ಭಯ ಸೃಷ್ಟಿಸಿದ ಕಾಡಾನೆಗಳು: ಸ್ವಸ್ಥಾನಕ್ಕೆ ಮರಳಿಸುವಂತೆ ಕೈಲಾಂಚ ಭಾಗದ ಜನರ ಒತ್ತಾಯ

ಕೈಲಾಂಚ : ತೆಂಗಿನಕಲ್ಲು ಅರಣ್ಯದಲ್ಲಿದ್ದ ಆನೆಗಳ ಹಿಂಡು ಕಳೆದ ಎರಡು ಮೂರು ದಿನಗಳಿಂದ ಮೂಲಸ್ಥಾನಕ್ಕೆ ಹಿಂತಿರುಗದೆ ನಂಜಾಪುರ ಗ್ರಾಮಗಳ ಆಸುಪಾಸಿನ ರೈತರ ತೋಟಗಳಲ್ಲಿ ಬೆಳಗಿನ ವೇಳೆ ಕಾಣಿಸಿಕೊಂಡು ಸಾರ್ವಜನಿಕರಲ್ಲಿ ಭಯದ ವಾತಾವರಣ ಮೂಡಿಸಿವೆ.

ಭಾನುವಾರ ಬೆಳಗ್ಗೆ ಬನ್ನಿಕುಪ್ಪೆ-ಅಂಕನಹಳ್ಳಿ ರಸ್ತೆಯಲ್ಲಿ ಒಂದು ಮರಿಯಾನೆ ಸೇರಿ ನಾಲ್ಕು ಕಾಡಾನೆಗಳು ರಸ್ತೆಯಲ್ಲಿ ಸಂಚರಿಸುತ್ತಿದ್ದದ್ದು ಕಂಡುಬಂದಿದೆ. ಇತ್ತೀಚಿಗೆ ಲಕ್ಕೋಜನ ಹಳ್ಳಿ-ನಂಜಾಪುರ ರಸ್ತೆ, ದೇವರದೊಡ್ಡಿ ಗ್ರಾಮ ರೈತರ ಜಮೀನುಗಳಲ್ಲಿ ಆನೆಗಳ ದಾಳಿ ವಿವಿಧ ಬೆಳೆಗಳನ್ನು ನಾಶ ಮಾಡಿದ್ದವು. ಕಳೆದ ವಾರ ತೆಂಗಿನಕಲ್ಲು ಅರಣ್ಯದಂಚಿನ ದೊಡ್ಡನಹಳ್ಳಿಯ ಸತೀಶ್ (35) ಎಂಬ ರೈತನನ್ನು ಆನೆಗಳು ಬಲಿ ಪಡೆದಿದ್ದವು. ಇದರಿಂದ ದನಕರುಗಳನ್ನು ಮೇಯಿಸಲು, ಜಮೀನಿನ ಕಡೆ ಹೋಗಲು ರೈತರು ಭಯಭೀತರಾಗಿದ್ದಾರೆ ಎನ್ನುತ್ತಾರೆ.

ರೈತರ ಫಸಲು ಹಾನಿ : ನಂಜಾಪುರದ ಸದಾನಂದ ಅವರ ತಂಡದಲ್ಲಿ ಶನಿವಾರ ರಾತ್ರಿ 20ಕ್ಕೂ ಹೆಚ್ಚಿನ ಮಾವಿನ ಗಿಡಗಳನ್ನು ಆನೆಗಳು ನಾಶಪಡಿಸಿವೆ. ಇನ್ನು ಹೊಸದೊಡ್ಡಿ ಗೋಪಾಲ್ ಎಂಬ ರೈತರ ನೀರಾವರಿ ಪರಿಕರ, ಮಾವಿನ ಮರಗಳು ಹಾಗೂ ಕವಣಾಪುರದ ಕೆ. ಶಿವಲಿಂಗಯ್ಯ ಎಂಬುವವರ ತೆಂಗಿನಸಸಿ, ಕೃಷಿಹೊಂಡ ಟಾರ್ಪಲ್, ಬೋರ್‌ವೆಲ್ ನೀರಿನ ಪೈಪು, ಬನ್ನಿಕುಪ್ಪೆ ರೈತರ ಮಾವಿನ ಗಿಡ ನಾಶಪಡಿಸಿವೆ.