ಮೈಸೂರಿನ ಎಪಿಎಂಸಿಯು ಕೃಷಿ ಉತ್ಪನ್ನಗಳನ್ನು ಮಾರಾಟ ಮಾಡುವ ಬಹಳ ದೊಡ್ಡ ಮಟ್ಟದ ಕೇಂದ್ರವಾಗಿದೆ. ಇಲ್ಲಿಗೆ ಪ್ರತಿನಿತ್ಯ ಸಾವಿರಾರು ಟನ್ ದಿನಸಿ ಪದಾರ್ಥಗಳು, ತರಕಾರಿ ಬರುತ್ತದೆ. ಇದರಿಂದಾಗಿ ಇಲ್ಲಿ ಕಸ ಹಾಗೂ ತ್ಯಾಜ್ಯ ಟನ್ ಗಟ್ಟಲೆ ರಾಶಿಯಾಗುತ್ತದೆ. ಇದಲ್ಲದೇ ಕೆಲವೊಂದು ಸಲ ಸರಿಯಾದ ಧಾರಣೆ ಸಿಗದೇ ಇದ್ದ ಸಮಯದಲ್ಲಿ ರೈತರು ಲೋಡುಗಟ್ಟಲೆ ಟೊಮೇಟೋ, ಎಲೆ ಕೋಸು ಸೇರಿದಂತೆ ಇನ್ನಿತರ ತರಕಾರಿಯನ್ನು ಸ್ಥಳದಲ್ಲಿ ಚೆಲ್ಲಿ ಹೋಗುತ್ತಾರೆ. ಇದು ಕೊಳೆತು ದುರ್ವಾಸನೆ ಬೀರುವುದರಿಂದ ಆವರಣದಲ್ಲಿ ವಾತಾವರಣ ಕಲುಷಿತಗೊಳ್ಳುತ್ತದೆ. ಇಂತಹ ಸಂದರ್ಭದಲ್ಲಿ ಮಳೆ ಬಿದ್ದರೆ ಸಾಕು ಕೊಳೆತ ತರಕಾರಿ ಮೋರಿಗಳಲ್ಲಿ ನೀರಿನ ಹರಿವನ್ನು ತಡೆದು ಬಿಡುತ್ತದೆ. ಇದು ತ್ಯಾಜ್ಯವನ್ನು ಸ್ವಚ್ಛ ಮಾಡುವವರಿಗೆ ಕಿರಿಕಿರಿಯನ್ನು ಉಂಟು ಮಾಡುತ್ತದೆ. ಹೀಗಾಗಿ ಪ್ರತಿನಿತ್ಯ ಮಾರುಕಟ್ಟೆಯಲ್ಲಿ ಉತ್ಪಾದನೆಯಾಗುವ ಕೃಷಿ ತ್ಯಾಜ್ಯವನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡುವ ಮೂಲಕ ಇಡೀ ಎಪಿಎಂಸಿಯನ್ನು ಕಸ ಮುಕ್ತ ಮಾರುಕಟ್ಟೆಯನ್ನಾಗಿ ಪರಿವರ್ತಿಸಲು ಈ ಯೋಜನೆ ರೂಪಿಸಲಾಗಿದೆ.
