ತಿಳಿವಳಿಕೆ ಕೊರತೆಯಿಂದ ಅರ್ಜಿ ಸಲ್ಲಿಸಿ ದಾಖಲೆ ಪಡೆಯಲು ಸಾಧ್ಯವಾಗದ ರೈತರಿಗೆ ಇನ್ನೆರಡು ವರ್ಷ ಕಾಲಾವಕಾಶ ನೀಡಿ, ಅರ್ಜಿ ಪಡೆಯಬೇಕು ಎಂದು ಸಮಿತಿ ಹೇಳಿದ್ದು, ಈ ಶಿಫಾರಸನ್ನು ಸರ್ಕಾರ ಅಂಗೀಕರಿಸಿದೆ. ಹೀಗೆ ಪುನಃ ಅರ್ಜಿ ಕರೆಯುವುದಕ್ಕಾಗಿ ಕಾಯ್ದೆಗೆ ತಿದ್ದುಪಡಿ ತರಬೇಕಾಗುತ್ತದೆ. ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರೊಂದಿಗೆ ರ್ಚಚಿಸಿ, ಈ ಬಗ್ಗೆ ನಿರ್ಣಯ ತೆಗೆದುಕೊಳ್ಳಲಾಗುವುದು ಎಂಬ ಸಕಾರಾತ್ಮಕ ಅಭಿಪ್ರಾಯವನ್ನು ಸಚಿವ ಅಶೋಕ್ ಹೇಳಿದ್ದಾರೆ. ನಾನಾ ಕಾರಣಕ್ಕೆ ಕೃಷಿ ಲಾಭದಾಯಕವಲ್ಲ ಎಂಬ ಅನಿಸಿಕೆ ಬಲವಾಗುತ್ತ, ಬೆಲೆ-ಫಸಲು ಏರಿಳಿತಗಳ ನಡುವೆ ರೈತರು ಏಗುತ್ತಿರುವಾಗ, ಅನೇಕರು ಕೃಷಿಗೆ ವಿಮುಖರಾಗುತ್ತಿರುವ ಹೊತ್ತಿನಲ್ಲಿ ಇಂಥ ನಿರ್ಧಾರಗಳು ರೈತರಲ್ಲಿ ಒಂದಷ್ಟು ಭರವಸೆ ತುಂಬಬಲ್ಲವು. ಹಿಂದಿನ ಕಾಲದಲ್ಲಿ ಸಮಾಜಕ್ಕೆ ಬೇರೆ ಬೇರೆ ಬಗೆಯಲ್ಲಿ ನೆರವಾದವರಿಗೆ, ಸಮಾಜಸೇವಕರಿಗೆ ಬಳುವಳಿ ರೂಪದಲ್ಲಿ ಜಮೀನು ನೀಡುವ ರೂಢಿ ಇತ್ತು. 100, 200, 500 ಎಕರೆ ಹೀಗೆ ದೊಡ್ಡ ಪ್ರಮಾಣದ ಭೂಮಿಯನ್ನೂ ನೀಡಿದ ಉದಾಹರಣೆಗಳಿವೆ. ಆದರೆ ಹಾಗೆ ಭೂಮಿ ಪಡೆದವರೆಲ್ಲರೂ ಉಳುಮೆ ಮಾಡಲಾಗದೆ ರೈತರಿಗೆ ನೀಡುತ್ತಿದ್ದರು. ಈ ಭೂಮಿಯ ಹಕ್ಕನ್ನು ಆಯಾ ರೈತರಿಗೆ ನೀಡಬೇಕೆಂಬ ಆಗ್ರಹ-ಬೇಡಿಕೆ ಬಹಳ ವರ್ಷಗಳಿಂದ ಇತ್ತು.
