ಇಂಥ ಸುಧಾರಣೆಯ ಅವಶ್ಯಕತೆ ತುಂಬ ಇತ್ತು. ಪ್ರಜಾಪ್ರಭುತ್ವದ ಆಶಯವನ್ನು, ಅದರ ಮೌಲ್ಯಗಳನ್ನು ಗಟ್ಟಿಗೊಳಿಸಲು ಈ ಆದೇಶ ಪೂರಕವಾಗಲಿದೆ. ರಾಜಕೀಯ ಪಕ್ಷಗಳ ಮೇಲಿನ ನೈತಿಕ ಜವಾಬ್ದಾರಿ ಹಿಂದೆಂದಿಗಿಂತಲೂ ಈಗ ಹೆಚ್ಚಿದೆ ಎಂಬುದನ್ನು ಗಮನಿಸಬೇಕು. ರಾಜಕೀಯ ಪಕ್ಷಗಳು ಸ್ವಯಂಪ್ರೇರಿತವಾಗಿ ಅಪರಾಧೀಕರಣಕ್ಕೆ, ಕಳಂಕಿತರಿಗೆ ಕಡಿವಾಣ ಹಾಕಿದ್ದಲ್ಲಿ ಈ ಸಮಸ್ಯೆ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಬೆಳೆಯುತ್ತಿರಲಿಲ್ಲ. ಇನ್ನಾದರೂ ರಾಜಕೀಯ ಪಕ್ಷಗಳು ಗಂಭಿರವಾಗಿ ವರ್ತಿಸಬೇಕು. ಸುಪ್ರೀಂ ಕೋರ್ಟ್, ಚುನಾವಣಾ ಆಯೋಗ ಸೂಚಿಸಿರುವ ಕ್ರಮಗಳನ್ನು ಚಾಚುತಪ್ಪದೆ ಪಾಲಿಸಬೇಕು. ಅಪರಾಧೀಕರಣದ ನಿಯಂತ್ರಣ ಬಹುದೊಡ್ಡ ಜವಾಬ್ದಾರಿ ಮತ್ತು ಈಗಿನ ತುರ್ತು ಅಗತ್ಯವೂ ಹೌದು. ಹಾಗಾಗಿ, ರಾಜನೀತಿಯಲ್ಲಿ ನೈತಿಕತೆ, ಮೌಲ್ಯಾಧಾರಿತ ಆರೋಗ್ಯಕರ ಸ್ಪರ್ಧೆ, ಪಾರದರ್ಶಕತೆಗಳನ್ನು ಅಳವಡಿಸಿಕೊಂಡು ಕಳಂಕಿತರನ್ನು ದೂರ ಇಡಬೇಕು. ಆಗಲೇ, ರಾಜಕೀಯ ವ್ಯವಸ್ಥೆ ಇನ್ನಷ್ಟು ಬಲಶಾಲಿಯಾಗಲು, ಸಮಾಜಮುಖಿಯಾಗಿ ಕೆಲಸ ಮಾಡಲು ಸಾಧ್ಯ.
