ವಿಜಯಪುರ : ಜಿಲ್ಲೆಯಲ್ಲಿ ಮತ್ತೆ ಕರೊನಾ ಸೋಂಕಿತರ ಸಂಖ್ಯೆ ಹೆಚ್ಚಳಗೊಂಡಿದೆ. ಬುಧವಾರ 37 ಜನರಿಗೆ ಕೋವಿಡ್ ಪಾಸಿಟಿವ್ ದೃಢವಾಗಿದೆ. ಇನ್ನೂ ವಸತಿ ಶಾಲೆಗೂ ಮಹಾಮಾರಿ ವಕ್ಕರಿಸಿದ್ದು, ಶಾಲೆ-ಕಾಲೇಜು ವಿದ್ಯಾರ್ಥಿಗಳಲ್ಲಿ ಆತಂಕ ಮೂಡಿಸಿದೆ. ಇಂಡಿ ತಾಲೂಕಿನ ಮರಗೂರಿನ ಮುರಾರ್ಜಿ ವಸತಿ ಶಾಲೆಯಲ್ಲಿ ಮೂವರು ವಿದ್ಯಾರ್ಥಿನಿಯರಿಗೆ ಕರೊನಾ ಸೋಂಕು ದೃಢವಾಗಿದೆ. ಈ ವರೆಗೆ 14,857 ಜನರಿಗೆ ಸೋಂಕು ತಗುಲಿದೆ. ಇನ್ನೂ ಬುಧವಾರ 8 ಜನರು ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದು, ಈ ವರೆಗೆ 14,456 ಜನರು ಗುಣಮುಖರಾಗಿದ್ದಾರೆ. ಒಟ್ಟು 3,59,325 ಜನರ ಗಂಟಲುದ್ರವ ಪರೀಕ್ಷಿಸಲಾಗಿದ್ದು, ಅದರಲ್ಲಿ 3,42,126 ಜನರ ವರದಿ ನೆಗೆಟಿವ್ ಬಂದಿದೆ. * ವಿಜಯಪುರ ನಗರದಲ್ಲೇ ಹೆಚ್ಚು ಜಿಲ್ಲೆಯಲ್ಲಿ ಪ್ರತಿದಿನ ಕರೊನಾ ಸೋಂಕಿತರ ಸಂಖ್ಯೆ ಹೆಚ್ಚುತ್ತಿದ್ದು, ಅದರಲ್ಲಿ ವಿಜಯಪುರ ನಗರ ಮುಂಚೂಣಿಯಲ್ಲಿದೆ. ವಿಜಯಪುರ ತಾಲೂಕಿನಲ್ಲಿ ಈ ವರೆಗೆ 5,928, ಬಬಲೇಶ್ವರ 214, ತಿಕೋಟಾ 227, ಬ.ಬಾಗೇವಾಡಿ 1,501, ಕೊಲ್ಹಾರ 478, ನಿಡಗುಂದಿ 221, ಇಂಡಿ 1,376, ಚಡಚಣ 176, ಮುದ್ದೇಬಿಹಾಳ 1,980, ತಾಳಿಕೋಟೆ 584, ಸಿಂದಗಿ 1,589, ದೇವರ ಹಿಪ್ಪರಗಿ 141, ಇತರ ಜಿಲ್ಲೆಯ 442 ಜನರಿಗೆ ಕೋವಿಡ್ ಸೋಂಕು ದೃಢವಾಗಿದೆ ಎಂದು ಜಿಲ್ಲಾಡಳಿತ ಮಾಹಿತಿ ನೀಡಿದೆ.
