ಹಲವು ರಾಜ್ಯಗಳಲ್ಲಿ ಯಾವ ಬೆಳೆಗಳನ್ನು ಬೆಳೆಯಬೇಕು ಎಂಬುದನ್ನು ಆಯಾ ರಾಜ್ಯ ಸರ್ಕಾರಗಳೇ ನಿರ್ಧರಿಸುತ್ತವೆ. ಆದ್ದರಿಂದ, ಅಲ್ಲಿನ ಪ್ರದೇಶದಕ್ಕೆ ಬೇಕಾದ ಆಹಾರ ಧಾನ್ಯಗಳು, ಇತರ ಬೆಳೆಗಳನ್ನು ಸಮರ್ಪಕ ಪ್ರಮಾಣದಲ್ಲಿ ಬೆಳೆಯಲಾಗುತ್ತದೆ. ಆದರೆ, ಕರ್ನಾಟಕದಲ್ಲಿ ಆ ವ್ಯವಸ್ಥೆ ಇಲ್ಲ. ಇದರಿಂದ ವಾಣಿಜ್ಯ ಬೆಳೆಗಳ ಪಾರಮ್ಯ ಹೆಚ್ಚುತ್ತಿದೆ. ಅಲ್ಲದೆ, ಯಾವ ಬೆಳೆಗೆ ಹೆಚ್ಚು ಬೆಲೆ ಇದೆಯೋ ಅದನ್ನೇ ಬಹುತೇಕ ರೈತರು ಬೆಳೆಯಲು ಮುಂದಾಗುತ್ತಾರೆ. ಇದರಿಂದ ಉತ್ಪಾದನೆ ಪ್ರಮಾಣ ಹೆಚ್ಚಾಗಿ ಬೆಲೆ ದಿಢೀರೆಂದು ಕುಸಿದು, ರೈತರು ಮತ್ತೆ ಕಂಗಾಲಾಗುತ್ತಾರೆ. ರಾಜ್ಯದಲ್ಲಿ ಭತ್ತಕ್ಕೆ ಸಮರ್ಪಕ ಮಾರುಕಟ್ಟೆ ಇಲ್ಲದಿರುವುದರಿಂದ ಬಹುತೇಕ ರೈತರು ನೆರೆಯ ತಮಿಳುನಾಡು ಮಾರುಕಟ್ಟೆಯನ್ನು ಅವಲಂಬಿಸಿದ್ದಾರೆ. ಬೆಂಬಲ ಬೆಲೆಯ ಗೊಂದಲ, ಕೆಲವು ಅಕ್ಕಿ ಗಿರಣಿಗಳ ಏಕಸ್ವಾಮ್ಯ, ಏರಿಕೆಯಾಗುತ್ತಿರುವ ಕಾರ್ವಿುಕ ವೆಚ್ಚವೂ ರೈತರನ್ನು ಬಾಧಿಸುತ್ತಿದ್ದು, ಭತ್ತ ಬೆಳೆಯುವುದರಿಂದ ದೂರವಾಗುತ್ತಿದ್ದಾರೆ.
