ತಾಲೂಕಿನ ಮಲೆನಾಡು ಭಾಗದ ಸಾಕಷ್ಟು ಗ್ರಾಮಗಳಲ್ಲಿ ಕಾಡಾನೆಗಳು ಪ್ರತ್ಯೇಕ ಹಿಂಡುಗಳಲ್ಲಿ ಕಾಣಿಸಿಕೊಳ್ಳುತ್ತಿವೆ. ತಾಲೂಕಿನ ಅರೇಹಳ್ಳಿ ಹೋಬಳಿಯ ಸೂರ್ಕೋಡು, ಹುಲ್ಕೋಡು, ಟಾಟಾ ಎಸ್ಟೇಟ್, ಮಲಸಾವರ, ಮಲ್ಲಾಪುರ, ಕಾನಹಳ್ಳಿ, ನೇರಲಮಕ್ಕಿ, ಬೆಳ್ಳಾವರ ಹಾಗೂ ಬಿಕ್ಕೋಡು ಹೋಬಳಿಯ ಜಗಬೋರನಹಳ್ಳಿ, ಬೊಮ್ಮಡಿಹಳ್ಳಿ-ಚೌಡನಹಳ್ಳಿ ಭಾಗದಲ್ಲಿ ಕಾಡಾನೆಗಳು ದಿನದಿಂದ ದಿನಕ್ಕೆ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿವೆ. ಈ ಆನೆಗಳ ಪೈಕಿ ಪ್ರತ್ಯೇಕವಾಗಿ ಎರಡು ಮೂರು ಹಾಗೂ 10ಕ್ಕೂ ಹೆಚ್ಚಿನ ಆನೆಗಳ ಹಿಂಡು ಹಗಲು-ರಾತ್ರಿ ಎನ್ನದೆ ಎಲ್ಲೆಂದರಲ್ಲಿ ತೋಟ, ಗ್ರಾಮ ಎನ್ನದೆ ಮನಸ್ಸಿಗೆ ಬಂದಂತೆ ನುಗ್ಗುತ್ತಿವೆ. ಜತೆಗೆ ಕೆಲ ತೋಟಗಳಿಗೆ ಅಳವಡಿಸಿರುವ ಸೋಲಾರ್ ವಿದ್ಯುತ್ ತಂತಿಗಳನ್ನೂ ಬಿಡದೆ ಜಾಣತನದಿಂದ ತುಳಿದು ತೋಟದೊಳಕ್ಕೆ ನುಗ್ಗಿದರೆ, ಮತ್ತೆ ಕೆಲವು ತೋಟಕ್ಕೆ ಅಳವಡಿಸಿರುವ ಕಬ್ಬಿಣದ ತಂತಿ ಬೇಲಿ ಕಿತ್ತುಹಾಕಿ ಒಳನುಗ್ಗುತ್ತಿವೆ. ಇದರಿಂದಾಗಿ ಅಪಾರ ಪ್ರಮಾಣದ ಅಡಕೆ, ಕಾಫಿ, ಬಾಳೆ ಸೇರಿದಂತೆ ಇತರ ಬೆಳೆಗಳು ನಾಶವಾಗುತ್ತಿವೆ.
