ಸರ್ಕಾರಿ ಶಾಲೆಗಳ ಕುರಿತಾದ ಈ ಸಕಾರಾತ್ಮಕ ಬೆಳವಣಿಗೆ ಭರವಸೆ ಮೂಡಿಸುವಂಥದ್ದು ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಅದೆಷ್ಟೋ ಶಾಲೆಗಳು ಮೂಲಸೌಕರ್ಯವಿಲ್ಲದೆ ಬಳಲುತ್ತಿದ್ದು, ಅವುಗಳ ಕಾಯಕಲ್ಪಕ್ಕೆ ಮುಂದಾಗಬೇಕಿದೆ. ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚುತ್ತಿರುವುದರಿಂದ ಕೊಠಡಿಗಳ ದುರಸ್ತಿ ಮಾಡಿಸಿ, ಶೌಚಗೃಹ, ಶುದ್ಧ ಕುಡಿಯುವ ನೀರು, ಪಿಠೋಪಕರಣ, ಪಾಠೋಪಕರಣದ ವ್ಯವಸ್ಥೆ ಮಾಡಬೇಕಿದೆ. ಮಕ್ಕಳಿಗೆ ಸಮವಸ್ತ್ರಗಳಿಲ್ಲ, ಸಮರ್ಪಕವಾಗಿ ಪಠ್ಯಪುಸ್ತಕ ಪೂರೈಕೆಯಾಗಿಲ್ಲ. ಮಳೆ, ಗಾಳಿಯಿಂದ ಹಾನಿಗೀಡಾದ ಕಟ್ಟಡಗಳ ದುರಸ್ತಿಯಾಗಿಲ್ಲ. ಕಲಿಕಾ ಚೇತರಿಕೆ ಕಾರ್ಯಕ್ರಮ ನಿರ್ವಹಿಸಲು ಅತಿಥಿ ಶಿಕರಿಗೆ ತರಬೇತಿ ನೀಡಲಾಗಿಲ್ಲ. ಹೀಗೆ ಹಲವು ಕೊರತೆಗಳು ಢಾಳಾಗಿ ಕಂಡುಬರುತ್ತಿವೆ. ಮಕ್ಕಳ ಸಂಭ್ರಮಕ್ಕೆ, ಶಿಕ್ಷಕರ ಉತ್ಸಾಹಕ್ಕೆ, ಪ್ರಯತ್ನಗಳಿಗೆ ಈ ಕೊರತೆಗಳು ಅಡ್ಡಿಯಾಗಬಾರದು. ಪಾಲಕರು ಮಕ್ಕಳನ್ನು ಸರ್ಕಾರಿ ಶಾಲೆಗಳಿಗೆ ಸೇರಿಸುತ್ತಿರುವ ಹೊತ್ತಲ್ಲಿ ಮೂಲಸೌಕರ್ಯದ ವಿಸ್ತರಣೆಯ ಜತೆಗೆ ಸೂಕ್ತ ಕಲಿಕಾ ವಾತಾವರಣ ಸೃಷ್ಟಿಸುವುದು ಸರ್ಕಾರದ ಆದ್ಯತೆಯಾಗಬೇಕು.
