ಇಷ್ಟಲಿಂಗದ ಅಳತೆ, ಪೂಜೆಯ ಪದ್ಧತಿ ಮತ್ತು ಪ್ರಕಾರ ಇತ್ಯಾದಿಗಳ ಬಗ್ಗೆ ಶಿವನಿಂದ ಆಲಿಸಿದ ನಂತರ ರುದ್ರನು ಹೇ ದೇವನೆ ! ನೀನು ಸರ್ವವ್ಯಾಪಿಯಾಗಿರುವೆ. ಆದುದರಿಂದ ನಿನ್ನನ್ನು ಒಂದು ಸ್ಥಾನದಲ್ಲಿ ಹೇಗೆ ಆಹ್ವಾನಿಸುವುದು? ಹೇ ಪ್ರಭುವೆ! ಎಲ್ಲ ಕಡೆಗೂ ನೀನು ಯಾವಾಗಲೂ ಇರುವುದರಿಂದ ಒಂದು ಸ್ಥಾನದಲ್ಲಿ ನಿನ್ನನ್ನು ಹೇಗೆ ಸಂಸ್ಥಾಪನೆ ಮಾಡುವುದು? ಮತ್ತು ಸಂಸ್ಥಾಪನೆ ಹಾಗೂ ’ಸನ್ನಿಧಾನ’ ವಿಧಿಗಳನ್ನು ಹೇಗೆ ಆಚರಿಸಬೇಕು? ನಿನ್ನ ಯಾವ ಮುಖದಲ್ಲಿ ನೈವೇದ್ಯವನ್ನು ಅರ್ಪಿಸಬೇಕು? ಎಂಬುದನ್ನು ಹೇಳು ಎಂದು ವಿನಂತಿಸಿಕೊಳ್ಳುತ್ತಾನೆ. ನಿನಗೆ ಅರ್ಪಿಸಿದ ನೈವೇದ್ಯವು ಕೆಲವರಿಗೆ ಸ್ವೀಕಾರಾರ್ಹವೂ ಮತ್ತೆ ಕೆಲವರಿಗೆ ಅಸ್ವೀಕಾರಾರ್ಹವೂ ಆಗಿದೆ ಎಂದು ಹೇಳಲಾಗಿದೆ. ಆದುದರಿಂದ ಯಾರು ಸ್ವೀಕರಿಸಬೇಕು ಎಂಬುದನ್ನು ವಿವೇಚನೆ ಮಾಡಿ ತಿಳಿಸುವುದಾಗಬೇಕು.
