಘೊಷಣೆ ನಂತರವೇ ಮೈದಾನದಲ್ಲಿ ಇಳಿಯೋಣ ಎಂದು ಪಕ್ಷಕ್ಕಾಗಿ ದುಡಿದವರು ನಿರ್ಧರಿಸಿದಂತಿದೆ.
3.   ಬಿಜೆಪಿಗೆ ಜಿಲ್ಲೆಯಲ್ಲಿ ಹೆಚ್ಚಿನ ಅವಕಾಶಗಳಿದ್ದರೂ ಸಮರ್ಥವಾಗಿ ಸದ್ಬಳಕೆ ಮಾಡಿಕೊಳ್ಳವತ್ತ ಗಮನ ಹರಿಸಬೇಕಿದೆ. ಮಾನ್ವಿ-ಸಿಂಧನೂರಿನಲ್ಲಿ ಗೆಲ್ಲುವ ಅಭ್ಯರ್ಥಿಗಳಿಗಾಗಿ ನಾಯಿಕರು ಹುಡುಕಾಟ ನಡೆಸಿದ್ದಾರೆ. ಕನಿಷ್ಠ ನಾಲ್ಕು ಕ್ಷೇತ್ರದಲ್ಲಾರೂ ಕಮಲ ಅರಳಿಸಬೇಕು ಎನ್ನುವ ನಿಟ್ಟಿನಲ್ಲಿ ಪ್ರಯತ್ನ ನಡೆಯುತ್ತಿವೆ.