ಕೇಂದ್ರದ ಅಧೀನದ ಈ ವಿದ್ಯಾಲಯಕ್ಕೆ ಪ್ರತಿಸಲದಂತೆ ಈ ವರ್ಷವೂ ಆರನೇ ತರಗತಿ ಪ್ರವೇಶಕ್ಕೆ 2019ರ ನವೆಂಬರ್ನಲ್ಲಿ ಅರ್ಜಿ ಆಹ್ವಾನಿಸಿ, ಈ ವರ್ಷದ ಜನವರಿಯಲ್ಲಿ ಪರೀಕ್ಷೆ ನಡೆಸಲಾಗಿತ್ತು. ಈ ವರ್ಷ ಸಾಮಾನ್ಯ, ಹಿಂದುಳಿದ ವರ್ಗ ಹಾಗೂ ಪರಿಶಿಷ್ಟ ಜಾತಿ-ಪರಿಶಿಷ್ಟ ಪಂಗಡ ಮೀಸಲಿನಡಿ ಅರ್ಜಿ ಸಲ್ಲಿಕೆಗೆ ಅವಕಾಶ ಕಲ್ಪಿಸಿತ್ತು. ಅರ್ಜಿ ಸಲ್ಲಿಕೆ ವೇಳೆ ಕಡ್ಡಾಯವಾಗಿ ಕೇಂದ್ರ ಪಟ್ಟಿಯಲ್ಲಿರುವಂತೆ ಮೀಸಲು ಅನ್ವಯವಾಗಲಿದೆ ಎಂದು ತಿಳಿಸಿಲ್ಲ. ವಿದ್ಯಾರ್ಥಿಗಳು ಸಂಪ್ರದಾಯದಂತೆ ರಾಜ್ಯ ಮೀಸಲು ಪಟ್ಟಿಯಂತೆ ಜಾತಿ ಪ್ರಮಾಣಪತ್ರ ಸಲ್ಲಿಸಿದ್ದಾರೆ. ಜತೆಗೆ ಪರೀಕ್ಷೆಯನ್ನೂ ಬರೆದು ಅದೇ ಮೀಸಲಿನಡಿ ಆಯ್ಕೆಯಾಗಿದ್ದಾರೆ. ಆದರೆ, ಶಾಲೆಯಲ್ಲಿ ದಾಖಲಾತಿ ಮಾಡಿಸುವಾಗ ಮೀಸಲಿನಡಿ ಆಯ್ಕೆಯಾದವರು ಕಡ್ಡಾಯವಾಗಿ ಕೇಂದ್ರ ಮೀಸಲು ಪಟ್ಟಿಯಲ್ಲಿರುವ ಜಾತಿಯವರಾಗಿರಬೇಕು. ಅದಕ್ಕೆ ಸಂಬಂಧಿತ ಪ್ರಮಾಣಪತ್ರ ತಂದರೆ ಮಾತ್ರ ಪ್ರವೇಶ ಎನ್ನುತ್ತಿದ್ದಾರೆ ಪ್ರಾಚಾರ್ಯರು.
