ವಿಶ್ವವಿಖ್ಯಾತ ಅಂಬಾವಿಲಾಸ, ಜಗನ್ಮೋಹನ, ಜಯಲಕ್ಷ್ಮೀವಿಲಾಸ ಸೇರಿದಂತೆ ನಗರದಲ್ಲಿ ಇರುವ ಹತ್ತಾರು ಅರಮನೆಗಳು, ಚಾಮುಂಡಿಬೆಟ್ಟ, ಮೃಗಾಲಯ, ಕಬಿನಿ, ಕೆಆರ್ಎಸ್ ಅಣೆಕಟ್ಟೆಗಳು, ಬೈಲುಕುಪ್ಪೆ, ಶ್ರೀರಂಗಪಟ್ಟಣ, ನಂಜನಗೂಡಿನ ಐತಿಹಾಸಿಕ/ಧಾರ್ಮಿಕ ಸ್ಥಳಗಳು, ಬಂಡೀಪುರ, ನಾಗರಹೊಳೆ ಅಭಯಾರಣ್ಯಗಳನ್ನು ಪ್ಯಾಕೇಜ್ ಮೂಲಕ ಪ್ರವಾಸಿಗರಿಗೆ ತೋರಿಸುವ ಕೆಲಸವಾಗಬೇಕು. ಹಳೇ ಮೈಸೂರು ಭಾಗದ ತಾಣಗಳ ಬಗ್ಗೆ ರಾಷ್ಟ್ರೀಯ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚು ಪ್ರಚಾರ ಮಾಡಿ ರೋಡ್ ಮ್ಯಾಪ್ ರೂಪಿಸಲು ಮೈಸೂರು ಕೇಂದ್ರಿತ ಪ್ರವಾಸೋದ್ಯಮ ಸರ್ಕೀಟ್ ರಚಿಸಬೇಕಿದೆ. ದಸರಾ ಮಹೋತ್ಸವ, ಮಾಗಿ ಮೇಳಗಳ ಮಾದರಿಯಲ್ಲಿ ವರ್ಷಪೂರ್ತಿ ನಾನಾ ಕಾರ್ಯಕ್ರಮಗಳನ್ನು ಆಯೋಜಿಸಿ ಪ್ರವಾಸಿಗರನ್ನು ಆಕರ್ಷಿಸಬೇಕಿದೆ. ಮೈಸೂರು ಭಾಗಕ್ಕೆ ಬರುವ ಪ್ರವಾಸಿಗರಿಗೆ ಪ್ಯಾಕೇಜ್ ಮಾದರಿಯಲ್ಲಿ ಇಲ್ಲಿನ ಅರಮನೆಗಳು, ದೇವಸ್ಥಾನಗಳು, ಐತಿಹಾಸಿಕ, ಧಾರ್ಮಿಕ ಮತ್ತು ಪ್ರಕೃತಿ ಸೊಬಗಿನ ಪ್ರವಾಸಿ ತಾಣಗಳನ್ನು ನೋಡುವಂತೆ ಮಾಡಬೇಕಾಗಿದೆ.
