ವಾಯುಮಾಲಿನ್ಯದ ಪ್ರಮಾಣವನ್ನು ಕಡಿಮೆ ಮಾಡುವುದು, ಸಂಚಾರ ದಟ್ಟಣೆ ನಿಯಂತ್ರಣ, ಅಂತಾರಾಷ್ಟ್ರೀಯ ನಗರ ಎಂಬ ಖ್ಯಾತಿಯ ದೆಹಲಿಯ ಮೂಲಸೌಕರ್ಯ ಉನ್ನತೀಕರಿಸುವುದು, ಕೊಳೆಗೇರಿಗಳಲ್ಲಿ ವಾಸಿಸುವ ಜನರ ಜೀವನಸ್ತರ ಹೆಚ್ಚಿಸುವುದು, ಜತೆಗೆ ಪ್ರಣಾಳಿಕೆಯಲ್ಲಿ ನೀಡಿರುವ ಭರವಸೆಗಳನ್ನು ಅನುಷ್ಠಾನಕ್ಕೆ ತರುವುದು ಆದ್ಯತೆ ಆಗಬೇಕಿದೆ. ಇದಕ್ಕೆಲ್ಲ ಹಣಕಾಸು ಮೂಲಗಳನ್ನು ಗಟ್ಟಿಗೊಳಿಸಿಕೊಳ್ಳುವುದು, ಭ್ರಷ್ಟಾಚಾರಕ್ಕೆ ಎಡೆ ಮಾಡಿಕೊಡದೆ ಯೋಜನೆಗಳನ್ನು ಪಾರದರ್ಶಕವಾಗಿ, ಪರಿಣಾಮಕಾರಿಯಾಗಿ ಜಾರಿಗೆ ತರುವುದು ಸೇರಿ ಹಲವು ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಕೇಜ್ರಿವಾಲರ ಈ ಅವಧಿಯನ್ನು ಎಲ್ಲರೂ ಕುತೂಹಲದಿಂದ ಗಮನಿಸುತ್ತಿದ್ದಾರೆ. ಹಾಗಾಗಿ, ಹಿಂದಿನ ತಪು್ಪಗಳು ಮರುಕಳಿಸದಂತೆ (ಅನಗತ್ಯ ಧರಣಿ, ಲೆಫ್ಟಿನಂಟ್ ಗವರ್ನರ್ ಜತೆ ಭಿನ್ನಾಭಿಪ್ರಾಯ) ಜಾಗ್ರತೆ ವಹಿಸಿ, ಜನರ ನಾಡಿಮಿಡಿತವನ್ನು ಅರಿತು ಕೆಲಸ ಮಾಡಬೇಕಿದೆ. ‘ನಾನು ಎಲ್ಲರ ಮುಖ್ಯಮಂತ್ರಿ’ ಎಂಬ ಮಾತನ್ನು ಕೇಜ್ರಿವಾಲ್ ಕೆಲಸಗಳ ಮೂಲಕ ಸಾಕಾರಗೊಳಿಸಬೇಕಿದೆ. ಅವರ ಮುಂದಿನ ಹಾದಿ ದೆಹಲಿಯ ಅಭಿವೃದ್ಧಿಗೆ ಹೊಸ ಗರಿ ಮೂಡಿಸಲಿ.
