ಚಿಕ್ಕಬಳ್ಳಾಪುರ: ಬರೋಬ್ಬರಿ ನೂರು ದಿನಗಳ ಕಾಲ ಆಧ್ಯಾತ್ಮಿಕ ಪ್ರವಚನ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು, ಚಿಂತನ ಮಂಥನ ಸೇರಿದಂತೆ ಪ್ರೇರಣಾದಾಯಕ ಚಟುವಟಿಕೆ ನಡೆಯಲಿರುವ ವಿಶ್ವ ಸಾಂಸ್ಕೃತಿಕ ಉತ್ಸವವು ಸ್ವಾತಂತ್ರ್ಯ ದಿನಾಚರಣೆಯಂದು ಚಾಲನೆ ಪಡೆದುಕೊಂಡಿತು.
ಚಿಕ್ಕಬಳ್ಳಾಪುರ ತಾಲೂಕಿನ ಮುದ್ದೇನಹಳ್ಳಿಯ ಪ್ರೇಮಾಮೃತಮ್ ಸಭಾಂಗಣದ ಆವರಣದಲ್ಲಿ ಸದ್ಗರು ಶ್ರೀ ಮಧುಸೂದನ ಸಾಯಿ ಶುಭ ಸಂದೇಶದೊಂದಿಗೆ ಕಲಾವಿದರು ಪ್ರಾರ್ಥನೆ, ಸಂಗೀತ ಕಾರ್ಯಕ್ರಮ, ವಾದ್ಯಗಳ ಕಲೆಗಳ ಪ್ರದರ್ಶನದ ಮೂಲಕ ಗಮನ ಸೆಳೆದರು.
ಸಾನಿಧ್ಯ ವಹಿಸಿ ಮಾತನಾಡಿದ ಸದ್ಗುರು, ಭಾರತವು ದಿವ್ಯಾತ್ಮರಿಂದ ದಿವ್ಯಾತ್ಮರಿಗಾಗಿ ರೂಪುಗೊಂಡ ಪವಿತ್ರ ನೆಲ. ಹಾಗೆಯೇ ಭಗವಾನ್ ಶ್ರೀ ಸತ್ಯಸಾಯಿ ಬಾಬಾ ಜಗತ್ತು ಕಂಡ ಶ್ರೇಷ್ಠ ಮಾನವತಾವಾದಿ. ಪ್ರೇಮ ಮತ್ತು ಸೇವೆಯ ಪವಿತ್ರ ಪಾಠವನ್ನು ಬೋಧಿಸಿದ ಮಹಾತ್ಮರು ಎಂದರು.
ಸತ್ಯಸಾಯಿ ಲೋಕ ಸೇವಾ ಸಮೂಹ ಶಿಕ್ಷಣ ಸಂಸ್ಥೆಗಳ ಪ್ರಧಾನ ಮಾರ್ಗದರ್ಶಕ ಬಿ.ಎನ್.ನರಸಿಂಹಮೂರ್ತಿ ಮಾತನಾಡಿ, ಸಮಸ್ತ ಮನುಕುಲವನ್ನು ಒಂದೇ ಛತ್ರದ ಅಡಿಯಲ್ಲಿ ತಂದು ಜಾಗತಿಕ ಸಹಬಾಳ್ವೆಯನ್ನು ಪ್ರಪಂಚಕ್ಕೆ ಸಾಬೀತುಪಡಿಸುವುದೇ ಭಗವಾನ್ ಬಾಬಾ ರವರ ಶತಮಾನೋತ್ಸವದ ಉದ್ದೇಶವಾಗಿದೆ. ಹಾಗೆಯೇ ಸತ್ಸಂಕಲ್ಪದ ಸಹಕಾರವೇ ಸದ್ಗುರುಗಳ ಶ್ರೀ ಮಧುಸೂದನ ಸಾಯಿ ಗುರಿಯಾಗಿದ್ದು ಮನುಕುಲದ ಸರ್ವತ್ರ ಸ್ವಾವಲಂಬನೆಯೇ ಕಾರ್ಯಕ್ರಮದ ಆಶಯ ಎಂದು ತಿಳಿಸಿದರು.
