ಜಿಲ್ಲೆಯ ಜೀವನದಿ ಕಬಿನಿ ಜಲಾಶಯ ನಿರ್ಮಾಣ ಸಂದರ್ಭದಲ್ಲಿ ಭೂಮಿ ಕಳೆದುಕೊಂಡ ಕೆಂಚನಹಳ್ಳಿ ಗ್ರಾಮದ ನೂರಾರು ರೈತರು ಪುನರ್ವಸತಿ ನಂತರ ಭೂಮಿ ಸಿಗದೆ ಅತಂತ್ರರಾಗಿದ್ದಾರೆ. ಕೆಂಚನಹಳ್ಳಿ ಸ.ನಂ.ನಲ್ಲಿ ಕಬಿನಿ ಜಲಾಶಯಕ್ಕೆ ಭೂಮಿ ಕಳೆದು ಕೊಂಡವರಿಗೆ ಪುನರ್ವಸತಿ ಕಲ್ಪಿಸಲು ಕಂದಾಯ ಇಲಾಖೆ ಅರಣ್ಯ ಇಲಾಖೆಯಿಂದ 1070 ಎಕರೆ ಭೂಮಿಯನ್ನು ದಾಖಲೆ ಪ್ರಕಾರ ಹಸ್ತಾಂತರ ಮಾಡಿಕೊಂಡು ರೈತರಿಗೆ ಸಾಗುವಳಿ ನೀಡಿತು. ಅದರೆ, ವಾಸ್ತವವಾಗಿ ಕೇವಲ 740 ಎಕರೆ ಭೂಮಿಯನ್ನು ಅರಣ್ಯ ಇಲಾಖೆ ನೀಡಿ 330 ಎಕರೆ ಜಮೀನು ನೀಡದೆ ಕಂದಾಯ ಮತ್ತು ಅರಣ್ಯ ಇಲಾಖೆಯ ಗುದ್ದಾಟದಿಂದ ಭೂಮಿ ಕಳೆದುಕೊಂಡ ರೈತರು ಅರಣ್ಯ ಇಲಾಖೆ ವಿರುದ್ಧ ಹೋರಾಟ ಮಾಡಿ ಜೈಲು ಸೇರಿದ ಪ್ರಕರಣ ನಡೆದರೂ ಭೂಮಿ ಸಿಗದೆ ಅತಂತ್ರರಾಗಿದ್ದಾರೆ. ನಿರಂತರ ಹೋರಾಟದ ಫಲವಾಗಿ ಕಂದಾಯ ಇಲಾಖೆ ಹಾಗೂ ಅರಣ್ಯ ಇಲಾಖೆ ಜಂಟಿ ಸರ್ವೇ ಮಾಡಿದ ನಂತರ ಈಗ ಒಂದು ಹಂತಕ್ಕೆ ಬಂದಿದ್ದು, ಕಂದಾಯ ಸಚಿವರ ಗ್ರಾಮ ವಾಸ್ತವ್ಯದ ಮೂಲಕ ಹಲವು ವರ್ಷಗಳ ಸಮಸ್ಯೆಗೆ ಮುಕ್ತಿ ಸಿಕ್ಕಿ ನಿರಾಶ್ರಿತರ ಮುಖದಲ್ಲಿ ನಗು ಕಾಣಲಿದೆ.
ಅದೇ ರೀತಿ ಕೊಹಳ ಗ್ರಾಮದ ರೈತರ ಸಮಸ್ಯೆ ಕೂಡ ಇದೇ ಆಗಿದ್ದು, ಕಂದಾಯ ಇಲಾಖೆಗೆ ಸೇರಿದ 364 ಎಕರೆ ಜಮೀನಿಗೆ ರೈತರು ಸಾಗುವಳಿ ಪಡೆಯಲು ಅರ್ಜಿ ಸಲ್ಲಿಸಿದ್ದಾರೆ. ಆದರೆ, ಅರಣ್ಯ ಇಲಾಖೆ ಈ ಜಾಗ ನಮಗೆ ಸೇರಿದ್ದು ಎಂದು ತಡೆ ಒಡ್ಡಿದ್ದು, ಈ ವಿಚಾರ ಕೂಡ ಚರ್ಚೆ ಆಗಲಿದೆ. ಈ ಸಮಸ್ಯೆ ಬಗೆಹರಿದರೆ ನೂರಾರು ರೈತರು ನಿಟ್ಟುಸಿರು ಬಿಡಲಿದ್ದಾರೆ.
