ಗ್ರಾಮೀಣ ಪ್ರದೇಶದಲ್ಲಿ 2,400 ಚದರ ಅಡಿ ಅಳತೆಯ ಅಥವಾ ನಗರ ಪ್ರದೇಶದಲ್ಲಿ 1,200 ಅಳತೆಯ ನಿವೇಶನಗಳನ್ನು ಅರ್ಜಿದಾರರ ತವರು ತಾಲೂಕಿನಲ್ಲಿ ನೀಡಬಹುದಾಗಿದೆ. ಒಂದು ವೇಳೆ ಅರ್ಜಿದಾರರ ಸ್ವಂತ ತಾಲೂಕಿನಲ್ಲಿ ನಿವೇಶನಗಳು ಲಭ್ಯವಿಲ್ಲದಿದ್ದರೆ, ಆ ಜಿಲ್ಲೆಯ ಇತರೆ ತಾಲೂಕುಗಳಲ್ಲಿ ನಿವೇಶನ ಒದಗಿಸಬಹುದು ಎಂದು ಸುತ್ತೋಲೆಯಲ್ಲಿ ಜಿಲ್ಲಾಡಳಿತಗಳಿಗೆ ತಿಳಿಸಲಾಗಿದೆ. ದೇಶದ ರಕ್ಷಣೆಗಾಗಿ ತಮ್ಮ ಪ್ರಾಣವನ್ನೇ ಪಣಕ್ಕಿಟ್ಟು ಹೋರಾಡುವ ಸೈನಿಕರು ನಿವೃತ್ತರಾದ ನಂತರ ನೆಮ್ಮದಿಯ ಜೀವನ ನಡೆಸಲು ಅನುಕೂಲ ಮಾಡಿಕೊಟ್ಟುವ ನಿಟ್ಟಿನಲ್ಲಿ ಉಚಿತವಾಗಿ ಸರ್ಕಾರದ ವತಿಯಿಂದ ಜಮೀನು ನೀಡಲಾಗುತ್ತದೆ. ಕರ್ನಾಟಕ ಭೂ ಮಂಜೂರಾತಿ ನಿಯಮಗಳು 1969ರ ಪ್ರಕಾರ 10 ಎಕರೆವರೆಗೆ ಜಮೀನು ಪಡೆದುಕೊಳ್ಳಲು ಅವಕಾಶವಿದೆ. ಆದರೆ, ಅರ್ಜಿ ಸಲ್ಲಿಸಿ 15 ವರ್ಷಗಳಿಗೂ ಅಧಿಕ ಕಾಲ ಕಾದರೂ ಜಮೀನು ಲಭ್ಯವಾಗದಿರುವ ಪ್ರಕರಣ ಸಂಖ್ಯೆ ಸಾಕಷ್ಟಿಸಿದೆ. ಸರ್ಕಾರಿ ಭೂಮಿ ಕೊರತೆಯಿಂದ ಸೃಷ್ಟಿಯಾಗಿರುವ ಈ ಸಮಸ್ಯೆಗೆ ಸರ್ಕಾರ ಈಗ ಪರ್ಯಾಯ ಮಾರ್ಗಗಳ ಮೂಲಕ ಪರಿಹಾರ ಕಂಡುಕೊಳ್ಳಲು ಮುಂದಾಗಿರುವುದು ಸೂಕ್ತವಾಗಿದೆ.
