ಅಬಕಾರಿ ಸುಂಕದ ಹೆಚ್ಚಳದಿಂದ ಗ್ರಾಹಕರ ಮೇಲೆ ಯಾವುದೇ ಹೊರೆ ಬೀಳುವುದಿಲ್ಲ ಎಂಬುದು ಸಮಾಧಾನದ ಸಂಗತಿ. ಆದರೆ, ಕಚ್ಚಾತೈಲದ ಬೆಲೆ ಏರಿಕೆ ಆದಾಗ ಪೆಟ್ರೋಲ್, ಡೀಸೆಲ್ ಬೆಲೆಯನ್ನು ತಕ್ಷಣವೇ ಹೆಚ್ಚಿಸಿ, ಆ ಹೊರೆಯನ್ನು ಜನರಿಗೆ ವರ್ಗಾಯಿಸುವುದು ಮಾಮೂಲಿಯಾಗಿ ನಡೆದು ಬಂದಿದೆ. ಹೀಗಿರುವಾಗ, ಅಪರೂಪಕ್ಕೆ ಎಂಬಂತೆ ದರ ಕುಸಿದಿರುವಾಗ ಪೆಟ್ರೋಲ್, ಡೀಸೆಲ್ನ ಬೆಲೆಯನ್ನು ತಗ್ಗಿಸಿ ಅದರ ಲಾಭವನ್ನು ಗ್ರಾಹಕರಿಗೆ ವರ್ಗಾಯಿಸಬೇಕಿತ್ತು ಎಂಬ ಅಭಿಪ್ರಾಯಗಳು ವ್ಯಾಪಕ ಪ್ರಮಾಣದಲ್ಲಿ ಕೇಳಿಬಂದಿವೆ. ಬೆಲೆಏರಿಕೆಯಾದಾಗ ಅನಿವಾರ್ಯವಾಗಿ ಜನರ ಜೇಬಿನ ಮೇಲೆ ಭಾರ ಬೀಳುತ್ತದೆ. ಇಂಥ ಸಂದರ್ಭದಲ್ಲಿ ಜನರಿಗೆ ಕೊಂಚ ನಿರಾಳತೆ ಒದಗಿಸಬಹುದಾಗಿತ್ತು. ಆದರೆ, ಕೇಂದ್ರ ಸರ್ಕಾರದ ಸದ್ಯದ ಪರಿಸ್ಥಿತಿ ಇದಕ್ಕೆ ತದ್ವಿರುದ್ಧವಾಗಿದೆ. ಈ ಬಾರಿ ಜಿಎಸ್ಟಿ ಸಂಗ್ರಹ ಸೇರಿ, ಇತರೆ ತೆರಿಗೆಗಳ ಸಂಗ್ರಹವೂ ಕುಸಿದಿರುವುದರಿಂದ ಸಂಪನ್ಮೂಲ ಕ್ರೋಡೀಕರಣಕ್ಕೆ ಹೊಸ ದಾರಿಗಳನ್ನು ಶೋಧಿಸುತ್ತಿದೆ ಎಂಬುದು ಗೊತ್ತಿರುವಂಥದ್ದೇ.
