ಯಮನ ವರದಾನ: ಆಗ ಯಮನು ಅವನನ್ನು ಕುರಿತು ಹೇಳುತ್ತಾನೆ: ‘‘ಹೇ ಬ್ರಹ್ಮನ್! ನೀನು ನನಗೆ ನಮಸ್ಕಾರಾರ್ಹನಾದ ಅತಿಥಿ. ನಿನಗೆ ನಮಸ್ಕಾರ. ಏಕೆಂದರೆ ಇದು ನನಗೆ ಕ್ಷೇಮಕಾರಕ. ಆದ್ದರಿಂದ ಈಗಾಗಲೇ ನನ್ನ ಬಾಗಿಲಿನಲ್ಲಿ ನೀನು ಮೂರು ರಾತ್ರಿಗಳು ಉಪವಾಸವಿದ್ದುದು ನನಗೆ ಕ್ಷೇಮವಲ್ಲ. ಏಕೆಂದರೆ ಯಾವ ಗೃಹಸ್ಥನ ಮನೆಯಲ್ಲಿ ಬ್ರಾಹ್ಮಣನು ಸತ್ಕರಿಸಲ್ಪಡದೆ ನಿರಾಹಾರನಾಗಿ ವಾಸಿಸುವನೋ ಅವನ, ಆ ಗೃಹಸ್ಥನ ಸಂಕಲ್ಪಗಳೂ, ಆಶೆಗಳೂ, ಅವನ ಸತ್ಸಂಗ ಫಲವೂ, ಸತ್ಯದ ನಡತೆಯೂ, ಪ್ರಿಯ ವಾಕ್ಯೋಚ್ಚಾರಣೆಯ ಫಲವೂ, ಪುಣ್ಯಕರ್ಮಫಲವೂ, ಪಶುಪುತ್ರಾದಿಗಳೂ, ನಾಶ ಹೊಂದುತ್ತಾರೆ. ಆದುದರಿಂದ ನನ್ನ ಈ ಪಾಪವು ಹೋಗುವುದಕ್ಕಾಗಿ ನೀನು ಮೂರು ವರಗಳನ್ನು ಕೇಳಿಕೋ.’’
