ಟಿಬೆಟಿಯನ್ನರಿಂದ ಪ್ರತಿಭಟನಾ ಮೆರವಣಿಗೆ

ರೀಜನಲ್ ಟಿಬೆಟಿಯನ್ಸ್ ವುಮೆನ್ಸ್ ಅಸೋಸಿಯೇಷನ್ ವತಿಯಿಂದ 66ನೇ ರಾಷ್ಟ್ರೀಯ ದಂಗೆಯ ದಿನಾಚರಣೆ ಅಂಗವಾಗಿ ಟಿಬೆಟ್ ಮೇಲೆ ಚೀನಾ ದಾಳಿ ಖಂಡಿಸಿ ಬುಧವಾರ ಪ್ರತಿಭಟನಾ ಮೆರವಣಿಗೆ ನಡೆಸಲಾಯಿತು.

ನಗರದ ಕೋಟೆ ಆಂಜನೇಯಸ್ವಾಮಿ ದೇವಸ್ಥಾನದಿಂದ ಆರಂಭವಾದ ಪ್ರತಿಭಟನಾ ಮೆರವಣಿಗೆ ಕ್ರಾಫರ್ಡ್ ಹಾಲ್ ಮುಂಭಾಗದ ಓವಲ್ ಮೈದಾನದಲ್ಲಿ ಅಂತ್ಯವಾಯಿತು. ಬಳಿಕ ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ ಮನವಿ ಪತ್ರ ಸಲ್ಲಿಸಿದರು.

ಟಿಬೆಟ್ ಮತ್ತು ಅದರ ಜನರ ಕಾರಣಕ್ಕಾಗಿ ತಮ್ಮ ಅಮೂಲ್ಯ ಜೀವನ ತ್ಯಾಗ ಮಾಡುವ ಧೈರ್ಯಶಾಲಿ ಹುತಾತ್ಮರಿಗೆ ಗೌರವ ಸಲ್ಲಿಸಲು 1959ರಿಂದ ಟಿಬೆಟಿಯನ್ ಮಹಿಳೆಯರ 66ನೇ ದಂಗೆ ಸ್ಮರಿಸಲಾಗುತ್ತಿದೆ. ಟಿಬೆಟ್ 1959ಕ್ಕಿಂತ ಮೊದಲು ಶಾಂತಿಯುತ ದೇಶ. ಮಾ.10, 1959ರಲ್ಲಿ ಕಮ್ಯುನಿಸ್ಟ್ ಚೀನಿಯರು ಟಿಬೆಟ್ ಆಕ್ರಮಿಸಿಕೊಂಡರು. ಇಂದು ಇಡೀ ರಾಷ್ಟ್ರ ಚೀನಾ ಸರ್ಕಾರದ ಅಡಿಯಲ್ಲಿ ಬಳಲುತ್ತಿದೆ, ಕಮ್ಯುನಿಸ್ಟ್ ನಾಯಕರು ಟಿಬೆಟಿಯನ್ ಜನಾಂಗವನ್ನು ನಿರ್ಮೂಲನೆ ಮಾಡಲು ನಿರ್ಧರಿಸಿದ್ದಾರೆ ಎಂದು ಕಿಡಿಕಾರಿದರು.

ಚೀನಾ ನಿರಂತರ, ಉದ್ದೇಶಪೂರ್ವಕವಾಗಿ ಟಿಬೆಟಿಯನ್ ಜನರ ಮಾನವ ಹಕ್ಕನ್ನು ಕಸಿದುಕೊಳ್ಳುತ್ತಿದ್ದಾರೆ. ಚೀನಾ ಯಾವಾಗಲೂ ಟಿಬೆಟಿಯನ್ ಸಂಸ್ಕೃತಿ, ಭಾಷೆ ಮತ್ತು ಧರ್ಮವನ್ನು ನಿರ್ಮೂಲನೆ ಮಾಡುತ್ತಿದೆ. ಟಿಬೆಟ್‌ನಲ್ಲಿ ಚೀನಾದ ಉದ್ಯೋಗದಿಂದಾಗಿ, ಆವಾಸಸ್ಥಾನ ವಿನಾಶದಿಂದಾಗಿ ಅನೇಕ ಪ್ರಾಣಿಗಳು ಅಪಾಯಕ್ಕೆ ಸಿಲುಕಿವೆ. ಅಲೆಮಾರಿಗಳು ತಮ್ಮ ಭೂಮಿ ಬಿಡಲು ಒತ್ತಾಯಿಸುತ್ತಿದ್ದಾರೆ. ಇದರಿಂದಾಗಿ ಮೂಲ ಟಿಬೆಟಿಯನ್ನರು ಸಮಸ್ಯೆ ಎದುರಿಸುತ್ತಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಬೇಡಿಕೆಗಳು:

ಯುನೈಟೆಡ್ ನೇಷನ್ ಮತ್ತು ವಿಶ್ವ ನಾಯಕರು ಸಂಬಂಧಪಟ್ಟ ಚೀನಾದ ನಾಯಕರೊಂದಿಗೆ ಮಾತುಕತೆ ನಡೆಸಬೇಕು. 14ನೇ ದಲೈ ಲಾಮಾ ಅವರ ಸಂಧಾನದ ಮೂಲಕ ಸಮಸ್ಯೆ ಬಗೆಹರಿಸಬೇಕು. ಕಮ್ಯುನಿಸ್ಟ್ ನಾಯಕರು ಮಾನವ ಹಕ್ಕುಗಳ ಉಲ್ಲಂಘನೆ ಮತ್ತು ಟಿಬೆಟ್‌ನಲ್ಲಿ ಪತ್ರಿಕಾ ಸ್ವಾತಂತ್ರೃಹರಣ ನಿಲ್ಲಿಸಬೇಕು. ಯುನೈಟೆಡ್ ನೇಷನ್ ಸಮಿತಿ 11ನೇ ಪ್ಯಾಂಚೆನ್ ಲಾಮಾ ಅವರನ್ನು ಹುಡುಕಬೇಕು. ಟಿಬೆಟ್‌ನಲ್ಲಿ ಧಾರ್ಮಿಕ ಸ್ವಾತಂತ್ರೃ ರಕ್ಷಿಸಬೇಕೆಂದು ಒತ್ತಾಯಿಸಿದರು.

ಮೆರವಣಿಗೆಯಲ್ಲಿ ಅಧ್ಯಕ್ಷೆ ತ್ಸೆರಿಂಗ್ ಚೂಡೆನ್ ಸೇರಿದಂತೆ ಹಲವರು ಭಾಗವಹಿಸಿದ್ದರು.