ಇಲ್ಲಿನ ಬಾಲಿವುಡ್, ಕ್ರೀಡಾಸಾಧಕರು, ಸಂಸ್ಕೃತಿ, ಅನಿವಾಸಿ ಭಾರತೀಯರ ಕೊಡುಗೆ ಇದೆಲ್ಲದರ ಬಗ್ಗೆಯೂ ಟ್ರಂಪ್ ಹೆಮ್ಮೆಯಿಂದ ಮಾತನಾಡಿದ್ದಾರೆ. ಎರಡು ರಾಷ್ಟ್ರಗಳ ನಡುವಿನ ಸಂಬಂಧಗಳು ಬಲಗೊಂಡು, ಹಲವು ರಂಗಗಳ ಶಕ್ತಿ ಹೆಚ್ಚಲು ಇವೆಲ್ಲ ದೊಡ್ಡ ಕೊಡುಗೆಯನ್ನೇ ನೀಡಲಿವೆ. ಭಾರತ ಮೊದಲಿನಂತಿಲ್ಲ. ಅದು ಬಲಾಢ್ಯ ರಾಷ್ಟ್ರವಾಗಿ ಬದಲಾಗಿದೆ ಮತ್ತು ಜಾಗತಿಕ ರಂಗದಲ್ಲಿ ಮಹತ್ವದ ಪಾತ್ರ ವಹಿಸುತ್ತಿದೆ ಎಂಬ ವಾಸ್ತವವನ್ನು ಅಮೆರಿಕ ಸಹಿತ ವಿಶ್ವದ ಹಲವಾರು ಶಕ್ತಿಶಾಲಿ ರಾಷ್ಟ್ರಗಳು ಮನಗಂಡಿವೆ. ಹಾಗಾಗಿಯೇ, ಪರಸ್ಪರ ಬಾಂಧವ್ಯವೃದ್ಧಿಗೆ ಒತ್ತು ನೀಡುತ್ತಿದ್ದು, ಇದಕ್ಕೆ ಪೂರಕ ಎಂಬಂತೆ ಭಾರತದ ವಿದೇಶಾಂಗ ನೀತಿಯೂ ಬಲಗೊಂಡಿದೆ. ಟ್ರಂಪ್ ಭೇಟಿ ಹಲವು ಪ್ರಶ್ನೆಗಳಿಗೆ ಉತ್ತರ ನೀಡುವ ಜತೆಗೆ ಎರಡೂ ರಾಷ್ಟ್ರಗಳ ನಡುವಿನ ಸ್ನೇಹ, ಸೌಹಾರ್ದವನ್ನೂ ಹೆಚ್ಚಿಸಿದೆ.
