ಪಿಎಂಶ್ರೀ ಯೋಜನೆಗೆ ಜಿಲ್ಲೆಯ 14 ಶಾಲೆಗಳು ಆಯ್ಕೆ

ಸರ್ಕಾರಿ ಶಾಲೆಗಳ ಸರ್ವಾಂಗೀಣ ಅಭಿವೃದ್ಧಿಗೆ ಉತ್ತೇಜನ ನೀಡುವ ‘ಪ್ರಧಾನ ಮಂತ್ರಿ ಸ್ಕೂಲ್ ಆ್ ರೈಸಿಂಗ್ ಇಂಡಿಯಾ’ (ಪಿಎಂಶ್ರೀ) ಯೋಜನೆಗೆ ಮೈಸೂರು ಜಿಲ್ಲೆಯ 14 ಶಾಲೆಗಳು ಆಯ್ಕೆಯಾಗಿದ್ದು, ಗುಣಮಟ್ಟದ ಶಿಕ್ಷಣಕ್ಕೆ ಸಹಕಾರಿಯಾಗಿದೆ.

ಕೇಂದ್ರ ಸರಕಾರದ ಮಹತ್ವಾಕಾಂಕ್ಷಿ ಯೋಜನೆಗಳಲ್ಲಿ ಒಂದಾದ ಪಿಎಂಶ್ರೀ ಯೋಜನೆಯಡಿ ಜಿಲ್ಲೆಯಲ್ಲಿ 2022-23ನೇ ಸಾಲಿನಲ್ಲಿ 8 ಶಾಲೆಗಳು ಹಾಗೂ 2023-24ರಲ್ಲಿ 4 ಶಾಲೆಗಳು, ಇದೀಗ 2024-25ನೇ ಸಾಲಿನಲ್ಲಿ 2 ಶಾಲೆಗಳು ಆಯ್ಕೆಯಾಗಿವೆ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಸರಕಾರಿ ಶಾಲೆಗಳು ಆಯ್ಕೆಯಾಗುವ ನಿರೀಕ್ಷೆ ಇದೆ. ಕೇಂದ್ರದಿಂದ ಈಗಾಗಲೇ 1.53 ಕೋಟಿ ರೂ. ಅನುದಾನ ಬಂದಿದ್ದು, ಇದು ಶಾಲೆಗಳಿಗೆ ಮತ್ತಷ್ಟು ಸೌಲಭ್ಯ ಕಲ್ಪಿಸಲು ಸಹಕಾರಿಯಾಗಲಿದೆ.

ಏನಿದು ಯೋಜನೆ?

ಪಿಎಂಶ್ರೀ ಯೋಜನೆಯಡಿ ದೇಶದ ಒಟ್ಟು 14,500 ಶಾಲೆಗಳನ್ನು ಆಯ್ಕೆ ಮಾಡಲಾಗಿದೆ. ರಾಷ್ಟ್ರೀಯ ಶಿಕ್ಷಣ ನೀತಿ ಅನ್ವಯ ಶಾಲೆಗಳನ್ನು ಮೇಲ್ದರ್ಜೆಗೇರಿಸಿ ಅಭಿವೃದ್ಧಿಪಡಿಸುವುದು ಯೋಜನೆಯ ಆಶಯವಾಗಿದೆ. ಅತ್ಯಾಧುನಿಕ ಮಾದರಿಯಲ್ಲಿ ಮಕ್ಕಳಿಗೆ ಬೋಧನಾ ಸೌಲಭ್ಯ ಕಲ್ಪಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶ. ಇದರಿಂದ ನಾನಾ ಸೌಲಭ್ಯಗಳೊಂದಿಗೆ ಗುಣಮಟ್ಟದ ಶಿಕ್ಷಣ ವಿದ್ಯಾರ್ಥಿಗಳಿಗೆ ಸಿಗಲಿದೆ. ಪ್ರಾಥಮಿಕ, ಮಾಧ್ಯಮಿಕ ಹಾಗೂ ಹಿರಿಯ ಮಾಧ್ಯಮಿಕ ಶಾಲೆಗಳನ್ನು ಈ ಯೋಜನೆಯಡಿ ಆಯ್ಕೆಗೆ ಪರಿಗಣಿಸಲಾಗುತ್ತದೆ.

ಆಯ್ಕೆ ಹೇಗೆ?:

ಸರಕಾರಿ ಶಾಲೆಯ ಸ್ಥಿತಿಗತಿಯನ್ನು ಗಮನಿಸಿ ಪಿಎಂಶ್ರೀ ಯೋಜನೆಗೆ ಆಯ್ಕೆ ಮಾಡಲಾಗುತ್ತದೆ. ಶಾಲೆ ಇರುವ ಊರಿನ ಸಾಕ್ಷರತೆ ಪ್ರಮಾಣ, ಶಾಲೆಯಲ್ಲಿ ಹೆಣ್ಣು ಮಕ್ಕಳು ಎಷ್ಟಿದ್ದಾರೆ? ಜನಸಂಖ್ಯೆ ಎಷ್ಟಿದೆ? ಶಾಲೆ ಯಾವ ಸ್ಥಿತಿಯಲ್ಲಿದೆ ಎಂಬಿತ್ಯಾದಿ ಅಂಶಗಳನ್ನು ಪರಿಗಣಿಸಲಾಗುತ್ತದೆ. ಶಾಲೆಗಳು ಸುಸ್ಥಿತಿಯ ಸ್ವಂತ ಕಟ್ಟಡ ಹೊಂದಿರಬೇಕು. ಸುರಕ್ಷತೆಯ ತಡೆಗೋಡೆ, ಅಗ್ನಿ ಸುರಕ್ಷತೆ, ಹೆಚ್ಚಿನ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ದಾಖಲಾಗಿರಬೇಕು. ಬಾಲಕ-ಬಾಲಕಿಯರಿಗೆ ಪ್ರತ್ಯೇಕ ಶೌಚಗೃಹ ಇರಬೇಕು. ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಹೊಂದಿರಬೇಕು. ಇದೆಲ್ಲಾ ಇರುವ ಶಾಲೆಯನ್ನು ಪಿಎಂಶ್ರೀ ಯೋಜನೆಗೆ ಆಯ್ಕೆ ಮಾಡಲಾಗುತ್ತದೆ.

ಏನೆಲ್ಲಾ ಪ್ರಯೋಜನ?

ಪಿಎಂಶ್ರೀ ಯೋಜನೆಯಡಿ ಪ್ರತಿ ಶಾಲೆಗೆ 40 ರಿಂದ 50 ಲಕ್ಷ ರೂ. ಅನುದಾನ ಸಿಗುತ್ತದೆ. ಇದರಿಂದ ಶಾಲೆಗಳ ಸಣ್ಣಪುಟ್ಟ ರಿಪೇರಿ ಕೆಲಸ ಮಾಡಿಕೊಳ್ಳಬಹುದು. ಕಂಪ್ಯೂಟರ್‌ಗಳನ್ನು ಖರೀದಿಸಬಹುದು. ಶೌಚಗೃಹಗಳನ್ನು ನಿರ್ವಹಣೆ ಮಾಡಿಕೊಳ್ಳಬಹುದು. ಎಲ್‌ಕೆಜಿ ಮತ್ತು ಯುಕೆಜಿ ಪ್ರಾರಂಭಿಸಬೇಕು. ಪ್ರಯೋಗಾಲಯಗಳನ್ನು ಆರಂಭಿಸಬೇಕು. ಜತೆಗೆ ಹೆಣ್ಣು ಮಕ್ಕಳಿಗೆ ಸ್ವಯಂ ರಕ್ಷಣೆಗೆ ಸಾರಿಗೆ ಭತ್ಯೆ, ಪೀಠೋಪಕರಣ, ಸಿರಿಧಾನ್ಯ ವಿತರಣೆ, ಶಾಲಾ ಕೈತೋಟ, ಹನಿ ನೀರಾವರಿ ನಿರ್ವಹಣೆಗೆ ಈ ಅನುದಾನ ಬಳಕೆ ಮಾಡಿಕೊಳ್ಳಬಹುದು.

ಯಾವೆಲ್ಲಾ ಶಾಲೆಗಳು ಆಯ್ಕೆ

*ಜಿಎಚ್‌ಪಿಎಸ್ ಕುಂಬಾರ ಕೊಪ್ಪಲು, ಮೈಸೂರು ಉತ್ತರ

*ಜಿಎಚ್‌ಪಿಎಸ್ ಚಿಕ್ಕೆರೆಯೂರು, ಎಚ್.ಡಿ.ಕೋಟೆ

*ಜಿಎಚ್‌ಪಿಎಸ್ ಮುಳ್ಳೂರು, ಎಚ್.ಡಿ.ಕೋಟೆ

*ಬಿಳಿಕೆರೆ ಹುಣಸೂರು

*ಜಿಎಚ್‌ಪಿಎಸ್ ಬಾಲಕರ ಶಾಲೆ, ಸಾಲಿಗ್ರಾಮ

*ಕೆಪಿಎಸ್ ಸಿದ್ದರಾಮನಹುಂಡಿ, ಮೈಸೂರು ತಾಲೂಕು

*ಕಳಲೆ ನಂಜನಗೂಡು ತಾಲೂಕು

*ಜಿಎಚ್‌ಪಿಎಸ್ ಕಿರನಲ್ಲಿ ಪಿರಿಯಾಪಟ್ಟಣ

*ತುಂಬಾಲ ತಿ.ನರಸೀಪುರ

*ಜಿಎಚ್‌ಪಿಎಸ್ ರಂಗನಾಥ ಬಡಾವಣೆ ಹುಣಸೂರು

*ಜಿಎಚ್‌ಪಿಎಸ್ ಹೊಸಕೋಟೆ ಸಾಲಿಗ್ರಾಮ

*ಜಿಎಚ್‌ಪಿಎಸ್ ಹಿಟ್ನೆ ಹೆಬ್ಬಾಗಿಲು ಪಿರಿಯಾಪಟ್ಟಣ

*ಜಿಎಚ್‌ಪಿಎಸ್ ಪಿರಿಯಾಪಟ್ಟಣ ಟೌನ್

*ಜಿಎಚ್‌ಪಿಎಸ್ 5ನೇ ವಾರ್ಡ್ ತಿ.ನರಸೀಪುರ, ಜಿಎಚ್‌ಪಿಎಸ್ ನಾಗಮ್ಮ ನಂಜನಗೂಡು