ಮಾನವರಿಗೆ ಯಾವುದು ಶೃಂಗಾರ?

ಸದ್ಯ ಜಗತ್ತಿನಲ್ಲಿ ಜನರ ಹೆಚ್ಚು ಒಲವು ಶೃಂಗಾರದ ಕಡೆಗೇ ಇದೆ. ಇಂದಿನ ವಾತಾವರಣದಲ್ಲಿ ಜನ ಶೃಂಗಾರಕ್ಕೆ ಹೆಚ್ಚು ಅಂಟಿಕೊಂಡಿದ್ದಾರೆ. ನವರಸಗಳಲ್ಲಿ ಶೃಂಗಾರರಸ ಮೊದಲನೆಯದು. ಶಿವ ಕೊಟ್ಟ ಈ ರೂಪಕ್ಕಿಂತ ಹೆಚ್ಚು ಸುಂದರವಾಗಿ ಕಾಣಬೇಕೆಂಬ ಹುಚ್ಚಿನಿಂದ ಮಾನವ ಹಾಗೆ ಸಾಗುತ್ತಿದ್ದಾನೆ. ಮಕ್ಕಳಿಂದ ಮುದುಕರವರೆಗೂ ಸುಂದರವಾಗಿ ಕಾಣಬೇಕು ಎಂಬುವವರೇ ಇದ್ದಾರೆ. ಕನ್ನಡಿಯ ಮುಂದೆ ನಿಲ್ಲದವರು ಯಾರೂ ಇಲ್ಲ. ಇಂದಿನ ಜಗತ್ತಿನಲ್ಲಿ ಹೊಟ್ಟೆಗೆ ಇಲ್ಲವೆಂದರೂ ನಡೆಯುವುದು, ಆದರೆ ಸೌಂದರ್ಯಸಾಧನಗಳು ಬೇಕೇ ಬೇಕು ಎನ್ನುತ್ತಾರೆ.

ನೀರಿಂಗೆ ನೈದಿಲೆಯೇ ಶೃಂಗಾರ / ಸಮುದ್ರಕ್ಕೆ ತೆರೆಯೇ ಶೃಂಗಾರ

ನಾರಿಗೆ ಗುಣವೇ ಶೃಂಗಾರ / ಗಗನಕ್ಕೆ ಚಂದ್ರಮನೇ ಶೃಂಗಾರ

ನಮ್ಮ ಕೂಡಲಸಂಗನ ಶರಣರಿಗೆ ನೊಸಲ ವಿಭೂತಿಯೇ ಶೃಂಗಾರ.

ನೀರಿಗೆ ಕಮಲದ ಹೂವು ಶೃಂಗಾರವಾದಂತೆ, ಸಮುದ್ರದಲ್ಲಿ ತೆರೆಗಳು ಬಂದರೆ ಶೃಂಗಾರ ಕಾಣುತ್ತದೆ. ಸ್ತ್ರೀಯರಿಗೆ ಉತ್ತಮ ನಡತೆ ಹಾಗೂ ಗುಣವೇ ಶೃಂಗಾರ. ನಮ್ಮ ಭಾರತೀಯ ಸಂಸ್ಕೃತಿಯಲ್ಲಿ ನೈತಿಕ ಅಧ್ಯಾತ್ಮಕ್ಕೆ ಬೆಲೆ ಇದೆ. ಅದಕ್ಕೆ ಮಹಿಳೆಯರಿಗೆ ಉತ್ತಮ ಗುಣ, ನಡತೆ ಬೇಕು ಎಂದಿದ್ದಾರೆ ಬಸವಣ್ಣನವರು. ಆಕಾಶದಲ್ಲಿ ಚಂದ್ರನಿದ್ದರೆ ಆತನ ಬೆಳದಿಂಗಳು ಮನಸ್ಸಿಗೆ ಶಾಂತಿ ತರುತ್ತದೆ. ಕೊನೆಗೆ ಮುಖ್ಯ ಶೃಂಗಾರ ಏನೆಂದು ಹೇಳುತ್ತಾರೆ, ಹಣೆಯ ಮೇಲೆ ವಿಭೂತಿಯೇ ಮುಖ್ಯವಾದ ಶೃಂಗಾರ. ನಿಜವಾದ ಶೃಂಗಾರ ಯಾವುದು ಎಂದು ಅರಿತುಕೊಂಡು ಅಳವಡಿಸಿಕೊಂಡು ನಡೆದರೆ ನಮ್ಮೆಲ್ಲರ ಬಾಳು ಹಸನಾಗುವುದು.