ಬೆಂಗಳೂರಿನ ಖಾಸಗಿ ಕಂಪನಿ ಉದ್ಯೋಗಿಯಾಗಿರುವ ಗ್ರಾಹಕರೊಬ್ಬರು ಮನೆಯ ಸಾಮಾನುಗಳನ್ನು ದಾವಣಗೆರೆಗೆ ಕಳುಹಿಸಲು ಆ. 18 ರಂದು ಗೂಗಲ್ನಲ್ಲಿ ಹುಡುಕಾಟ ಮಾಡುವಾಗ ‘ಅಗರವಾಲ್ ಮೂವರ್ಸ್ ಆಂಡ್ ಪ್ಯಾಕರ್ಸ್’ ಎಂಬ ಸಂಸ್ಥೆಯ ಮಾಹಿತಿ ದೊರಕಿತು. ಆ ವಿಳಾಸಕ್ಕೆ ಇ-ಮೇಲ್ ಐಡಿ, ಮೊಬೈಲ್ ಸಂಖ್ಯೆ, ಲೊಕೇಶನ್ ಶೇರ್ ಮಾಡಿದರು. ಅಲ್ಲಿಂದ ಒಬ್ಬರು ಕರೆ ಮಾಡಿ 40 ಸಾವಿರ ರೂ.ಗಳ ಕೊಟೇಷನ್ ಕಳುಹಿಸಿದರು. ಅದು ಇಷ್ಟವಾಗದ ಕಾರಣ ಗ್ರಾಹಕ ಸುಮ್ಮನಾದರು. ಅದಾದ 2 ಗಂಟೆಗಳ ನಂತರ ‘ವಿಆರ್ಎಲ್ ಲಾಜಿಸ್ಟಿಕ್ಸ್ ಪ್ಯಾಕರ್ಸ್ ಆಂಡ್ ಮೂವರ್ಸ್’ ನಿಂದ ಎಂದು ಹೇಳಿಕೊಂಡು ವಾಟ್ಸ್ ಆಪ್ ಸಂದೇಶ ಬಂದಿದೆ. ನಾವು 12 ಸಾವಿರ ರೂ.ಗಳಿಗೆ ಬಬಲ್ ಪ್ಯಾಕಿಂಗ್, ಪ್ಲಾಸ್ಟಿಕ್ ಪ್ಯಾಕಿಂಗ್, ಲೋಡಿಂಗ್, ಅನ್ಲೋಡಿಂಗ್ ಸೇವೆ ನೀಡುವುದಾಗಿ ನಂಬಿಸಿದ್ದಾರೆ. ಸೆ.18 ರಂದು ಆ ಗ್ರಾಹಕ 1 ಸಾವಿರ ರೂ. ಮುಂಗಡ ಪಾವತಿಸಿದ್ದಾರೆ. 22 ರಂದು ಬೆಳಗ್ಗೆ ಬೆಂಗಳೂರಿನ ಮನೆಯಿಂದ ಸಾಮಾನುಗಳನ್ನು ಪ್ಯಾಕಿಂಗ್ ಮಾಡಿಕೊಂಡು ಹೋಗಿದ್ದಾರೆ. ಅದಾದ ಸ್ವಲ್ಪ ಹೊತ್ತಿನಲ್ಲೇ ಮತ್ತೊಮ್ಮೆ ಕರೆ ಮಾಡಿ ಬಾಕಿ 11 ಸಾವಿರ ರೂ. ಕಟ್ಟಿಸಿಕೊಂಡಿದ್ದಾರೆ.
