Delhi flower seller assault: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಮತ್ತೊಂದು ಕರಾಳ ಕೃತ್ಯ ಬೆಳಕಿಗೆ ಬಂದಿದೆ. ಡ್ರಗ್ಸ್ ಮಾರಾಟ ಮಾಡಲು ನಿರಾಕರಿಸಿದ ರಸ್ತೆಬದಿ ಹೂವು ಮಾರುವ ಮಹಿಳೆ ಮೇಲೆ ದುಷ್ಕರ್ಮಿಗಳ ಗುಂಪೊಂದು ದೊಣ್ಣೆ ಹಾಗೂ ರಾಡ್‌ಗಳಿಂದ ಅಮಾನುಷವಾಗಿ ಹಲ್ಲೆ ನಡೆಸಿದೆ. ಈ ಘಟನೆಯ ಸಿಸಿಟಿವಿ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗಿದೆ.
ದಕ್ಷಿಣ ದೆಹಲಿಯ ಹೌಜ್ ಖಾಸ್ ಪೊಲೀಸ್ ಠಾಣೆ ವ್ಯಾಪ್ತಿಯ ಗೌತಮ್ ನಗರದಲ್ಲಿರುವ ಏಮ್ಸ್ (AIIMS) ರಸ್ತೆ ಬಳಿ, ನವೆಂಬರ್ 8ರಂದು ರಸ್ತೆಬದಿ ಹೂವು ವ್ಯಾಪಾರ ಮಾಡುತ್ತಿದ್ದ ಮಹಿಳೆ ಮತ್ತು ಅವರ ಸಂಬಂಧಿಯ ಮೇಲೆ ಯುವಕರ ಗುಂಪೊಂದು ದೊಣ್ಣೆ ಹಾಗೂ ರಾಡ್‌ಗಳಿಂದ ಅಮಾನುಷವಾಗಿ ಹಲ್ಲೆ ನಡೆಸಿರುವ ಘಟನೆ ವರದಿಯಾಗಿದೆ.
ಹಲ್ಲೆಗೆ ಅಸಲಿ ಕಾರಣವೇನು?
ಸಂತ್ರಸ್ತೆಯ ಆಪ್ತರ ಪ್ರಕಾರ, ರಸ್ತೆಬದಿ ಹೂವು ಮಾರಾಟದ ಜತೆಗೆ ಡ್ರಗ್ಸ್ ಮಾರುವಂತೆಯೂ ಸ್ಥಳೀಯ ಕಿಡಿಗೇಡಿಗಳು ಮಹಿಳೆಯ ಮೇಲೆ ನಿರಂತರವಾಗಿ ಒತ್ತಡ ಹೇರುತ್ತಿದ್ದರು. ಆದರೆ ಮಹಿಳೆ ಕಡ್ಡಿಮುರಿದಂತೆ ನಿರಾಕರಿಸಿದ್ದರು. ಇದರಿಂದ ಸಿಟ್ಟಿಗೆದ್ದ ದುಷ್ಕರ್ಮಿಗಳ ಗುಂಪು ಮಹಿಳೆ ಮೇಲೆ ಏಕಾಏಕಿ ಈ ಅಮಾನುಷ ದಾಳಿ ನಡೆಸಿದೆ ಎಂದು ಆರೋಪಿಸಲಾಗಿದೆ. ಆದಾಗ್ಯೂ, ಈ ಹಲ್ಲೆಗೆ ನಿಖರವಾದ ಕಾರಣ ಏನು ಎಂಬುದು ದೆಹಲಿ ಪೊಲೀಸರ ಅಧಿಕೃತ ತನಿಖೆಯಿಂದಷ್ಟೇ ಹೊರಬರಬೇಕಿದೆ.
