ಚೀನಾಗೆ ಸವಾಲೆಸೆಯಲು ಆಗಬೇಕಿದೆ ಇನ್ನೂ ತಯಾರಿ; ಕೈಗಾರಿಕಾ ಕ್ಲಸ್ಟರ್​ಗಳ ತಿಣುಕಾಟ..

ಅಸಲಿ ವಸ್ತುಗಳ ತಲೆ ಮೇಲೆ ಹೊಡೆದಂತೆ ನಕಲಿ ವಸ್ತುಗಳನ್ನು ತಯಾರಿಸುವ ಚೀನಾ ಪ್ರತಿ ವರ್ಷ ಭಾರತಕ್ಕೆ ಕೋಟ್ಯಂತರ ರೂ. ಮೌಲ್ಯದ ವಸ್ತುಗಳನ್ನು ರಫ್ತು ಮಾಡುತ್ತಿದೆ. ಅಗ್ಗದ ಬೆಲೆಗೆ ಸಿಗುವ ಚೀನಾ ವಸ್ತುಗಳು ದೇಶಾದ್ಯಂತ ಎಲ್ಲ ಕ್ಷೇತ್ರಗಳನ್ನೂ ಆವರಿಸಿದ್ದು, ಸ್ಥಳೀಯ ಉತ್ಪಾದಕರು ಮಂಡಿಯೂರಿದ್ದಾರೆ. ಇಂಥ ಚೀನಾ ದೇಶಕ್ಕೆ ಸವಾಲೊಡ್ಡುವ ಸಲುವಾಗಿ ಎಚ್.ಡಿ. ಕುಮಾರಸ್ವಾಮಿ ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ಕಾಂಪಿಟ್ ವಿಥ್ ಚೀನಾ ಎಂಬ ಮಹತ್ವಾಕಾಂಕ್ಷಿ ಯೋಜನೆ ಆರಂಭಿಸಿದರು. ಆದರೆ, ಯೋಜನೆ ಆರಂಭವಾಗಿ ವರ್ಷಗಳೇ ಕಳೆದರೂ ಚೀನಾಗೆ ಸವಾಲೊಡ್ಡುವುದಿರಲಿ, ಕೈಗಾರಿಕಾ ಕ್ಲಸ್ಟರ್​ಗಳು ಮೇಲೇಳದೆ ತಿಣುಕಾಡುತ್ತಿವೆ. ಒಟ್ಟಾರೆ ಯೋಜನೆ ಸ್ಥಿತಿ-ಗತಿ ಹೇಗಿದೆ ಎಂಬ ಅವಲೋಕನ ಇಲ್ಲಿದೆ.

| ಮೃತ್ಯುಂಜಯ ಕಪಗಲ್ ಬೆಂಗಳೂರು

ಎಚ್.ಡಿ.ಕುಮಾರಸ್ವಾಮಿ ನೇತೃತ್ವದ ಜೆಡಿಎಸ್-ಕಾಂಗ್ರೆಸ್ ಸಮ್ಮಿಶ್ರ ಸರ್ಕಾರದ ಅವಧಿಯಲ್ಲಿ ‘ಕಾಂಪಿಟ್ ವಿತ್ ಚೀನಾ’ ಯೋಜನೆಯನ್ನು ಬಜೆಟ್​ನಲ್ಲಿ ಪ್ರಕಟಿಸಿದ್ದರು. ಇದಕ್ಕಾಗಿ ಒಂಬತ್ತು ಜಿಲ್ಲೆಗಳನ್ನು ಆಯ್ಕೆ ಮಾಡಿಕೊಂಡ ಸರ್ಕಾರ, ತಲಾ 2,000 ಕೋಟಿ ರೂ. ಹೂಡಿಕೆಗೆ ನಿರ್ಧರಿಸಿ, ಖಾಸಗಿಯಿಂದ ತಲಾ 3,000 ಕೋಟಿ ರೂ. ಬಂಡವಾಳ ಆಕರ್ಷಣೆ ನಿರೀಕ್ಷೆಯಿಟ್ಟುಕೊಂಡಿತ್ತು. ಈ ಯೋಜನೆಯಡಿ ಉತ್ಪಾದನಾ ಚಟುವಟಿಕೆಗಳನ್ನು ಹಳ್ಳಿಯಿಂದ ಜಿಲ್ಲಾಮಟ್ಟದವರೆ ವಿಸ್ತರಿಸಲು, ಅನುಷ್ಠಾನಕ್ಕೆ ತರಲೆಂದು ಪ್ರತಿ ಕ್ಲಸ್ಟರ್​ಗೆ ವಿಷನ್ ಗ್ರೂಪ್​ಗಳನ್ನು ರಚಿಸಿ, ಇವುಗಳು ಸಲ್ಲಿಸುವ ವರದಿ ಆಧರಿಸಿ ಕ್ರಮವಹಿಸಲು ಸರ್ಕಾರ ಮುಂದಾಗಿ, ನೋಡಲ್ ಅಧಿಕಾರಿಗಳನ್ನು ನೇಮಿಸಿತ್ತು.

ಇದೀಗ ಕೊಪ್ಪಳ ಕ್ಲಸ್ಟರ್ ಹೊರತುಪಡಿಸಿ ಉಳಿದ ವಲಯಗಳು ನಿರೀಕ್ಷಿತ ಒಲವು ಗಿಟ್ಟಿಸಿಕೊಂಡಿಲ್ಲ. ಸ್ವತಃ ಪ್ರಧಾನಿ ನರೇಂದ್ರ ಮೋದಿ ‘ಮೇಕ್ ಇನ್ ಇಂಡಿಯಾ’ ಮೂಲಕ ಸ್ಥಳೀಯತೆಗೆ ಒತ್ತು ನೀಡಿರುವ ಕಾರಣ ಮುಂದಿನ ದಿನಗಳಲ್ಲಿ ಈ ಪರಿಕಲ್ಪನೆ ಕ್ಲಿಕ್ ಆಗಬಹುದು ಎಂಬ ವಿಶ್ವಾಸವನ್ನು ಇಲಾಖೆ ಮೂಲಗಳು ವ್ಯಕ್ತಪಡಿಸಿವೆ. ಗ್ರಾಮದಿಂದ ರಾಜಧಾನಿವರೆಗೆ ಬಹು ಉದ್ದೇಶಿತ ಉದ್ಯಮ ವಿಸ್ತರಣೆ, ಸ್ಥಳೀಯ ಸಂಪನ್ಮೂಲಗಳ ಬಳಕೆ, ಸ್ವದೇಶಿ ತತ್ವಕ್ಕೆ ಆದ್ಯತೆ, ಕೌಶಲ ವೃದ್ಧಿ ಹತ್ತಾರು ಆಯಾಮಗಳನ್ನು ಪಡೆದಿದ್ದು, ಉದ್ಯಮಸ್ನೇಹಿ ವಾತಾವರಣ ಕ್ರಮೇಣ ನೆರವಿಗೆ ಬರಬಹುದು ಎಂದು ಅಂದಾಜಿಸಲಾಗಿದೆ.

ಸಮಗ್ರ ಅಭಿವೃದ್ಧಿಗೆ ಕ್ರಮ: ‘ಒಂದು ಜಿಲ್ಲೆ-ಒಂದು ಉತ್ಪನ್ನ’ ಪರಿಕಲ್ಪನೆ ಸಫಲತೆ ಜತೆಗೆ ರಾಜ್ಯದ ಸಮಗ್ರ ಅಭಿವೃದ್ಧಿ ದೃಷ್ಟಿಯಿಂದ ಪ್ರತಿ ತಾಲೂಕಿನಲ್ಲಿ ಶಾಶ್ವತ ಹೆಲಿಪ್ಯಾಡ್, 100 ಕಿ.ಮೀ.ಗೊಂದು ವಿಮಾನ ನಿಲ್ದಾಣ ನಿರ್ವಿುಸುವ ಚಿಂತನೆಯಿದೆ. ಶಿವಮೊಗ್ಗ, ವಿಜಯಪುರದಲ್ಲಿ ನಿರ್ಮಾಣ ಕಾಮಗಾರಿ ಪ್ರಗತಿಯಲ್ಲಿದ್ದು, ಹಾಸನಕ್ಕೂ ಚಾಲನೆ ನೀಡಲಾಗಿದೆ. ಬಾಗಲಕೋಟೆ ಜಿಲ್ಲೆ ಬಾದಾಮಿ ಬಳಿ ಮತ್ತೊಂದು ವಿಮಾನ ನಿಲ್ದಾಣ ನಿರ್ಮಾಣ ಪ್ರಸ್ತಾವನೆ ಸಿದ್ಧವಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ.

ಹೆಸರು ಬದಲಾವಣೆ, ಚಾಲನೆ: ಬಿ.ಎಸ್.ಯಡಿಯೂರಪ್ಪ ನೇತೃತ್ವದ ಸರ್ಕಾರವಿದ್ದಾಗ ರಾಜತಾಂತ್ರಿಕ ಅಡಚಣೆ ಉಂಟಾಗಬಹುದು ಎಂಬ ಕಾರಣಕ್ಕೆ ಕಾಂಪಿಟ್ ವಿತ್ ಚೀನಾ ಹೆಸರು ಬದಲಾಯಿಸಿ ಕ್ಲಸ್ಟರ್ ಆಧಾರಿತ ಅಭಿವೃದ್ಧಿ ಯೋಜನೆ ಎಂದು ಮರು ನಾಮಕರಣ ಮಾಡಲಾಗಿದೆ. ಮೋದಿ ಅವರ ‘ವೋಕಲ್ ಫಾರ್ ಲೋಕಲ್’ ಆಶಯಕ್ಕೆ ಇಂಬು ನೀಡಲೆಂದು ಕೊಪ್ಪಳ ಜಿಲ್ಲೆಯಲ್ಲಿ ಆಟಿಕೆ ಕ್ಲಸ್ಟರ್ ಸ್ಥಾಪನೆಗೆ ಚಾಲನೆ ನೀಡಿದ್ದು, ಹೂಡಿಕೆದಾರರಿಂದ ಸ್ವಲ್ಪಮಟ್ಟಿಗೆ ಸ್ಪಂದನೆ ಲಭಿಸಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ. ಆಧುನಿಕತೆ ಇಲ್ಲದ ಕಾಲದಲ್ಲೇ ಕಿನ್ನಾಳದ ಬೊಂಬೆಗಳು ಜಗತ್ಪ್ರಸಿದ್ಧವಾಗಿದ್ದು, ಆಧುನಿಕತೆ ಅಬ್ಬರದಲ್ಲಿ ಕ್ರಮೇಣ ಮರೆಗೆ ಸರಿದಿದ್ದ ಗೊಂಬೆಗಳು ಮತ್ತು ಕಲಾವಿದರಿಗೆ ಪುನರುಜ್ಜೀವನದ ಆಶಾಭಾವನೆಯನ್ನು ಕ್ಲಸ್ಟರ್ ಹುಟ್ಟಿಹಾಕಿದೆ.

ತುಮಕೂರಿನಲ್ಲಿ ಮಷಿನ್ ಮತ್ತು ಟೂಲ್ಸ್ ಉದ್ಯಮ ಗಳ ಸ್ಥಾಪನೆಗೆ 3,000 ಎಕರೆ ಜಮೀನು ಗುರುತಿಸಲಾಗಿದೆ. ಧಾರವಾಡ ಜಿಲ್ಲೆ ಬೇಲೂರು ಬಳಿ 5,000 ಎಕರೆ ಜಮೀನು ಗುರುತಿಸಿ, ಐಟಿ ಆಧಾರಿತ ಹಾಗೂ ಸಾಮಾನ್ಯ ಉದ್ಯಮಗಳನ್ನು ಸ್ಥಾಪಿಸಲು ಯೋಚಿಸಿದೆ. ಅಲ್ಲದೆ, ಈ ವಲಯಕ್ಕೂ 1,000 ಕೋಟಿ ರೂ. ನೆರವು ಬಯಸಿ ಕೇಂದ್ರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. ಕಲಬುರಗಿಯಲ್ಲಿ ಜವಳಿ ಮತ್ತು ಜ್ಯುವೆಲರಿ ಪಾರ್ಕ್, ಬೀದರ್​ನಲ್ಲಿ ಸೌರಶಕ್ತಿ ವಿದ್ಯುತ್ ಉತ್ಪಾದನೆಗೆ ಅಗತ್ಯವಾದ ಬಿಡಿಭಾಗಗಳು ತಯಾರಿಕಾ ಘಟಕ ಸ್ಥಾಪಿಸಲು ಉದ್ದೇಶಿಸಿದ್ದು, ಪರವಾನಗಿ ನಿಯಮಗಳನ್ನು ಸರಳೀಕರಿಸಿ ತ್ವರಿತ ಅನುಷ್ಠಾನಕ್ಕೆ ಒತ್ತು ನೀಡಲಾಗಿದೆ ಎಂದು ಇಲಾಖೆ ಹೇಳಿದೆ.