ರಾಮ ಮಂದಿರ ಶಿಲಾನ್ಯಾಸ ಕಾರ್ಯಕ್ರಮದ ಬಗ್ಗೆ ಗಣ್ಯರ ಮನದಾಳದ ಮಾತು

ರಾಮ ಮಂದಿರಕ್ಕೆ ಶಿಲಾನ್ಯಾಸ ನಡೆಯುತ್ತಿರುವುದು ನನಗೆ ಮಾತ್ರವಲ್ಲ ಇಡೀ ಭಾರತೀಯರಿಗೆ ಐತಿಹಾಸಿಕ ಮತ್ತು ಭಾವನಾತ್ಮಕ ಕ್ಷಣವಾಗಿದೆ. ರಾಮ ಮಂದಿರವು ಸಶಕ್ತ, ಸಂಪನ್ನ ಮತ್ತು ಸೌಹಾರ್ದಪೂರ್ಣ ಭಾರತವನ್ನು ಪ್ರತಿನಿಧಿಸಲಿದೆ. ಜೀವನದ ಕೆಲವು ಕನಸುಗಳು ನನಸಾಗಲು ತುಂಬ ಸಮಯ ಹಿಡಿಯುತ್ತದೆ. ಆದರೆ, ಅಯೋಧ್ಯೆಯಲ್ಲಿ ಶ್ರೀರಾಮ ಮಂದಿರ ನಿರ್ವಣದ ಕನಸು ನನ್ನ ಹೃದಯಕ್ಕೆ ಹತ್ತಿರವಾಗಿತ್ತು ಮತ್ತು ಅದೀಗ ಸಾಕಾರಗೊಳ್ಳುತ್ತಿದೆ ಎಂಬುದು ಸಂತಸದ ಸಂಗತಿ.

1990ರ ಅಕ್ಟೋಬರ್​ನಲ್ಲಿ ಹೋರಾಟ ಕಾವು ಪಡೆದಿತ್ತು. ‘ಅಯೋಧ್ಯೆ ವಿವಾದದ ಪ್ರದೇಶಕ್ಕೆ ಎರಡು ರೆಕ್ಕೆ ಪಕ್ಷಿಗೂ ಹೋಗಲು ಬಿಡಲ್ಲ. ಇನ್ನು ಕರಸೇವಕರು ಹೇಗೆ ಒಳಗೆ ಹೋಗಲು ಸಾಧ್ಯ’ ಎಂದು ಅಂದಿನ ಉತ್ತರಪ್ರದೇಶ ಮುಖ್ಯಮಂತ್ರಿ ಮುಲಾಯಂ ಸಿಂಗ್ ಯಾದವ್ ಸವಾಲು ಹಾಕಿದ್ದರು. ಇದು ಕರಸೇವಕರನ್ನು ರೊಚ್ಚಿಗೆಬ್ಬಿಸಿತ್ತು. ದೇಶಾದ್ಯಂತದಿಂದ ಸಾವಿರಾರು ಕರೆಸೇವಕರು ಅಯೋಧ್ಯೆಗೆ ಹೊರಟರು. ನಾನೂ ನಾಲ್ವರನ್ನು ಕರೆದುಕೊಂಡು ರೈಲಿನಲ್ಲಿ ಹೊರಟೆ. ನಿಗದಿತ ಝಾನ್ಸಿ ನಿಲ್ದಾಣದಲ್ಲಿ ನಮ್ಮನ್ನು ಇಳಿಯಲು ಬಿಡಲಿಲ್ಲ. ಮಥುರಾ ಪಟ್ಟಣದಲ್ಲಿ ಇಳಿಸಿದ್ದರು. 5 ದಿನ ಗೃಹಬಂಧನದಲ್ಲಿ ಇಟ್ಟಿದ್ದರು. ಈ ನಡುವೆ, ನಿವೃತ್ತ ಯೋಧರೊಬ್ಬರು ಪೊಲೀಸ್ ವ್ಯಾನ್​ನಲ್ಲಿ ಹೋಗಿ ಅಯೋಧ್ಯೆಯ ವಿವಾದಿತ ಕಟ್ಟಡದ ಮೇಲೆ ಭಗವಾಧ್ವಜ ಹಾರಿಸಿದ ಸುದ್ದಿ ತಿಳಿದ ಜನರು ಪಟಾಕಿ ಸಿಡಿಸಿ, ಮನೆ ಮನೆಯಲ್ಲಿ ದೀಪ ಹಚ್ಚಿದ್ದರು. ಜತೆಗೆ, ಆಡ್ವಾಣಿಯವರ ರಥಯಾತ್ರೆ ತಡೆದಿದ್ದನ್ನು ವಿರೋಧಿಸಿ ಇಡೀ ಮೈಸೂರು ಜಿಲ್ಲೆಯನ್ನು ಬಂದ್ ಮಾಡಲಾಗಿತ್ತು. ಆದರೆ, 1992 ಡಿಸೆಂಬರ್ ಹೋರಾಟಕ್ಕೆ ನನಗೆ ಅಯೋಧ್ಯೆಗೆ ಹೋಗಲು ಆಗಲಿಲ್ಲ.

1990-92ರಲ್ಲಿ ಅಯೋಧ್ಯೆ ಕರಸೇವೆ ಸಂದರ್ಭದಲ್ಲಿ 5-6 ವರ್ಷಗಳಲ್ಲಿ ರಾಮಮಂದಿರ ನಿರ್ವಣವಾಗುವ ನಂಬಿಕೆ ಎಲ್ಲರಲ್ಲಿತ್ತು. ಆದರೆ ನಂತರದ ಬೆಳವಣಿಗೆ ತೊಡಕಾಯಿತು. ನನ್ನ ಜೀವಿತಾವಧಿಯಲ್ಲಿ ಭವ್ಯ ರಾಮಮಂದಿರ ನಿರ್ಮಾಣ ಕನಸಾಗಿಯೇ ಉಳಿಯಲಿದ್ದು, ಇದನ್ನು ನೋಡಲು ಮುಂದಿನ ಜನ್ಮ ನೀಡೆಂದು ದೇವರಲ್ಲಿ ಕೇಳಿದ್ದೆ! ಪ್ರತಿಯೊಬ್ಬ ಹಿಂದು ರಾಮಮಂದಿರ ನಿರ್ವಣದ ಕನಸು ಕಂಡಿದ್ದ. ಪ್ರತಿ ಮನೆ-ಮನಗಳ ಪ್ರಾರ್ಥನೆಯಿಂದ ಭವ್ಯ ಮಂದಿರ ನಿರ್ವಣವಾಗುತ್ತಿದೆ. ಕರಾವಳಿ ಭಾಗದಿಂದ ಸಾವಿರಕ್ಕೂ ಅಧಿಕ ಕರಸೇವಕರು ಅಯೋಧ್ಯೆಗೆ ಹೋಗಿದ್ದರು. ನಾನು ಕೂಡ ಭಾಗವಹಿಸಿದ್ದೆ. ಇದೀಗ ಧನ್ಯತೆ ಬಂದಿದೆ.

ಭವ್ಯ ಭಾರತದ ಇತಿಹಾಸ ಮರುಕಳಿಸುವ ಉತ್ಸಾಹದಲ್ಲಿದ್ದೇವೆ... ಹೀಗೆಂದವರು ಕರಸೇವಕರಾಗಿ ಭಾಗವಹಿಸಿದ್ದ ಹುಬ್ಬಳ್ಳಿಯ ಗುರುಸಿದ್ಧಪ್ಪ ಬಸಪ್ಪ ಶೆಲ್ಲಿಕೇರಿ. ‘1989, 1990 ಹಾಗೂ 1992ರಲ್ಲಿ ಕರಸೇವಕನಾಗಿ ಹೋಗಿ ಬಂದೆ. ಪ್ರತಿ ಸಲವೂ ಹೊಸತನ್ನು ಕಲಿತೆ. ಹುಬ್ಬಳ್ಳಿಯಿಂದ ಮೊದಲು ಹೋಗಿದ್ದು ನಾನೊಬ್ಬನೇ. ಮಧ್ಯಪ್ರದೇಶದ ಹಳ್ಳಿಗಳ ಜನ ನಮ್ಮನ್ನು ಚಕ್ಕಡಿ, ಸೈಕಲ್​ನಲ್ಲಿ ಕರೆದೊಯ್ದು ನಿಗೂಢ ಸ್ಥಳದಲ್ಲಿ ಉಳಿಸಿ, ಒಳದಾರಿಯಲ್ಲಿ ಮುಂದಕ್ಕೆ ಕಳುಹಿಸುತ್ತಿದ್ದರು. ಮುಂದೆ ಅಶೋಕ ಸಿಂಘಾಲ್ ಕರೆದಾಗಲೆಲ್ಲ ಕರಸೇವೆಗೆ ಹೋಗಿ ಬಂದಿದ್ದೇನೆ. ಈಗ ನಮ್ಮ ಹೋರಾಟ, ನನ್ನ ಜನ್ಮ ಸಾರ್ಥಕ ಎನಿಸುತ್ತಿದೆ’ ಎಂದು ಖುಷಿ ವ್ಯಕ್ತಪಡಿಸಿದರು. ಈ ಕರಸೇವಕ ಹುಬ್ಬಳ್ಳಿ ದುರ್ಗದಬೈಲ್​ನಲ್ಲಿ ಶ್ರೀ ಗುರುಸಿದ್ಧೇಶ್ವರ ದೋಸೆ ಮತ್ತು ಗೋಬಿ ಸೆಂಟರ್ ನಡೆಸುತ್ತಿದ್ದಾರೆ.

ಅಯೋಧ್ಯೆಯೊಳಕ್ಕೆ ಬಿಡಲೇ ಇಲ್ಲ. ಅರೆಸೇನಾ ಪಡೆ ಯೋಧರು ನಮ್ಮನ್ನು ಸುತ್ತುವರಿದಿದ್ದರು. ಅದಾಗಲೇ ಸಂಜೆ ವೇಳೆಯಾಗಿತ್ತು. ‘ನಿಮ್ಮೆಲ್ಲರನ್ನೂ ಬಂಧಿಸಿದ್ದೇವೆ’ ಎಂದು ಘೊಷಿಸಿದ ಪೊಲೀಸ್ ಅಧಿಕಾರಿಗಳು 14 ಬಸ್​ಗಳಲ್ಲಿ ನಮ್ಮನ್ನು ಚಿತ್ರಕೂಟದ ಕಾಡಿಗೆ ಕರೆದೊಯ್ದು ಬಿಟ್ಟರು. ಎಲ್ಲರೂ ಹಸಿವಿನಿಂದ ಕಂಗಾಲಾಗಿದ್ದೆವು. ಕಾಡಂಚಿನಲ್ಲಿ ಯಾವುದೋ ಹಳ್ಳಿ ಇರುವುದು ಗಮನಕ್ಕೆ ಬಂತು. ಅಲ್ಲಿಗೆ ತೆರಳಿ ಗ್ರಾಮಸ್ಥರಿಗೆ ಮನವಿ ಮಾಡಿ ದೊಡ್ಡ ಪಾತ್ರೆ, ಒಂದಿಷ್ಟು ಅಕ್ಕಿ, ಹೆಸರುಬೇಳೆ, ಬೆಲ್ಲ ಪಡೆದುಕೊಂಡು ಅದನ್ನೇ ಬೇಯಿಸಿ ತಿಂದೆವು. ಮರು ದಿನ ಬೆಳಗ್ಗೆ ಬಸ್ ಚಾಲಕನಿಗೆ ಸಮೀಪದ ರೈಲ್ವೆ ನಿಲ್ದಾಣಕ್ಕೆ ಬಿಡುವಂತೆ ಮನವೊಲಿಸಿ ಅಂತೂ ಅಲ್ಲಿಂದ ರೈಲು ಹತ್ತಿ ಊರು ತಲುಪಿದೆವು. 1992 ಡಿಸೆಂಬರ್ 6ರ ಘಟನೆಗೆ ನಾನೂ ಸಾಕ್ಷಿಯಾಗಿದ್ದೆ. ನಾನೂ ನಾಲ್ಕು ಇಟ್ಟಿಗೆ ತೆಗೆದು ಸಂತಸಪಟ್ಟೆ. ‘ಮಂದಿರವಲ್ಲೇ ಕಟ್ಟುವೆವು’ ಎಂಬ ನಮ್ಮ ಘೊಷಣೆ ಸಾಕಾರಗೊಂಡಿದೆ.

1992ರ ಕರಸೇವೆಯಲ್ಲಿ ಭಾಗವಹಿಸಿದ್ದು ನನ್ನ ಜೀವನದಲ್ಲಿ ಮರೆಯಲಾಗದ ಕ್ಷಣ. ಅಂದು ಗುಂಬಜ್ ಮೇಲೆ ಹತ್ತುತ್ತಿದ್ದ ಕರಸೇವಕರನ್ನು ತಡೆಯಲು ಪೊಲೀಸರು ವಿಫಲ ಯತ್ನ ನಡೆಸಿದರು. ಕೆಲವರು ಕೈಯಿಂದಲೇ ಗುಂಬಜ್​ಗೆ ಗುದ್ದತೊಡಗಿದರೆ, ಕೆಲವರು ಸಣ್ಣಪುಟ್ಟ ಕಬ್ಬಿಣದ ತುಂಡುಗಳನ್ನು ತಂದಿದ್ದರು. ಕೆಲ ನಿಮಿಷದಲ್ಲೇ ಗುಂಬಜ್ ನೆಲಕ್ಕುರುಳಿತ್ತು. ಶಿವಮೊಗ್ಗದಿಂದ ಬಿ.ಎಸ್. ಯಡಿಯೂರಪ್ಪ, ಡಿ.ಎಚ್. ಶಂಕರಮೂರ್ತಿ, ನಾನು ಸೇರಿ 30ಕ್ಕೂ ಹೆಚ್ಚು ಮಂದಿ ಭಾಗವಹಿಸಿದ್ದೆವು. ರಾಮಮಂದಿರ ಅದೇ ಜಾಗದಲ್ಲಿ ನಿರ್ವಣವಾಗುತ್ತಿದೆ ಎಂಬ ಸಂಗತಿ ನನ್ನನ್ನು ಪುಳಕಿತನನ್ನಾಗಿಸಿದೆ.

ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ, ಮಾಜಿ ಉಪಪ್ರಧಾನಿ ಲಾಲ್​ಕೃಷ್ಣ ಆಡ್ವಾಣಿ, ಡಾ.ಮುರಳಿ ಮನೋಹರ್ ಜೋಶಿ, ಉಮಾ ಭಾರತಿ ಸೇರಿ ಹಿಂದುಪರ ಸಂಘಟನೆಗಳ ಲಕ್ಷಾಂತರ ಕಾರ್ಯಕರ್ತರು ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ಮಾಣ ಆಗಬೇಕು ಎಂದು ಹೋರಾಟ ನಡೆಸಿದ್ದರು. ಆ ಹೋರಾಟದಲ್ಲಿ ಕೆಲವರ ತ್ಯಾಗ, ಬಲಿದಾನಗಳು ನಡೆದಿವೆ. ಇಂದು ಅಯೋಧ್ಯೆಯಲ್ಲಿ ರಾಮಮಂದಿರ ನಿರ್ವಣಗೊಳ್ಳುತ್ತಿರುವುದು ಸಂತಸದ ವಿಷಯ. ವಿಶ್ವ ಮೆಚ್ಚಿದ ನಾಯಕ ಪ್ರಧಾನಮಂತ್ರಿ ನರೇಂದ್ರ ಮೋದಿ ನೇತೃತ್ವದಲ್ಲಿ ರಾಮಮಂದಿರ ನಿರ್ವಣಕ್ಕೆ ಶಿಲಾನ್ಯಾಸ ನೆರವೇರುತ್ತಿರುವುದು ಸ್ಮರಣೀಯ.

ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ, ಬಿಜೆಪಿ ಭೀಷ್ಮ ಲಾಲ್​ಕೃಷ್ಣ ಆಡ್ವಾಣಿ ನೇತೃತ್ವದಲ್ಲಿ ನಡೆದ ರಥಯಾತ್ರೆ ರಾಮಮಂದಿರ ನಿರ್ವಣಕ್ಕೆ ನಾಂದಿಯಾಯಿತು. 400 ವರ್ಷಗಳ ಬಳಿಕ ಅಯೋಧ್ಯೆಯಲ್ಲಿ ಮಂದಿರ ನಿರ್ವಣಗೊಳ್ಳುತ್ತಿರುವುದು ಕೋಟ್ಯಂತರ ಭಾರತೀಯರಿಗೆ ಹೆಮ್ಮೆಯ ಸಂಗತಿ. ಆ ನಿಟ್ಟಿನಲ್ಲಿ ಆಗಸ್ಟ್ 5 ಐತಿಹಾಸಿಕ ಹಾಗೂ ಸ್ಮರಣೀಯ ದಿನವಾಗಲಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಶಿಲಾನ್ಯಾಸ ಕಾರ್ಯಕ್ರಮ ನಡೆಯಲಿದೆ. ಒಟ್ಟಿನಲ್ಲಿ ಮಹಾತ್ಮ ಗಾಂಧಿಯವರ ಕನಸಿನ ರಾಮರಾಜ್ಯ ಕಟ್ಟುವುದಕ್ಕೆ ನಾವೆಲ್ಲರೂ ಕೈಜೋಡಿಸೋಣ.