ಶೈಕ್ಷಣಿಕ ಬದುಕಿನ ಮಹತ್ವದ ಘಟ್ಟವಾದ ದ್ವಿತೀಯ ಪಿಯು ಫಲಿತಾಂಶ ಪ್ರಕಟವಾಗಿರುವುದರಿಂದ, ಮುಂದಿನ ಶೈಕ್ಷಣಿಕ ಪ್ರಕ್ರಿಯೆಗಳು ಇಷ್ಟರಲ್ಲೇ ಗರಿಗೆದರಲಿವೆ. ಕರೊನಾ ಸೋಂಕಿನ ಹಾವಳಿ ಎಲ್ಲ ವಲಯಗಳಿಗೆ ತಟ್ಟಿದ್ದರೂ ಶೈಕ್ಷಣಿಕ ವಲಯ ಮಾತ್ರ ಅಸ್ತವ್ಯಸ್ತವಾಗಿ ಹೋಗಿದೆ. ಸೋಂಕು ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಇಷ್ಟರಲ್ಲೇ ಶಾಲಾ-ಕಾಲೇಜುಗಳನ್ನು ಆರಂಭಿಸುವುದು ಸಾಧ್ಯವಿಲ್ಲ. ಸೆಪ್ಟೆಂಬರ್-ಅಕ್ಟೋಬರ್ ಅವಧಿಯಲ್ಲಿ ಪುನರಾರಂಭಗೊಳ್ಳಬಹುದೇ ಎಂಬ ಪ್ರಶ್ನೆಗೆ ಖಚಿತ ಉತ್ತರ ನೀಡಲು ಸಾಧ್ಯವಾಗುತ್ತಿಲ್ಲ. ಹಾಗಾಗಿ, ತರಗತಿಗಳು ಹೇಗೆ, ಮಕ್ಕಳ ಭವಿಷ್ಯ ಹೇಗೆ ಎಂಬ ಚಿಂತೆ ಪಾಲಕರನ್ನು ಕಾಡುತ್ತಿರುವುದು ನಿಜ. ಕಾಲೇಜುಗಳು ಆರಂಭಗೊಂಡಿಲ್ಲವಾದರೂ, ಶೈಕ್ಷಣಿಕ ಚಟುವಟಿಕೆಗಳು ಸ್ತಬ್ಧಗೊಂಡಿಲ್ಲ. ಶೈಕ್ಷಣಿಕ ಸಂಸ್ಥೆಗಳು ತಂತ್ರಜ್ಞಾನದ ಹಲವು ಸಾಧ್ಯತೆಗಳನ್ನು ಬಳಸಿಕೊಂಡು ಆನ್ಲೈನ್ ತರಗತಿ, ಪಾಠದ ಟಿಪ್ಪಣಿ ನೀಡುವುದು, ಕಿರುಪರೀಕ್ಷೆ ನಡೆಸುವುದು, ಅಸೈನ್ವೆುಂಟ್ ನೀಡಿ, ಪರಿಶೀಲಿಸುವುದು ಹೀಗೆ ಹಲವು ಪ್ರಕ್ರಿಯೆಗಳನ್ನು ಪರಿಣಾಮಕಾರಿಯಾಗಿಯೇ ನಡೆಸುತ್ತಿವೆ. ಪದವಿ ತರಗತಿಗಳು ಬಹುತೇಕ ಆನ್ಲೈನ್ ಬಲದ ಮೇಲೆಯೇ ನಡೆಯುತ್ತಿವೆ. ಆದರೆ, ಇವು ತರಗತಿಯಲ್ಲಿನ ಕಲಿಕೆಯಂತೆ ಆಗುವುದಿಲ್ಲ ಎಂಬ ವಾಸ್ತವ ಬೋಧಕ ಸಿಬ್ಬಂದಿಗೂ, ವಿದ್ಯಾರ್ಥಿಗಳಿಗೂ ಗೊತ್ತಿದೆ. ಅಲ್ಲದೆ, ಹಲವೆಡೆ ಈ ಹೊಸ ವ್ಯವಸ್ಥೆಗೆ ಹೊಂದಿಕೊಳ್ಳಲು ಹಲವು ಅಡ್ಡಿಆತಂಕಗಳು ಎದುರಾಗಿವೆ. ಈಗ ದ್ವಿತೀಯ ಪಿಯು ಉತ್ತೀರ್ಣವಾಗಿ ವಿವಿಧ ಪದವಿಗಳಿಗೆ ಪ್ರವೇಶ ಪಡೆಯುವ ವಿದ್ಯಾರ್ಥಿಗಳ ಎದುರು ಇಂಥ ಸವಾಲುಗಳು ಇರುವುದು ನಿಜ. ಹಾಗಂತ ಧೃತಿಗೆಡಬೇಕಿಲ್ಲ. ಪರಿಹಾರದ ಹಾದಿಗಳು ಇವೆ. ಸರ್ಕಾರ, ಶೈಕ್ಷಣಿಕ ಸಂಸ್ಥೆಗಳು, ಪಾಲಕರು, ವಿದ್ಯಾರ್ಥಿಗಳು ಹೀಗೆ ಎಲ್ಲರೂ ಒಟ್ಟಾಗಿ ಉತ್ತರ ಕಂಡುಕೊಳ್ಳಲು ಯತ್ನಿಸಬೇಕಿದೆ. ಶೈಕ್ಷಣಿಕ ವರ್ಷ ಸುಗಮವಾಗಿ, ವಿದ್ಯಾರ್ಥಿಗಳ ಕಲಿಕೆಗೆ ಪೂರಕವಾಗಿ ನಡೆಸುವಂಥ ಹೊಣೆ ಸರ್ಕಾರದ ಮುಂದೆ ಇದ್ದು, ಅದನ್ನು ಪರಿಣಾಮಕಾರಿಯಾಗಿ ನಿರ್ವಹಿಸಬೇಕಿದೆ.
