ವಿದ್ಯುತ್ ವಿತರಣೆ ವ್ಯವಸ್ಥೆಯ ಸುಧಾರಣೆಗಾಗಿ ಕಾಯ್ದೆ ತಿದ್ದುಪಡಿಯ ಕರಡನ್ನು 2014ರಲ್ಲೇ, ಸಿದ್ಧಪಡಿಸಿ ಲೋಕಸಭೆಯಲ್ಲಿ ಮಂಡಿಸಲಾಗಿತ್ತು. ಆಗ ಲೋಕಸಭೆಯ ಅವಧಿ ಕೊನೆಗೊಂಡಿದ್ದರಿಂದ ಮಸೂದೆ ರದ್ದಾಗಿತ್ತು. 2018, 2019ರಲ್ಲೂ ಕರಡು ರಚಿಸಲಾಗಿತ್ತು. ಪ್ರಸಕ್ತ ನಾಲ್ಕನೇ ಪ್ರಯತ್ನದಲ್ಲಿಯಾದರೂ ಪ್ರಸಕ್ತ ಕಾಯ್ದೆಗೆ ತಿದ್ದುಪಡಿ ತರುವ ಉದ್ದೇಶವನ್ನು ಕೇಂದ್ರ ಹೊಂದಿದೆ. ಪೂರೈಕೆದಾರರ ಹಿತರಕ್ಷಣೆಗೆ ಒತ್ತು, ರಾಷ್ಟ್ರೀಯ ನವೀಕರಿಸಬಲ್ಲ ಇಂಧನ ನೀತಿ, ವಿದ್ಯುತ್ ಪ್ರಸರಣ ನಿರ್ಧಾರದಲ್ಲಿ ಕೇಂದ್ರ ಮತ್ತು ರಾಜ್ಯದ ಪಾಲುದಾರಿಕೆ, ಪ್ರಾಧಿಕಾರಕ್ಕೆ ಸಿವಿಲ್ ನ್ಯಾಯಾಲಯದ ಅಧಿಕಾರ-ಇವು ಕರಡು ಒಳಗೊಂಡಿರುವ ಮುಖ್ಯಾಂಶಗಳು. ವಿದ್ಯುತ್ ಮಾರಾಟ, ಖರೀದಿ ಹಾಗೂ ಪ್ರಸರಣ ವ್ಯವಸ್ಥೆಯ ಸಬ್ ಲೈಸೆನ್ಸಿಂಗ್ ಮತ್ತು ಫ್ರಾಂಚೈಸಿ ವ್ಯವಸ್ಥೆ ಖಾಸಗಿಯವರ ಪಾಲಾದರೆ ರೈತರಿಗೆ ಉಚಿತವಾಗಿ ನೀಡುತ್ತಿರುವ 10 ಎಚ್ಪಿವರೆಗಿನ ಮತ್ತು ಬಡವರಿಗೆ ನೀಡಲಾಗುವ ಸಬ್ಸಿಡಿ ದರದ ವಿದ್ಯುತ್ ಪೂರೈಕೆಯಲ್ಲಿ ವ್ಯತ್ಯಯವಾಗುವ ಸಾಧ್ಯತೆ ಇದೆ. ಅಲ್ಲದೆ, ಸಣ್ಣ ಕೈಗಾರಿಕೆಗಳಿಗೆ ನೀಡಿರುವ ವಿದ್ಯುತ್ ರಿಯಾಯಿತಿಗಳಿಗೂ ಕಡಿವಾಣ ಬೀಳಲಿದೆ ಎಂದು ಹೇಳಲಾಗುತ್ತಿದೆ.
