RCB ಸ್ಟಾರ್ ಜೇಕಬ್ ಬೆಥೆಲ್ ಹೃದಯ ಗೆದ್ದ ಕನ್ನಡದ ನಟಿ ಯಾರು? ಡೇಟಿಂಗ್ ರೂಮರ್ ವೈರಲ್

22 ವರ್ಷದ ಜೇಕಬ್ ಬೆಥೆಲ್ ತಮ್ಮ ಆಕ್ರಮಣಕಾರಿ ಬ್ಯಾಟಿಂಗ್ ಮೂಲಕ ಐಪಿಎಲ್ ವೇಳೆ ಗಮನ ಸೆಳೆದಿದ್ದರು. ಇದೀಗ ಅವರು ಹಾಗೂ ನಟಿ ಆಧ್ಯಾ ಆನಂದ್ ನಡುವಿನ ಸಂಬಂಧದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹಲವು ಪೋಸ್ಟ್‌ಗಳು ಹರಿದಾಡುತ್ತಿವೆ.

ಆರ್‌ಸಿಬಿ ಅಭಿಮಾನಿಗಳು ಇತ್ತೀಚೆಗೆ ಒಂದು ವಿಷಯ ಗಮನಿಸಿದ್ದಾರೆ. ಜೇಕಬ್ ಬೆಥೆಲ್, ಆಧ್ಯಾ ಆನಂದ್ ಅವರ ಇನ್‌ಸ್ಟಾಗ್ರಾಂ ಪೋಸ್ಟ್‌ಗಳಿಗೆ ನಿರಂತರವಾಗಿ ಲೈಕ್ ಮಾಡುತ್ತಿರುವುದು ಚರ್ಚೆಗೆ ಕಾರಣವಾಗಿದೆ. ಇದರ ನಡುವೆ, ಇಬ್ಬರು ಒಟ್ಟಿಗೆ ಕಾಫಿ ಸೇವಿಸುತ್ತಿರುವಂತೆ ಕಾಣುವ ಒಂದು ಫೋಟೋ ರೆಡಿಟ್ ಹಾಗೂ ಎಕ್ಸ್ (ಹಿಂದಿನ ಟ್ವಿಟರ್) ನಲ್ಲಿ ವೈರಲ್ ಆಗಿದೆ. ಈ ಚಿತ್ರವೇ ಡೇಟಿಂಗ್ ವದಂತಿಗೆ ಮತ್ತಷ್ಟು ಬಲ ನೀಡಿದೆ.

ಕರ್ನಾಟಕ ಮೂಲದ ಆಧ್ಯಾ ಆನಂದ್ ಈಗಾಗಲೇ ಡಿಜಿಟಲ್ ಮನರಂಜನಾ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿದ್ದಾರೆ. ಸಿಂಗಾಪುರದಲ್ಲಿ ರಂಗಭೂಮಿ ತರಬೇತಿ ಪಡೆದಿರುವ ಅವರು ಬಳಿಕ ಬಾಲಿವುಡ್ ನಟ ಅನುಪಮ್ ಖೇರ್ ಹಾಗೂ ನಟನಾ ತರಬೇತುದಾರ ಅತುಲ್ ಮೊಂಗಿಯಾ ಅವರ ಸಂಸ್ಥೆಗಳಲ್ಲಿ ಅಭಿನಯ ಕೌಶಲ್ಯವನ್ನು ಬೆಳೆಸಿಕೊಂಡಿದ್ದಾರೆ. ನೆಟ್‌ಫ್ಲಿಕ್ಸ್‌ನ ಜನಪ್ರಿಯ ವೆಬ್ ಸರಣಿ ‘ಬಾಂಬೆ ಬೆಗಮ್ಸ್’ ಮೂಲಕ ಭಾರತೀಯ ಮನರಂಜನಾ ಕ್ಷೇತ್ರಕ್ಕೆ ಕಾಲಿಟ್ಟ ಆಧ್ಯಾ, 2022ರಲ್ಲಿ ಬಿಡುಗಡೆಯಾದ ‘ಕ್ರಶ್ಡ್’ ವೆಬ್ ಸರಣಿಯ ಮೂಲಕ ದೇಶಾದ್ಯಂತ ಜನಪ್ರಿಯತೆ ಪಡೆದರು.

‘ಎ ಯೆಲ್ಲೋ ಬರ್ಡ್’, ‘ಒನ್ ಅವರ್ ಟು ಡೇಲೈಟ್’ ಹಾಗೂ ‘ಸ್ಕೈ ಸಿಟಿ’ ಸೇರಿದಂತೆ ಹಲವು ಕಿರುಚಿತ್ರಗಳಲ್ಲಿ ಆಧ್ಯಾ ನಟಿಸಿದ್ದಾರೆ. ಈ ಚಿತ್ರಗಳು ಕಾನ್ಸ್ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ ಸೇರಿದಂತೆ ಹಲವು ಪ್ರತಿಷ್ಠಿತ ವೇದಿಕೆಗಳಲ್ಲಿ ಪ್ರದರ್ಶನಗೊಂಡಿವೆ. ಚಿಕ್ಕ ವಯಸ್ಸಿನಲ್ಲೇ ಡಿಜಿಟಲ್ ಮತ್ತು ಸಿನಿಮಾ ಕ್ಷೇತ್ರದಲ್ಲಿ ತಮ್ಮದೇ ಆದ ಅಭಿಮಾನಿ ಬಳಗವನ್ನು ಆಧ್ಯಾ ನಿರ್ಮಿಸಿಕೊಂಡಿದ್ದಾರೆ.

ಜೇಕಬ್ ಬೆಥೆಲ್ ಅಥವಾ ಆಧ್ಯಾ ಆನಂದ್ ಈ ಡೇಟಿಂಗ್ ವದಂತಿಗಳ ಬಗ್ಗೆ ಇದುವರೆಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಹೀಗಾಗಿ ಈ ಸುದ್ದಿ ಸದ್ಯಕ್ಕೆ ಕೇವಲ ಸಾಮಾಜಿಕ ಜಾಲತಾಣಗಳಲ್ಲಿನ ಚರ್ಚೆಯಾಗಿಯೇ ಉಳಿದಿದೆ. ಇಬ್ಬರ ನಡುವೆ ನಿಜವಾಗಿಯೂ ಸಂಬಂಧವಿದೆಯೇ ಅಥವಾ ಇದು ಕೇವಲ ವದಂತಿಯೇ ಎಂಬುದು ಮುಂದಿನ ದಿನಗಳಲ್ಲಿ ಸ್ಪಷ್ಟವಾಗುವ ಸಾಧ್ಯತೆಯಿದೆ.

‘ಕ್ರಶ್ಡ್’ ವೆಬ್ ಸರಣಿಯ ಪ್ರಚಾರದ ವೇಳೆ ನೀಡಿದ್ದ ಸಂದರ್ಶನದಲ್ಲಿ ಆಧ್ಯಾ ಆನಂದ್, ಕನ್ನಡ ಸಿನಿಮಾಗಳಲ್ಲಿ ನಟಿಸುವ ಆಸೆ ವ್ಯಕ್ತಪಡಿಸಿದ್ದರು. “ಕನ್ನಡ ನನ್ನ ಮಾತೃಭಾಷೆ. ಒಂದು ದಿನ ಕನ್ನಡ ಚಿತ್ರರಂಗದಲ್ಲಿ ನಟಿಸಲು ನನಗೆ ತುಂಬಾ ಇಷ್ಟ” ಎಂದು ಅವರು ಹೇಳಿದ್ದರು. ಈಗಾಗಲೇ ಹಿಂದಿ ಹಾಗೂ ಡಿಜಿಟಲ್ ಮನರಂಜನಾ ಕ್ಷೇತ್ರದಲ್ಲಿ ಗುರುತು ಮೂಡಿಸಿರುವ ಆಧ್ಯಾ, ಮುಂದಿನ ದಿನಗಳಲ್ಲಿ ಕನ್ನಡ ಅಥವಾ ದಕ್ಷಿಣ ಭಾರತೀಯ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಾರೆಯೇ ಎಂಬ ಕುತೂಹಲವೂ ಅಭಿಮಾನಿಗಳಲ್ಲಿ ಮೂಡಿದೆ,(ಏಜೆನ್ಸೀಸ್​).