ಉಡುಪಿ: ಇತ್ತೀಚೆಗೆಷ್ಟೇ ಬಿಡುಗಡೆಯಾದ ಕನ್ನಡದ ಕಾಂತಾರ ಸಿನಿಮಾ ರಾಜ್ಯ ಸೇರಿದಂತೆ ಇಡೀ ಭಾರತದಾದ್ಯಂತ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಮೊದಲಿಗೆ ಕನ್ನಡ ಭಾಷೆಯಲ್ಲಿ ಮಾತ್ರವೇ ತೆರೆಕಂಡ ಈ ಸಿನಿಮಾ ನಂತರ ಜನಪ್ರಿಯತೆಯ ಆಧಾರದ ಮೇಲೆ ತಮಿಳು, ತೆಲುಗು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳಿಗೂ ಡಬ್ ಆಗಿದ್ದು, ಎಲ್ಲಾ ಕಡೆಗಳಿಂದ ಅತ್ಯುತ್ತಮ ಪ್ರತಿಕ್ರಿಯೆ ದೊರೆತಿದ್ದು, ಉತ್ತಮ ಪ್ರದರ್ಶನ ಕಾಣುತ್ತಿದೆ. ಕಾಂತಾರ ಸಿನಿಮಾವನ್ನು ಕೇವಲ ಸ್ಯಾಂಡಲ್ವುಡ್ ನಟರು ಮಾತ್ರವಲ್ಲದೇ, ಎಲ್ಲಾ ಭಾಷೆಯ ಕಲಾವಿದರು ಹಾಡಿ ಹೊಗಳಿದ್ದಾರೆ. ಚಿತ್ರದ ಕಥೆ, ನಿರ್ದೇಶನ, ಮತ್ತು ನಟನೆ ಹಾಗೂ ಕಥೆಯಲ್ಲಿ ಬರುವ ದೈವಾರಾಧನೆಯನ್ನು ಮೆಚ್ಚಿಕೊಂಡಿದ್ದಾರೆ. ಆದರೆ ಸದಾ ವಿವಾದಾತ್ಮಕ ಹೇಳಿಕೆಗಳಿಗೆಂದೇ ಜನಪ್ರಿಯವಾಗಿರುವ ನಟ ಚೇತನ್ ಈ ಸಿನಿಮಾ ಕುರಿತು ಮಾತನಾಡಿ, ಇದೀಗ ಪೇಚಿಗೆ ಸಿಲುಕಿದ್ದಾರೆ.
