ಕ್ರಿಮಿಯಾಕ್ಕೆ ರಷ್ಯಾ ಲಗ್ಗೆ: ಯೂಕ್ರೇನ್ ಬಗ್ಗೆ 2014ರಲ್ಲೇ ಆತಂಕಗೊಂಡ ವ್ಲಾದಿಮಿರ್ ಪುತಿನ್ ಆ ವರ್ಷವೇ ಯೂಕ್ರೇನ್ಗೆ ಸೇರಿದ, ರಷ್ಯನ್ನರೇ ಬಹುಸಂಖ್ಯಾತರಾಗಿದ್ದ ಕ್ರಿಮಿಯಾ ಪರ್ಯಾಯದ್ವೀಪವನ್ನು ಆಕ್ರಮಿಸಿ, ಅದನ್ನು ಸ್ವಾಯತ್ತ ಪ್ರದೇಶ ಎಂದು ಘೋಷಿಸಿದ್ದಾರೆ. ಈ ಭಾಗದ ಕಾವಲಿಗೆ ರಷ್ಯಾ ಸೇನೆಯನ್ನೂ ನಿಯೋಜಿಸಲಾಗಿದೆ. ಹಾಗೆ ಮಾಡದಿದ್ದರೆ ನ್ಯಾಟೋ ಯುದ್ಧನೌಕೆಗಳು ಕಪು್ಪ ಸಮುದ್ರಕ್ಕೆ ಅಂದರೆ ರಷ್ಯಾದ ತೀರಕ್ಕೇ ಬಂದು ಲಂಗರು ಹಾಕುತ್ತಿದ್ದವು ಎಂಬ ಆತಂಕ ಪುತಿನ್ರದ್ದಾಗಿತ್ತು. ಅಮೆರಿಕದಲ್ಲಿ ಡೊನಾಲ್ಡ್ ಟ್ರಂಪ್ ಅಧಿಕಾರಾವಧಿಯಲ್ಲಿ ರಷ್ಯಾ-ಯೂಕ್ರೇನ್ ಆತಂಕ ಸಾಕಷ್ಟು ಮಟ್ಟಿಗೆ ತಗ್ಗಿತ್ತು. ಆದರೆ, ‘ಯೂಕ್ರೇನ್ ನ್ಯಾಟೋಗೆ ಸೇರಲಿದೆ’ ಎಂಬ ಹೇಳಿಕೆಗಳು ಜೋ ಬೈಡೆನ್ ಅಧ್ಯಕ್ಷರಾಗುತ್ತಿದ್ದಂತೆ ಅಮೆರಿಕದಿಂದ ಪದೇಪದೆ ಹೊಮ್ಮಿದವು. ‘ಯೂಕ್ರೇನನ್ನು ನ್ಯಾಟೋಗೆ ಸೇರಿಸಿಕೊಳ್ಳಬೇಡಿ, ರಷ್ಯಾದ ಸುರಕ್ಷೆಗೆ ಅಪಾಯವೊಡ್ಡುವ ಕ್ರಮಗಳಿಗೆ ಮುಂದಾಗಬೇಡಿ’ ಎಂಬ ಪುತಿನ್ ತೀಕ್ಷ್ಣ ಪ್ರತಿಕ್ರಿಯೆಗೆ, ‘ಯೂಕ್ರೇನ್ ಸ್ವತಂತ್ರ ದೇಶ, ತಾನಾಗಿ ಬಯಸಿದರೆ ನ್ಯಾಟೋಗೆ ಸೇರುವ ಹಕ್ಕು ಅದಕ್ಕಿದೆ’ ಎಂದಿತು ಅಮೆರಿಕ.
