ಚೀನಾ ನಿರ್ಮಿತ ಝೂಮ್​ ಆ್ಯಪ್​ ಬಳಕೆದಾರರಿಗೆ ಸರ್ಕಾರ ನೀಡಿರುವ ಎಚ್ಚರಿಕೆಗಳೇನು?

ನವದೆಹಲಿ: ಸದ್ಯ ದೇಶದೆಲ್ಲೆಡೆ ಶೈಕ್ಷಣಿಕ ಚಟುವಟಿಕೆಗಳು ಸ್ತಬ್ಧಗೊಂಡಿವೆ. ವಿದ್ಯಾರ್ಥಿಗಳಿಗೆ ಆನ್​ಲೈನ್​ ಮೂಲಕ ಪಾಠ ಮಾಡಲು ಬೋಧಕರಿಗೆ ಸೂಚಿಸಲಾಗುತ್ತಿದೆ. ಇದಲ್ಲದೇ, ಹಲವು ಸಂಘ-ಸಂಸ್ಥೆಗಳು ಸಿಬ್ಬಂದಿಗೆ ವರ್ಕ್​ ಫ್ರಾಮ್​ ಹೋಮ್​ ನೀಡಿವೆ. ಅವರೊಂದಿಗೆ ಸಂಪರ್ಕದಲ್ಲಿರಲು ಹೆಚ್ಚಾಗಿ ವಿಡಿಯೋ ಕಾನ್ಫ್​​ರೆನ್ಸಿಂಗ್​ ಆ್ಯಪ್​ಗಳನ್ನು ಬಳಸಲಾಗುತ್ತದೆ. ಅವುಗಳಲ್ಲಿ ಹೆಚ್ಚು ಬಳಕೆಯಲ್ಲಿರುವುದು ಚೀನಾ ನಿರ್ಮಿತ ಝೂಮ್​ ಆ್ಯಪ್​.

ಇದೀಗ ಝೂಮ್ ಬಳಕೆದಾರರಿಗೆ ಸರ್ಕಾರ ಶಾಕಿಂಗ್​ ನ್ಯೂಸ್​ ನೀಡಿದೆ. ಜೂಮ್​ ಆ್ಯಪ್​ ಸುರಕ್ಷಿತವಲ್ಲ, ಅದರಲ್ಲೂ ಸರ್ಕಾರಿ ಉದ್ದೇಶ ಅಥವಾ ಕರ್ತವ್ಯಗಳಿಗೆ ಇದನ್ನು ಬಳಸುವಂತೆಯೇ ಇಲ್ಲ ಎಂದು ಸರ್ಕಾರಿ ಅಧಿಕಾರಿಗಳಿಗೆ ಕಟ್ಟುನಿಟ್ಟಾಗಿ ತಿಳಿಸಿದೆ.

ಹೌದು, ಝೂಮ್​ ಆ್ಯಪ್​ನಲ್ಲಿದ್ದ ಪಾಸ್​ವರ್ಡ್​ಗಳು ಸೋರಿಕೆಯಾಗಿವೆ, ಕಾನ್ಫ್​ರೆನ್ಸಿಂಗ್​ ನಡೆಸುತ್ತಿರುವಾಗಲೇ ಹ್ಯಾಕ್​ ಮಾಡಲಾಗುತ್ತಿದೆ ಎಂಬ ವರದಿಗಳು ಬಂದ ಬಳಿಕವಂತೂ ಇದರ ಬಗ್ಗೆ ಹೆಚ್ಚು ಜಾಗೃತೆ ವಹಿಸುವಂತೆ ಸೂಚಿಸಿದೆ.

ಇನ್ನು, ಅನಿವಾರ್ಯ ಕಾರಣಗಳಿಗಾಗಿ ಇದನ್ನೇ ಬಳಸಲೇಬೇಕಾದವರು ಮುಂಜಾಗರೂಕತೆ ವಹಿಸುವುದು ಒಳ್ಳೆಯದು ಎಂದು ಕೆಲ ಮಾರ್ಗದರ್ಶಿ ಸೂತ್ರಗಳನ್ನು ಕೇಂದ್ರ ಸರ್ಕಾರದ ಅಧೀನದ ಸೈಬರ್​ ಸೆಕ್ಯುರಿಟಿ ಏಜೆನ್ಸಿಯಾಗಿರುವ ಇಂಡಿಯನ್​ ಕಂಪ್ಯೂಟರ್​ ಎಮರ್ಜೆನ್ಸಿ ರೆಸ್ಪಾನ್ಸ್​ ಟೀಮ್​ (CERT-IN​) ಬಿಡುಗಡೆ ಮಾಡಿದೆ.

ಕಾನ್ಫರೆನ್ಸ್​ ರೂಮ್​ನಲ್ಲಿ ಅನಧಿಕೃತ ವ್ಯಕ್ತಿಗಳ ಪ್ರವೇಶಕ್ಕೆ ಅವಕಾಶ ನೀಡಬೇಡಿ. ಬೇರೆಯವರ ಟರ್ಮಿನಲ್​ಗಳಲ್ಲೂ ಇತರರಿಗೆ ಅನುದ್ದೇಶಿತ ಚಟುವಟಿಕೆಗಳನ್ನು ನಡೆಸಲು ಬಿಡಬೇಡಿ, ಬಳಕೆದಾರರಿಗೆ ಭಾಗವಹಿಸಲು ಪಾಸ್​ವರ್ಡ್​ ಹಾಗೂ ಲಾಗಿನ್​ಗಳನ್ನು ಒದಗಿಸಿ. ಈ ಎಲ್ಲ ಕಾರ್ಯಗಳನ್ನು ಲಾಗಿನ್​ ಆದ ಬಳಿಕ ಅವರವರ ಸೆಟಿಂಗ್ಸ್​ನಲ್ಲಿಯೇ ನಿರ್ವಹಿಸಬಹುದು ಎಂದು ಸಂಸ್ಥೆ ತಿಳಿಸಿದೆ.

ಸದ್ಯ ಕಾರ್ಪೋರೇಟ್​ ಹಾಗೂ ಇತರ ಸಂಸ್ಥೆಗಳಲ್ಲಿ ವೆಬಿನಾರ್​ ಹಾಗೂ ವಿಡಿಯೋ ಕಾನ್ಫರೆನ್ಸ್​, ಆನ್​ಲೈನ್​ ಪಾಠಗಳಿಗೆ ಝೂಮ್​ ಆ್ಯಪ್​ ಬಳಸಲಾಗುತ್ತದೆ. ಲಾಕ್​ಡೌನ್​ ಸಮಯದಲ್ಲಿ ಇದರ ಬಳಕೆಯಲ್ಲಿ ಭಾರಿ ಹೆಚ್ಚಳ ಉಂಟಾಗಿದೆ. ಡಿಸೆಂಬರ್​ನಲ್ಲಿ 1 ಕೋಟಿ ಇದ್ದ ಬಳಕೆದಾರರ ಸಂಖ್ಯೆ ಮಾರ್ಚ್​ ವೇಳೆಗೆ 20 ಕೋಟಿಗೆ ತಲುಪಿದೆ.

https://www.vijayavani.net/former-up-dgp-moves-sc-to-quash-firs-under-section-188-ipc-for-lockdown-violations/