ಪ್ರಧಾನಿ ಮೋದಿ, ಕೇಂದ್ರ ಗೃಹ ಸಚಿವ ಅಮಿತ್ ಷಾ ಸೇರಿ 200 ಅತಿಗಣ್ಯರು, ಕರ್ನಾಟಕ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಸಹಿತ ಬಿಜೆಪಿ ಆಡಳಿತವಿರುವ ರಾಜ್ಯಗಳ ಎಲ್ಲ ಸಿಎಂಗಳು, 50,000ಕ್ಕೂ ಹೆಚ್ಚು ಬಿಜೆಪಿ ಕಾರ್ಯಕರ್ತರು ಮತ್ತು ಸರ್ಕಾರದ ವಿವಿಧ ಯೋಜನೆಗಳ ಫಲಾನುಭವಿಗಳು ಈ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು. ಯೋಗಿ ಸರ್ಕಾರದ ಸಚಿವರ ಪಟ್ಟಿಯಲ್ಲಿ ಒಟ್ಟು 52 ಹೆಸರುಗಳಿದ್ದು, ಕೇಂದ್ರ ನಾಯಕತ್ವ ಈ ಪಟ್ಟಿಗೆ ಇನ್ನೂ ಹಲವು ಹೆಸರುಗಳನ್ನು ಸೇರಿಸುವ ಸಾಧ್ಯತೆಯಿದೆ. 52 ಮಂದಿಯ ಹೊಸ ಸಂಪುಟದಲ್ಲಿ 32 ಹೊಸ ಮುಖಗಳಿಗೆ ಅವಕಾಶ ಸಿಕ್ಕಿರುವುದು ವಿಶೇಷ. ಈ ಮಧ್ಯೆ ಪಕ್ಷದ ಹಲವು ಪ್ರಮುಖ ನಾಯಕರಿಗೆ ಸಂಪುಟದಲ್ಲಿ ಸ್ಥಾನ ಸಿಗದಿರುವುದು ಅಚ್ಚರಿಗೆ ಕಾರಣವಾಗಿದೆ. ವಿದ್ಯುತ್ ಸಚಿವರಾಗಿದ್ದ ಮಥುರಾ ಕ್ಷೇತ್ರದ ಶಾಸಕ ಶ್ರೀಕಾಂತ್ ಶರ್ಮ, ಸಿದ್ಧಾರ್ಥನಾಥ ಸಿಂಗ್ರನ್ನು ಕೈಬಿಡಲಾಗಿದೆ. ಕೈಗಾರಿಕೆ ಸಚಿವರಾಗಿದ್ದ ಮಹಾರಾಜಪುರದಿಂದ ಆಯ್ಕೆಯಾಗಿದ್ದ ಸತೀಶ್ ಮಹಾನಾ, ಗೊಂಡಾ ಜಿಲ್ಲೆಯ ಮಂಕಾಪುರದ ಶಾಸಕ ರಮಾಪತಿ ಶಾಸ್ತ್ರಿ ಹೆಸರೂ ಪಟ್ಟಿಯಲ್ಲಿಲ್ಲ. ಈ ಮಧ್ಯೆ, ಯುಪಿ ಬಿಜೆಪಿ ಅಧ್ಯಕ್ಷ ಸ್ವತಂತ್ರ ದೇವ್ ಸಿಂಗ್ ಕ್ಯಾಬಿನೆಟ್ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸುವುದರಿಂದ, ಹೊಸ ಅಧ್ಯಕ್ಷರ ನೇಮಕವಾಗುವ ಸಾಧ್ಯತೆಯಿದೆ.
