ಬಿಜೆಪಿಗೆ ವೇದಾಂತ ಕಂಪನಿ ದೇಣಿಗೆ ನಾಲ್ಕು ಪಟ್ಟು ಏರಿಕೆ

ನವದೆಹಲಿ: ಶತಕೋಟ್ಯಧಿಪತಿ ಅನಿಲ್ ಅಗರವಾಲ್ ಅವರ ಗಣಿಗಾರಿಕಾ ಕಂಪನಿಯಾದ ವೇದಾಂತ ಲಿಮಿಟೆಡ್ ಬಿಜೆಪಿಗೆ 2024-2025ರಲ್ಲಿ 97 ಕೋಟಿ ರೂ. ದೇಣಿಗೆ ನೀಡಿದ್ದು, ಇದು ಪ್ರತಿ ವರ್ಷದ ದೇಣಿಗೆಗೆ ಹೋಲಿಸಿದರೆ ಸುಮಾರು ನಾಲ್ಕು ಪಟ್ಟು ಹೆಚ್ಚಾಗಿದೆ. ಈ ವಿಷಯವನ್ನು ಕಂಪನಿಯೇ ತನ್ನ ಇತ್ತೀಚಿನ ವಾರ್ಷಿಕ ವರದಿಯಲ್ಲಿ ತಿಳಿಸಿದೆ. ಇತರ ಖರ್ಚುಗಳು (ಮಿಸಲೇನಿಯಸ್) ವಿಭಾಗದಡಿ, ರಾಜಕೀಯ ದೇಣಿಗೆಗಳ ಜೊತೆಗೆ ತನ್ನ ಮೂಲ ಕಂಪನಿಯಾದ ಲಂಡನ್ ಲಿಸ್ಟೆಡ್ ವೇದಾಂತ ರಿಸೋರ್ಸಸ್ ಪಿಎಲ್​ಸಿಗೆ ಪಾವತಿಸಿದ ನಿರ್ವಹಣೆ ಮತ್ತು ಬ್ರಾಂಡ್ ಶುಲ್ಕದ ಖರ್ಚುಗಳನ್ನೂ ಕಂಪನಿ ಈ ವರದಿಯಲ್ಲಿ ವಿವರಿಸಿದೆ.

2023-24ರಲ್ಲಿ ಎಲ್ಲ ಪಕ್ಷಗಳಿಗೆ ಸೇರಿ ಒಟ್ಟು 97 ಕೋಟಿ ರೂ. ದೇಣಿಗೆ ನೀಡಿದ್ದ ಕಂಪನಿ, 2024-25ರಲ್ಲಿ 157 ಕೋಟಿ ರೂ. ನೀಡಿದೆ. 2023-24ರಲ್ಲಿ ಬಿಜೆಪಿಗೆ 26 ಕೋಟಿ ರೂ. ನೀಡಿದ್ದ ಕಂಪನಿ 2024-25ರಲ್ಲಿ 97 ಕೋಟಿ ರೂ. ನೀಡಿದೆ. ಇದು ಸುಮಾರು 4 ಪಟ್ಟು ಅಧಿಕ. ಇನ್ನೊಂದೆಡೆ, ಪ್ರಮುಖ ವಿರೋಧ ಪಕ್ಷವಾದ ಕಾಂಗ್ರೆಸ್​ಗೆ 2023-24ರಲ್ಲಿ 49 ಕೋಟಿ ರೂ. ನೀಡಿದ್ದ ಕಂಪನಿ, 2024-25ರಲ್ಲಿ ಕೇವಲ 10 ಕೋಟಿ ರೂ. ನೀಡಿದೆ. ಬಿಜು ಜನತಾದಳಕ್ಕೆ 25 ಕೋಟಿ ರೂ. (ಹಿಂದಿನ ವರ್ಷ 15 ಕೋಟಿ ರೂ.), ಜಾರ್ಖಂಡ್ ಮುಕ್ತಿ ಮೋರ್ಚಾಕ್ಕೆ 20 ಕೋಟಿ ರೂ. (ಹಿಂದಿನ ವರ್ಷ 5 ಕೋಟಿ ರೂ.) ನೀಡಿದೆ.

ಹಿಂದೆ 457 ಕೋಟಿ ರೂ. ಕೊಟ್ಟಿತ್ತು!: 2022-23ರಲ್ಲಿ ಈ ಕಂಪನಿಯು ರಾಜಕೀಯ ಪಕ್ಷಗಳಿಗೆ ಒಟ್ಟು 155 ಕೋಟಿ ರೂ. ಮತ್ತು 2021-2022ರಲ್ಲಿ 123 ಕೋಟಿ ರೂ. ದೇಣಿಗೆ ನೀಡಿತ್ತು. ಹಿಂದಿನ ದೇಣಿಗೆಗಳ ಫಲಾನುಭವಿಗಳ ವಿವರ ನೀಡಲಾಗಿರಲಿಲ್ಲ. ಚುನಾವಣಾ ಬಾಂಡ್​ಗಳ ಮೂಲಕ 2017ರಿಂದ 2022ರವರೆಗೆ ವಿವಿಧ ಪಕ್ಷಗಳಿಗೆ ಒಟ್ಟು 457 ಕೋಟಿ ರೂ. ದೇಣಿಗೆ ನೀಡಿತ್ತು. ಪಕ್ಷಗಳಿಗೆ ಅನಾಮಧೇಯವಾಗಿ ಅನಿಯಮಿತ ಮೊತ್ತವನ್ನು ದೇಣಿಗೆಯಾಗಿ ನೀಡಲು ಚುನಾವಣಾ ಬಾಂಡ್​ನಲ್ಲಿ ಅವಕಾಶ ಇತ್ತು. ಕಳೆದ ವರ್ಷ ಸುಪ್ರೀಂ ಕೋರ್ಟ್ ಅದನ್ನು ಅಸಾಂವಿಧಾನಿಕ ಎಂದು ಬಣ್ಣಿಸಿ ನಿಷೇಧಿಸಿತು.

ವಿವಿಧ ಕಂಪನಿಗಳದ್ದೂ ಇದೆ...: ವೇದಾಂತದ ಜನಹಿತ ಚುನಾವಣಾ ಟ್ರಸ್ಟ್ನಿಂದ ರಾಜಕೀಯ ಪಕ್ಷಗಳಿಗೆ ಈ ದೇಣಿಗೆ ಪಾವತಿಯಾಗುತ್ತದೆ. ಇಂತಹ ಟ್ರಸ್ಟ್ ಇದೊಂದೇ ಅಲ್ಲ. ಇತರ ಕಂಪನಿಗಳೂ ಇಂತಹ ಟ್ರಸ್ಟ್ ರಚಿಸಿಕೊಂಡಿವೆ. ಟಾಟಾದ ಪೋ›ಗ್ರೆಸಿವ್ ಚುನಾವಣಾ ಟ್ರಸ್ಟ್, ರಿಲಯನ್ಸ್​ನ ಪೀಪಲ್ಸ್ ಚುನಾವಣಾ ಟ್ರಸ್ಟ್, ಭಾರತಿ ಗ್ರೂಪ್​ನ ಸತ್ಯ ಚುನಾವಣಾ ಟ್ರಸ್ಟ್, ಎಂಪಿ ಬಿರ್ಲಾ ಗ್ರೂಪ್​ನ ಪರಿವರ್ತನ ಚುನಾವಣಾ ಟ್ರಸ್ಟ್, ಕೆಕೆ ಬಿರ್ಲಾ ಗ್ರೂಪ್​ನ ಸಮಾಜ ಚುನಾವಣಾ ಟ್ರಸ್ಟ್ ಇದರಲ್ಲಿ ಸೇರಿವೆ. ಬಜಾಜ್ ಮತ್ತು ಮಹೀಂದ್ರ ಕೂಡ ಚುನಾವಣಾ ಟ್ರಸ್ಟ್​ಗಳನ್ನು ಹೊಂದಿವೆ.