ಎಲ್ಲದಕ್ಕೂ ಅಸ್ತು! ಅದೊಂದು ಬಿಟ್ಟು... ಏನಿದು 'ಪ್ಯಾರಲಲ್​ ಮ್ಯಾರೇಜ್'​? ಈ ಸಂಬಂಧದ ಬಗ್ಗೆ ಇಲ್ಲಿದೆ ಮಾಹಿತಿ | Parallel Marriage

ಬೆಂಗಳೂರು: ಮೂರು ಗಂಟಿನ ಮದುವೆ ನೂರಾರು ವರ್ಷಗಳ ನಂಟು ಬೆಸೆಯುತ್ತದೆ ಎಂಬ ಹಿರಿಯರ ಮಾತು ಸುಳ್ಳಲ್ಲ ಬಿಡಿ. ದಾಂಪತ್ಯ ಜೀವನಕ್ಕೆ ಕಾಲಿಡುವ ಪ್ರತಿ ಹೆಣ್ಣು-ಗಂಡಿಗೂ ಅವರದ್ದೇ ಆದ ಆಸೆ, ಆಕಾಂಕ್ಷೆಗಳು ಮನದಲ್ಲಿ ಬಹಳ ದೊಡ್ಡದಾಗಿರುತ್ತದೆ.

ಕೆಲವರು ಪ್ರೀತಿಸಿ ವಿವಾಹ ಆಗಬೇಕು ಎಂದು ಬಯಸಿದರೆ, ಇನ್ನೂ ಕೆಲವರು ತಂದೆ-ತಾಯಿಯ ಇಚ್ಛೆಯಂತೆ ಮದುವೆಯಾಗುತ್ತಾರೆ. ಆದರೆ, ಖುಷಿ, ಸಂಭ್ರಮ, ಸಡಗರದ ಛಾಯೆಯಲ್ಲಿ ನಡೆದ ವಿವಾಹ ಒಂದು ಸಣ್ಣ ವಿಚಾರಕ್ಕೆ ಅಥವಾ ತಪ್ಪುಗಳಿಂದ ಮುರಿದು ಬೀಳುವುದು ನಿಜಕ್ಕೂ ಸಹಿಸಲಾಗದು. ಕೆಲವರು ಡಿವೋರ್ಸ್​ ಕೊಟ್ಟು ಮುಂದೋದರೆ, ಇನ್ನೂ ಕೆಲವರು ಪ್ಯಾರಲಲ್​ ಆಗಿಯೇ ಬದುಕುತ್ತಿರುತ್ತಾರೆ. ಸದ್ಯ ಇದೇ ವಿಷಯ ಜಾಲತಾಣಗಳಲ್ಲಿ ಹೆಚ್ಚಾಗಿ ಕೇಳಿಬರುತ್ತಿದ್ದು, ಏನಿದು ಪ್ಯಾರಲಲ್​ ಮ್ಯಾರೇಜ್​ ಎಂಬ ಪ್ರಶ್ನೆಗೆ ಇಲ್ಲಿದೆ ನೋಡಿ ವಿವರವಾದ ಉತ್ತರ.

ದಾಂಪತ್ಯ ಅನ್ನೋದು ಹಲವರ ಬಹುದೊಡ್ಡ ಕನಸು. ಬಾಲ್ಯದಿಂದ ಮದುವೆ ವಯಸ್ಸಿಗೆ ಬರುವವರೆಗೆ ನಾವು ಬದುಕುವ ಜೀವನ ಒಂದು ಲೆಕ್ಕವಾದರೆ, ದಾಂಪತ್ಯದ ಬಳಿಕ ಜೀವಿಸುವ ಜೀವನ ಮತ್ತೊಂದು ಲೆಕ್ಕ. ಕೆಲವರಿಗೆ ಇದು ಸುಮಧುರ, ಹಿತಕರ ಅನಿಸಿದರೆ, ಇನ್ನೂ ಕೆಲವರಿಗೆ ಬೇಡದ ಬದುಕು, ನರಕ ಎಂದೆಲ್ಲ ಅನಿಸಿಬಿಟ್ಟಿರುತ್ತದೆ. ಕಾರಣ, ಅವರಿಗೆ ಸಿಕ್ಕ ವ್ಯಕ್ತಿಗಳು ಮತ್ತು ಅವರೊಂದಿಗೆ ಕಾಡುವ ಹೊಂದಾಣಿಕೆ ಸಮಸ್ಯೆಗಳು. ಈ ಕಾರಣಗಳಿಂದ ಕೆಲವರು ಹೆಚ್ಚು ಸಮಯ ತೆಗೆದುಕೊಳ್ಳದೆ ಡಿವೋರ್ಸ್​ ಮೊರೆ ಹೋದರೆ, ಒಂದಷ್ಟು ಮಂದಿ ಈ ಪ್ಯಾರಲಲ್​ ಮ್ಯಾರೇಜ್​ನಲ್ಲಿಯೇ ತಮ್ಮ ಜೀವನ ಸಾಗಿಸಿಬಿಡುತ್ತಾರೆ.

ಸಮಾನಾಂತರ ಮದುವೆ! ಇದು ಹೇಗೆ ಎಂದರೆ, ಮದುವೆಯಾದ ಜೋಡಿ, ತಮ್ಮ ವೈವಾಹಿಕ ಬಾಳನ್ನು ಬದುಕುತ್ತಿರುತ್ತಾರೆ. ಸಮಾಜದ ಪ್ರಕಾರ, ಇಬ್ಬರೂ ಎಲ್ಲರ ಕಣ್ಣಿಗೂ ಗಂಡ-ಹೆಂಡತಿಯೇ. ಆದರೆ, ಅವರಿಬ್ಬರಿಗಲ್ಲ. ದಂಪತಿಗಳು ಮನೆಯ ಬಾಡಿಗೆ ಕಟ್ಟುವುದರಿಂದ ಹಿಡಿದು, ಮಕ್ಕಳನ್ನು ಬೆಳೆಸುವುದು, ಮನೆಗೆ ಸಂಬಂಧಿಸಿದ ಬಿಲ್‌ಗಳನ್ನು ಸಮ ಪಾಲಿನಿಂದ ಪಾವತಿಸುವುದು, ತಮ್ಮಿಬ್ಬರಿಗೆ ಸಂಬಂಧಪಟ್ಟ ಕೆಲಸಗಳನ್ನು ನಿರ್ವಹಿಸುವುದು ಸೇರಿ ಒಂದಷ್ಟು ಕೆಲಸಗಳನ್ನು ಜತೆಯಾಗಿ ಹಂಚಿಕೊಂಡು ಮಾಡ್ತಾರೆ. ಆದರೆ, ಅವರಿಬ್ಬರ ನಡುವೆ ಯಾವುದೇ ಭಾವನಾತ್ಮಕ ಸಂಪರ್ಕ ಅಥವಾ ಸಂಬಂಧವಿರುವುದಿಲ್ಲ ಎಂಬುದು ಇಲ್ಲಿ ಗಮನಾರ್ಹ.