ಸರ್ಕಾರದ ಯೋಜನೆಗಳಲ್ಲಿ ಬದಲಾವಣೆ, ಸುಧಾರಣೆ, ಪಾರದರ್ಶಕತೆಗೆ ಒತ್ತು ನೀಡಲು ತಂತ್ರಜ್ಞಾನದ ಸ್ಪರ್ಶ ಅಗತ್ಯವೇನೋ ಹೌದು. ಆದರೆ, ಸೂಕ್ತ ತಯಾರಿಗಳೇ ಇಲ್ಲದೆ, ಲೋಪದೋಷಗಳನ್ನು ಸರಿಪಡಿಸದೆ, ಸಮರ್ಪಕ ವ್ಯವಸ್ಥೆ ಮಾಡಿಕೊಳ್ಳದೆ ಬದಲಾವಣೆ ಮಾಡಿದರೆ ಅದರಿಂದ ಜನಾಕ್ರೋಶಕ್ಕೆ ಗುರಿಯಾಗಬೇಕಾಗುತ್ತದೆ ಎಂಬುದಕ್ಕೆ ಆಸ್ತಿ ನೋಂದಣಿಯ ಆನ್ಲೈನ್ ಸೇವೆಯೇ ಸಾಕ್ಷಿ ಎನ್ನಬಹುದು. ಎರಡು ವರ್ಷಗಳ ಹಿಂದೆಯೇ ಈ ಪ್ರಯತ್ನ ವಿಫಲವಾಗಿತ್ತು. ಆ ಬಳಿಕವಾದರೂ ಎಚ್ಚೆತ್ತುಕೊಂಡು ತೊಂದರೆಗಳನ್ನು ನಿವಾರಿಸಿದ್ದರೆ ಮತ್ತೊಂದು ವಿಫಲಯತ್ನ ಎದುರಿಸಬೇಕಾದ ಪ್ರಮೇಯ ಬರುತ್ತಿರಲಿಲ್ಲ. ಶ್ರೀಸಾಮಾನ್ಯರೇ ಹೆಚ್ಚಾಗಿರುವ ನಮ್ಮ ರಾಜ್ಯದಲ್ಲಿ ಎಲ್ಲರಿಗೂ ಕಂಪ್ಯೂಟರ್ ಜ್ಞಾನ ಇಲ್ಲ. ಇದ್ದರೂ ದಾಖಲೆಗಳನ್ನು ಅಪ್ಲೋಡ್ ಮಾಡುವ ಪ್ರಕ್ರಿಯೆ ಕಠಿಣ. ಅಲ್ಲದೆ ಈ ಹಿಂದೆಯೂ ಕಾಡಿದ್ದ ಸರ್ವರ್ ಸಮಸ್ಯೆ ಸೇರಿ ಯಾವುದೇ ತಾಂತ್ರಿಕ ತೊಡಕುಗಳು ನಿವಾರಣೆಯಾಗಿಲ್ಲ. ಹಾಗಾಗಿಯೇ, ಉಪ ನೋಂದಣಾಧಿಕಾರಿ ಕಚೇರಿಗಳಲ್ಲಿ ಆಸ್ತಿ ಕ್ರಯ, ಮಾರಾಟ, ವರ್ಗಾವಣೆ ಪತ್ರ, ಅಡಮಾನ ಪತ್ರ ನೋಂದಣಿಗೆ ಜಾರಿಗೆ ತಂದ ಬಹುನಿರೀಕ್ಷಿತ ಆನ್ಲೈನ್ ಸೇವೆ ಆರಂಭದಲ್ಲೇ ವಿಘ್ನ ಕಂಡಿದೆ.
