ಸಂಗೊಳ್ಳಿ ರಾಯಣ್ಣ ತನ್ನ ಶಸ್ತ್ರಾಸ್ತ್ರಗಳನ್ನು ಬದಿಗಿಟ್ಟು ಬೈಲಹೊಂಗಲ ತಾಲೂಕಿನ ನೇಗಿನಹಾಳ ಗ್ರಾಮದ ಹೊರವಲಯದಲ್ಲಿರುವ ಬಾವಿಯಲ್ಲಿ ಸ್ನಾನ ಮಾಡುತ್ತಿದ್ದಾಗ, ನೇಗಿನಹಾಳದ ಸನಾಡೆ ಲಕ್ಕಪ್ಪ ಎಂಬಾತ ಏಕಾಏಕಿಯಾಗಿ ರಾಯಣ್ಣನ ಮೇಲೆರಗಿದ. 10-12 ಜನ ಆತನನ್ನು ಸುತ್ತುವರಿದು ಹಗ್ಗದಿಂದ ಕಟ್ಟಿಹಾಕಿ ಧಾರವಾಡಕ್ಕೆ ಕರೆತಂದರು. ರಾಯಣ್ಣನ ಜೊತೆ 12 ಜನರು ಸಿಕ್ಕಿಬಿದ್ದರು. 12 ಮಂದಿಯಲ್ಲಿ ಐವರು ಬೇಡ ಜನಾಂಗದವರು, ಇಬ್ಬರು ಲಿಂಗಾಯತರು, ತಲಾ ಒಬ್ಬೊಬ್ಬ ಪಂಚಮಸಾಲಿ, ಮುಸ್ಲಿಂ, ಜೈನ, ನಾರ್ವೆಕರ ಸೇರಿದ್ದರು. ರಾಯಣ್ಣ ಸ್ವತಃ ಕುರುಬ ಜಾತಿಗೆ ಸೇರಿದವನಾಗಿದ್ದ. ಅವನೊಂದಿಗೆ ಭೋವಿ ಜಾತಿಯವರಲ್ಲದೆ, ಸಿದ್ದಿ ಜನಾಂಗದವರು ಇದ್ದರು. ಕಿತ್ತೂರಿನ ಪಶ್ಚಿಮ ಭಾಗದಲ್ಲಿ ವಾಸಿಸುತ್ತಿದ್ದ ಈ ಸಿದ್ದಿಗಳು ರಾಯಣ್ಣನ ಅಂಗರಕ್ಷಕರಾಗಿದ್ದರು. ಗಜವೀರಾ ಎಂಬ ಸಿದ್ದಿಯಂತೂ ರಾಯಣ್ಣನ ಸಾವಿನ ಸುದ್ದಿಕೇಳಿ ಆತ್ಮಹತ್ಯೆ ಮಾಡಿಕೊಂಡ ಎಂಬುದು ಇತಿಹಾಸ ಪುಟಗಳಿಂದ ತಿಳಿದು ಬರುತ್ತಿದೆ. ನ್ಯಾಯಾಲಯದಲ್ಲಿ ನಿರಪರಾಧಿ ಎಂದು ತೀರ್ವನವಾದರೂ, ಆತನನ್ನು ಗಲ್ಲಿಗೇರಿಸದಿದ್ದರೆ ತಮಗೆ ಉಳಿಗಾಲವಿಲ್ಲ ಎಂದು ಕಿತ್ತೂರ ಪ್ರಾಂತ್ಯದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಬ್ರಿಟಿಷ್ ಅಧಿಕಾರಿಗಳ ಭಾವನೆ ಹಾಗೂ ರಾಯಣ್ಣನನ್ನು ಮೋಸದಿಂದ ಹಿಡಿದುಕೊಟ್ಟವರ ಒತ್ತಾಯದಿಂದಾಗಿ ಬ್ರಿಟಿಷ್ ಉನ್ನತ ಅಧಿಕಾರಿಗಳು ಆತನನ್ನು ಗಲ್ಲಿಗೇರಿಸಲು ತೀರ್ವನಿಸಿದರು.
