ವಾಸನ್ ಐ ಕೇರ್ ಸಂಸ್ಥಾಪಕರ ನಿಧನ; ಸಂಬಂಧಿಕರಿಂದ ಅನುಮಾನ

ಬೆಂಗಳೂರು: ವಾಸನ್​ ಐ ಕೇರ್​ ಸಂಸ್ಥಾಪಕ ಎ.ಎಂ. ಅರುಣ್​ (51) ಸೋಮವಾರ ನಿಗೂಢವಾಗಿ ಮೃತಪಟ್ಟಿದ್ದಾರೆ. ಎದೆನೋವು ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಅವರನ್ನು ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯುವಾಗ ಮಾರ್ಗಮಧ್ಯೆ ಕೊನೆಯುಸಿರೆಳೆದಿದ್ದಾರೆ. ಆದರೆ ಅವರ ಸಾವಿನ ಕುರಿತು ಸಂಬಂಧಿಕರು ಕೆಲವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

ಅರುಣ್​ ಸಾವಿನ ಬಗ್ಗೆ ಸಂಬಂಧಿಕರು ಆತ್ಮಹತ್ಯೆ ಅನುಮಾನ ವ್ಯಕ್ತಪಡಿಸಿದ್ದ ಹಿನ್ನೆಲೆಯಲ್ಲಿ ಚೆನ್ನೈನ ತೇನ್ಯಂಪೇಟ್​ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಪ್ರಾಥಮಿಕ ತನಿಖೆ ಪ್ರಕಾರ ಇದೊಂದು ಸಹಜ ಸಾವಾಗಿದ್ದು, ಆತ್ಮಹತ್ಯೆ ಅಥವಾ ಕೊಲೆ ಕುರಿತು ಯಾವುದೇ ಸುಳಿವು ಕಾಣಿಸಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.

ಅರುಣ್​ ಅವರಿಗೆ ಕಾಂಗ್ರೆಸ್ ಮುಖಂಡ ಪಿ.ಚಿದಂಬರಂ ಹಾಗೂ ಅವರ ಪುತ್ರ ಕಾಂಗ್ರೆಸ್​ ಸಂಸದ ಕಾರ್ತಿ ಚಿದಂಬರಂ ಜತೆ ನಿಕಟ ಸಂಬಂಧವಿದೆ. ಅಲ್ಲದೆ ಚಿದಂಬರಂ ತಮ್ಮ ಬ್ಲ್ಯಾಕ್​ ಮನಿ ವೈಟ್​ ಮಾಡಲು ವಾಸನ್​ ಐ ಕೇರ್​ ಸಂಸ್ಥೆಯನ್ನು ಬಳಸಿಕೊಂಡು ನಷ್ಟ ಉಂಟು ಮಾಡಿದ್ದಾರೆ ಎಂಬ ಆರೋಪವೂ ಇದೆ. 2015ರಲ್ಲಿ ಆದಾಯ ತೆರಿಗೆ ಅಧಿಕಾರಿಗಳು ಚೆನ್ನೈನಲ್ಲಿರುವ ಅರುಣ್ ಮನೆ ಹಾಗೂ ಮೈಲಾಪುರದಲ್ಲಿರುವ ವಾಸನ್​ ಐ ಕೇರ್​ ಆಸ್ಪತ್ರೆಗಳ ಮೇಲೆ ದಾಳಿ ನಡೆಸಿತ್ತು. ಜಾರಿ ನಿರ್ದೇಶನಾಲಯ ಕೂಡ ಸಂಸ್ಥೆಯ ಆರ್ಥಿಕ ಚಟುವಟಿಕೆಗಳನ್ನು ಪರಿಶೀಲಿಸಿತ್ತು. ಈ ಹಿನ್ನೆಲೆಯಲ್ಲಿ ಇವರ ಸಾವು ಹಾಗೂ ಸಂಬಂಧಿಕರ ಅನುಮಾನ ಎಲ್ಲ ಸೇರಿ ಪ್ರಕರಣದ ಕುರಿತು ಕುತೂಹಲ ಉಂಟಾಗಿದೆ. (ಏಜೆನ್ಸೀಸ್​)