ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮವು (ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೆರೇಷನ್ ಆಫ್ ಇಂಡಿಯಾ- ಎನ್ಪಿಸಿಐ) ಕ್ಯುಆರ್ ಕೋಡ್ ಸ್ಕಾ್ಯನ್ ಮಾಡಿ ಮೊಬೈಲ್ಫೋನ್ ಮೂಲಕ ಹಣ ಪಾವತಿಸುವ ಯುಪಿಐ (ಯುನಿಫೈಡ್ ಪೇಮೆಂಟ್ ಇಂಟರ್ಫೇಸ್- ಏಕೀಕೃತ ಪಾವತಿ ವ್ಯವಸ್ಥೆ) ಬಳಸಲು ವಿದೇಶದಲ್ಲಿರುವ ಭಾರತೀಯರಿಗೆ ಅನುಮತಿ ನೀಡಿದೆ. ದೇಶೀಯ ಬ್ಯಾಂಕ್ ಖಾತೆಗಳು ಹಾಗೂ ವಿದೇಶಿ ಮೊಬೈಲ್ ಸಂಖ್ಯೆಗಳ ನಡುವೆ ಲಿಂಕ್ ಇದ್ದರೆ ಮಾತ್ರ ಯುಪಿಐ ಮೂಲಕ ಪಾವತಿ ಮಾಡಲು ಅನಿವಾಸಿ ಭಾರತೀಯರಿಗೆ (ಎನ್ಆರ್ಐಗಳಿಗೆ) ಅವಕಾಶ ದೊರೆಯುತ್ತದೆ. ಇಲ್ಲಿಯವರೆಗೆ ಯುಪಿಐ ಮೂಲಕ ಪಾವತಿಸಲು ಭಾರತೀಯ ಫೋನ್ ಸಂಖ್ಯೆಗಳಿಗೆ ಮಾತ್ರ ಅನುಮತಿಯಿತ್ತು. ವಿದೇಶದಲ್ಲಿರುವ ಫೋನ್ ಸಂಖ್ಯೆಗಳಿಗೆ ಲಿಂಕ್ ಮಾಡಲಾದ ಅನಿವಾಸಿ ಭಾರತೀಯರ ಬ್ಯಾಂಕ್ ಖಾತೆಗಳನ್ನು ಈ ಪಾವತಿಯಿಂದ ಹೊರಗಿಡಲಾಗಿತ್ತು. ಎನ್ಆರ್ಐ ಬಳಕೆಗೂ ಈ ವ್ಯವಸ್ಥೆ ವಿಸ್ತರಿಸುವ ಕುರಿತು ಜನವರಿ 10ರಂದು ಎನ್ಪಿಸಿಐ ಸುತ್ತೋಲೆ ಹೊರಡಿಸಿತು. ಸ್ವದೇಶಿ ಪಾವತಿ ವೇದಿಕೆಯಾದ ಯುಪಿಐ ಅನ್ನು ವ್ಯಾಪಕವಾಗಿ ಅಳವಡಿಸಿಕೊಳ್ಳಲು ಇದು ದಾರಿ ಮಾಡಿಕೊಟ್ಟಿತು. ಮೊದಲ ಹಂತದಲ್ಲಿ, ಸಿಂಗಾಪುರ, ಆಸ್ಟ್ರೇಲಿಯಾ, ಕೆನಡಾ, ಹಾಂಕಾಂಗ್, ಒಮನ್, ಕತಾರ್, ಅಮೆರಿಕ, ಸೌದಿ ಅರೇಬಿಯಾ, ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಬ್ರಿಟನ್-ಹತ್ತು ದೇಶಗಳ ಫೋನ್ ಸಂಖ್ಯೆಗಳನ್ನು ಯುಪಿಐನಲ್ಲಿ ಬಳಸಲು ಅನುಮತಿಸಲಾಗಿದೆ. ಇದನ್ನು ಇತರ ರಾಷ್ಟ್ರಗಳಿಗೂ ವಿಸ್ತರಿಸಲಾಗುವುದು ಎಂದು ಎನ್ಪಿಸಿಐ ಹೇಳಿದೆ.
